Jeremias 38:1-28
38 Nangngeg da Sefatias nga anak ni Mattan, Gedalias nga anak ni Pasur, Jucal+ nga anak ni Selemias, ken Pasur+ nga anak ni Malkias ti imbaga ni Jeremias iti amin nga umili:
2 “Daytoy ti imbaga ni Jehova, ‘Daydiay saan a pumanaw iti daytoy a siudad ket matayto iti espada, nakaro a bisin, ken makapapatay a sakit.+ Ngem daydiay sumuko* kadagiti Caldeo ket agtultuloyto a sibibiag ken maisalakanna ti biagna* ket agtalinaed a sibibiag.’+
3 Daytoy ti imbaga ni Jehova, ‘Sigurado a maitedto daytoy a siudad iti armada ti ari ti Babilonia, ket sakupennanto dayta.’”+
4 Imbaga dagiti prinsipe iti ari: “Pangngaasim ta ipapataymo daytoy a tao,+ ta gapu kadagita nga ibagbagana, pakpakapuyenna ti pakinakem* dagiti soldado a nabati iti daytoy a siudad, agraman ti amin nga umili. Ta kayat daytoy a tao a madidigra dagitoy a tattao imbes a maaddaanda iti talna.”
5 Insungbat ni Ari Zedekias: “Sige! Aramidenyo kenkuana ti kayatyo, ta awan ti maaramidan ti ari a mangpasardeng kadakayo.”
6 Innalada ngarud ni Jeremias ket impisokda iti pagurnongan iti danum ni Malkias nga anak ti ari, nga adda iti Paraangan ti Guardia.+ Nagusarda iti tali a nangibaba ken Jeremias. Awan danum iti dayta a pagurnongan, pitak laeng isu nga in-inut a nailumlom ni Jeremias iti pitak.
7 Nadamag ni Ebed-melec+ nga Etiope, maysa a lalaki a eunuko* iti balay* ti ari, nga impisokda ni Jeremias iti pagurnongan iti danum. Agtugtugaw idi ti ari iti Ruangan ti Benjamin,+
8 isu a rimmuar ni Ebed-melec iti balay* ti ari ket imbagana iti ari:
9 “O apo ari, nagdakes ti inaramid dagitoy a lallaki ken propeta Jeremias! Impisokda iti pagurnongan iti danum, isu a matayto la ketdi idiay gapu iti nakaro a bisin, ta naibusen ti tinapay iti siudad.”+
10 Imbilin ngarud ti ari ken Ebed-melec nga Etiope: “Mangikuyogka iti 30 a lallaki nga adda ditoy, ket aonenyo ni propeta Jeremias iti pagurnongan iti danum sakbay a matay.”
11 Isu nga inkuyog ni Ebed-melec dagiti lallaki ket napanda iti sirok ti pagidulinan iti gameng iti uneg ti balay* ti ari.+ Nangalada sadiay kadagiti rutrot a rigis ken rutrot a pedaso ti lupot. Impababada dagita ken Jeremias iti pagurnongan iti danum babaen kadagiti tali.
12 Kalpasanna, imbaga ni Ebed-melec nga Etiope ken Jeremias: “Pangngaasim ta ikabilmo dagiti rigis ken pedaso ti lupot iti nagbaetan dagiti kilikilim ken dagiti tali.” Kasta ti inaramid ni Jeremias.
13 Inaonda ni Jeremias babaen kadagiti tali ken ginuyodda nga inruar iti pagurnongan iti danum. Nagtalinaed ni Jeremias iti Paraangan ti Guardia.+
14 Pinaayaban ni Ari Zedekias ni propeta Jeremias idiay maikatlo a pagserkan, nga adda iti balay ni Jehova, ket imbaga ti ari ken Jeremias: “Adda man saludsodek. Saanka nga agilimed kaniak.”
15 Imbaga ngarud ni Jeremias ken Zedekias: “No ibagak kenka, sigurado nga ipapataynak. Ket no bagbagaanka, dinak met la ipangag.”
16 Isu a sililimed nga insapata ni Ari Zedekias ken Jeremias: “Isapatak iti nagan ti sibibiag a Dios a ni Jehova, a nangted iti daytoy biagtayo,* saanka a patayen, ket saanka nga ited kadagitoy agpanggep a mangala iti biagmo.”*
17 Imbaga ni Jeremias ken Zedekias: “Daytoy ti imbaga ni Jehova a Dios dagiti armada, ti Dios ti Israel, ‘No sumukoka* kadagiti prinsipe ti ari ti Babilonia, maisalakan ti biagmo,* ken saanto a mapuoran daytoy a siudad, ket maisalakanka agraman ti sangakabbalayam.+
18 Ngem no saanka a sumuko* kadagiti prinsipe ti ari ti Babilonia, maitedto daytoy a siudad kadagiti Caldeo, ket puorandanto dayta,+ ket saanmonto ida a malibasan.’”+
19 Imbaga ni Ari Zedekias ken Jeremias: “Mabutengak kadagiti Judio a kimmapponen kadagiti Caldeo, di la ket ta parigatendak no maitedak kadakuada.”
20 Ngem kinuna ni Jeremias: “Saankanto a maited kadakuada. Pangngaasim ta agtulnogka iti ibagbagak kenka nga imbilin ni Jehova, tapno nasayaat ti pagbanagam ken agtultuloyka a sibibiag.
21 Ngem no dimo kayat ti sumuko,* daytoy ti impakaammo kaniak ni Jehova:
22 Kitaem! Amin a babbai a nabati iti balay* ti ari ti Juda ket naipan kadagiti prinsipe ti ari ti Babilonia,+ ket ibagbagada,‘Inallilaw ken inabakdaka dagiti lallaki a nagtalkam.*+
Inlumlomda ti sakam iti pitak.
Ita, immatras ken pimmanawdan.’
23 Ket ipanda ti amin nga assawam ken annakmo kadagiti Caldeo, ket saanmonto ida a malibasan. Tiliwennakanto ti ari ti Babilonia,+ ket gapu kenka, mapuoranto daytoy a siudad.”+
24 Imbaga ni Zedekias ken Jeremias: “Dimo ibagbaga iti asinoman dagitoy a banag tapno saanka a matay.
25 Ket no madamag dagiti prinsipe a nakisaritaak kenka ket umayda kenka sada ibaga, ‘Pangngaasim ta ibagam kadakami. Saanka nga agilimed kadakami, ket saandakanto a papatayen.+ Ania ti imbaga kenka ti ari?’
26 masapul nga ibagam kadakuada, ‘Kiniddawko iti ari a saannak a pagsublien iti balay ni Jehonatan tapno idiay ti pakatayak.’”+
27 Idi agangay, napan ti amin a prinsipe ken Jeremias ket sinaludsodanda. Imbagana kadakuada ti amin nga imbilin ti ari nga ibagana. Isu nga awanen ti naibagada kenkuana, ta awan ti nakangngeg iti nagsaritaanda iti ari.
28 Agingga iti aldaw ti pannakasakup ti Jerusalem, nagtalinaed ni Jeremias iti Paraangan ti Guardia;+ adda latta sadiay idi nasakup ti Jerusalem.+
Footnotes
^ Lit., “rummuar.”
^ Wenno “mailisi ti biagna (kararuana).”
^ Lit., “im-ima.”
^ Wenno “palasio.”
^ Wenno “nga opisial ti palasio.”
^ Wenno “palasio.”
^ Wenno “palasio.”
^ Wenno “mangbirbirok iti kararuam.”
^ Wenno “nangaramid iti daytoy kararuatayo.”
^ Lit., “rummuarka.”
^ Wenno “agtultuloy nga agbiag ti kararuam.”
^ Lit., “rummuar.”
^ Lit., “rummuar.”
^ Lit., “dagiti lallaki a sikakappia kenka.”
^ Wenno “palasio.”
