Jeremias 39:1-18
39 Idi maikasiam a tawen ti panagturay ni Ari Zedekias ti Juda, iti maika-10 a bulan, napan idiay Jerusalem ni Ari Nabucodonosor* ti Babilonia ken ti intero nga armadana ket pinalawlawanda dayta.+
2 Idi maika-11 a tawen ti panagturay ni Zedekias, iti maikasiam nga aldaw ti maikapat a bulan, sinerrekda ti pader ti siudad.+
3 Ket simrek ti amin a prinsipe ti ari ti Babilonia a da Nergal-sarezer a Samgar, Nebo-sarsekim a Rabsaris,* Nergal-sarezer a Rabmag* ken ti amin a dadduma pay a prinsipe ti ari ti Babilonia ket nagtugawda iti Makintengnga a Ruangan.+
4 Idi nakita ida ni Ari Zedekias ti Juda ken ti amin a soldado, nagtatarayda a naglibas+ iti siudad iti rabii. Dimmalanda iti hardin ti ari a napan iti ruangan nga adda iti nagbaetan ti dua a pader, ket nagturongda idiay Araba.+
5 Ngem kinamat ida ti armada dagiti Caldeo, ket nakamakamda ni Zedekias kadagiti desierto a tanap ti Jerico.+ Tiniliwda ket inyegda ken Ari Nabucodonosor* ti Babilonia idiay Ribla+ iti daga ti Hamat.+ Idiay a sinentensiaanna ni Zedekias.
6 Impapatay ti ari ti Babilonia dagiti annak a lallaki ni Zedekias iti imatangna idiay Ribla, ket impapatay ti ari ti Babilonia ti amin a natatan-ok iti Juda.+
7 Kalpasanna, binulsekna ni Zedekias sa pinosasanna kadagiti gambang a grilios tapno ipanna idiay Babilonia.+
8 Pinuoran dagiti Caldeo ti balay* ti ari ken balbalay dagiti umili,+ ken rinebbada dagiti pader ti Jerusalem.+
9 Impanaw ni Nabuzaradan+ a panguluen dagiti guardia ti nabati a tattao iti siudad, dagiti kimmappon kenkuana, ken ti asinoman a nabati. Impanna ida idiay Babilonia.
10 Ngem ni Nabuzaradan a panguluen dagiti guardia imbatina idiay Juda ti dadduma a kapanglawan a tattao, dagiti awanan a pulos iti sanikua. Iti dayta nga aldaw, inikkanna met ida iti kaubasan ken talon nga asikasuenda.*+
11 Dagitoy ti imbilin ni Ari Nabucodonosor* ti Babilonia ken ni Nabuzaradan a panguluen dagiti guardia maipapan ken Jeremias:
12 “Alaem ken aywanam; dimo an-anuen, ken itedmo amin a dawatenna.”+
13 Adda dagiti imbaon da Nabuzaradan a panguluen dagiti guardia, Nabusazban a Rabsaris,* Nergal-sarezer a Rabmag* ken ti amin a kangrunaan a lallaki ti ari ti Babilonia
14 a mangiruar ken Jeremias iti Paraangan ti Guardia.+ Intedda ken Gedalias+ nga anak ni Ahikam+ nga anak ni Safan.+ Naipan ngarud ni Jeremias iti balay ni Gedalias ket nakipagnaed kadagiti tattao.
15 Kinuna ni Jehova ken Jeremias bayat a nakabalud idiay Paraangan ti Guardia:+
16 “Inka ibaga ken Ebed-melec+ nga Etiope, ‘Daytoy ti imbaga ni Jehova a panguluen dagiti armada, ti Dios ti Israel: “Tungpalek ti imbagak a madidigra daytoy a siudad imbes a nasayaat ti lak-amenna, ket iti dayta nga aldaw makitamto a mapasamak dayta.”’
17 “‘Ngem isalakankanto iti dayta nga aldaw,’ kuna ni Jehova, ‘ket saankanto a maited kadagiti kabutbutengmo a tattao.’
18 “‘Ta siguraduek a makalibaska ken saankanto a matay iti espada. Maisalakanmonto ti biagmo*+ ta nagtalekka kaniak,’+ kuna ni Jehova.”
Footnotes
^ Lit., “Nabucodorosor,” sabali pay nga ispelingna.
^ Wenno sigun iti sabali a pannakabingay ti sasao iti Hebreo a teksto, “Nergal-sarezer, Samgar-nebo, Sarsekim, Rabsaris.”
^ Wenno “a panguluen a salamangkero (astrologo).”
^ Lit., “Nabucodorosor,” sabali pay nga ispelingna.
^ Wenno “palasio.”
^ Wenno mabalin nga, “inkapilitan a trabahuenda.”
^ Lit., “Nabucodorosor,” sabali pay nga ispelingna.
^ Wenno “a panguluen nga opisial ti palasio.”
^ Wenno “a panguluen a salamangkero (astrologo).”
^ Wenno “Mailisinto ti biagmo (kararuam).”
