Jeremias 9:1-26
9 O no la koma bubon ti danum daytoy ulok,Ken ubbog ti lulua dagitoy matak!+
Iti kasta, agsangitak iti aldaw ken rabiiGapu kadagiti napapatay a kailiak.
2 O no la koma adda pagdagusak iti let-ang!
Iti kasta, panawak ken adaywak dagiti kailiak,Ta mannakikamalalada amin,+Bunggoy dagiti traidor.
3 Pilkuenda ti dilada a kas iti bai ti pana;Nasaknap iti daga ti kinaulbod, imbes a kinamatalek.+
“Dumakdakesda,Ken saandak nga ikaskaso,”+ kuna ni Jehova.
4 “Dakayo amin, agannadkayo iti kaarrubayo,Ken saanyo a pagtalkan uray ti kabsatyo.
Ta traidor ti tunggal kabsat,+Ken mangpadpadakes ti amin a kaarruba.+
5 Loklokuen ti tunggal maysa ti kaarrubana,Awan a pulos ti agsasao iti kinapudno.
Sinuruanda ti dilada nga agsao iti kinaulbod.+
Agpappapasda nga agaramid iti dakes.
6 Aggigianka iti tengnga dagiti manangallilaw.
Mangal-allilawda ken saandak a kayat nga am-ammuen,” kuna ni Jehova.
7 Isu a daytoy ti kinuna ni Jehova a panguluen dagiti armada:
“Tunawek ken subokek ida,+Ta ania pay ti mabalinko nga aramiden iti anak a babai ti ilik?
8 Ti dilada ket makapapatay a pana nga agsasao iti makaallilaw.
Maipapan iti talna ti ibagbaga ti maysa a tao iti kaarrubana,Ngem iti un-unegna, dakes ti panggepna.”
9 “Saan aya a rumbeng laeng a singirek ida gapu kadagita?” kuna ni Jehova.
“Saan aya a rumbeng a balsek ti kasta a nasion?+
10 Agsangit ken agunnoyakto gapu iti kabambantayanKen agdung-awakto* gapu kadagiti pagaraban iti let-ang,Ta napuorandan isu nga awanen ti tao a magmagna kadagita,Ken awanen ti mangngeg nga uni dagiti dinguen.
Nagpapanawen dagiti billit iti tangatang ken dagiti animal; awandan.+
11 Pagbalinekto ti Jerusalem a bunton ti batbato,+ ti pagaponan dagiti chakal,+Pagbalinekto met a langalang dagiti siudad iti Juda, ket awanton ti agnaed kadagita.+
12 Asino ti addaan iti kasta unay a sirib tapno maawatanna daytoy?
Asino ti nangibagaan ni Jehova tapno maipakaammona dayta?
Apay a nadadael ti daga?
Apay a napuoran a kas iti let-ang,Isu nga awanen ti magmagna iti dayta?”
13 Kinuna ni Jehova: “Gapu ta binaybay-anda ti lintegko* nga intedko kadakuada, ken gapu ta saanda a sinurot dayta ken saanda a nagtulnog iti timekko.
14 Inggagarada ketdi ti nagtulnog iti dakes a pusoda+ ken nagdaydayawda kadagiti rebulto ni Baal, kas iti insuro kadakuada dagidi ammada.+
15 Isu a daytoy ti kinuna ni Jehova a panguluen dagiti armada, ti Dios ti Israel, ‘Pakanek dagitoy a tattao iti napait a mula nga ajenjo, ken painumekto ida iti nasabidongan a danum.+
16 Iwarawarakto ida kadagiti nasion a saanda nga ammo ken uray dagidi ammada,+ ket mangibaonakto kadagiti mangpapatay kadakuada agingga a maibusko ida.’+
17 Daytoy ti imbaga ni Jehova a panguluen dagiti armada,‘Panunotenyo ti mapaspasamak.
Paayabanyo dagiti babbai nga agkankanta kadagiti dung-aw,+Ken paumayenyo dagiti nalaing a babbai nga agdung-aw,
18 Tapno darasenda ti umay ken agunnoyda kadakami.*Tapno agarubos ti lua kadagiti matamiKen agaruyot ti danum kadagiti kalub ti matami.+
19 Ta ti panagunnoy ket nangngeg manipud Sion:+
“Nakaro ti pannakadadaeltayo!
Napalalo ti pannakaibabaintayo!
Ta pinanawantayo ti daga, ket rinakrakda ti balbalaytayo.”+
20 Dakayo a babbai, denggenyo ti kinuna ni Jehova.
Ipangagyo koma ti imbagana.
Isuroyo kadagiti annakyo a babbai daytoy nga un-unnoy,Ken isuroyo iti tunggal maysa daytoy a dung-aw.*+
21 Ta immuli ni patay kadagiti tawatayo;Simrek kadagiti natibker a torretayoTapno alaenna dagiti ubbing kadagiti kalsadaKen dagiti agtutubo a lallaki kadagiti plasa.’+
22 Ibagam, ‘Daytoy ti kuna ni Jehova:
“Agkaiwaranto dagiti bangkay ti tattao a kas iti ganagan iti talon,Kas iti naintar a kagapgapas iti likud ti agan-aniKet awan ti asinoman a mangurnong kadagita.”’”+
23 Daytoy ti imbaga ni Jehova:
“Saan koma nga ipannakkel ti masirib a tao ti siribna;+Saan koma nga ipannakkel ti nabileg a lalaki ti kinabilegna;Ket saan koma nga ipannakkel ti baknang a tao ti kinabaknangna.”+
24 “Ngem daytoy koma ti ipannakkel daydiay agpampannakkel:
Nga adda pannakatarus ken pannakaammona maipapan kaniak,+A siak ni Jehova, Daydiay mangipakpakita iti napudno nga ayat, kinahustisia, ken kinalinteg iti daga,+Ta dagita ti pakaragsakak,”+ kuna ni Jehova.
25 “Kitaenyo! Um-umayen dagiti aldaw,” kuna ni Jehova, “ket singirekto ti amin a nakugit ken saan a nakugit,+
26 idiay Egipto,+ Juda,+ Edom,+ kadagiti Ammonita,+ idiay Moab,+ ken ti amin a naputdan ti buok iti pispisda nga agnanaed idiay let-ang;+ ta saan a nakugit ti amin a nasion, ken nasukir ti puso* ti amin a tattao ti Israel.”+
Footnotes
^ Wenno “agkantaakto iti naladingit.”
^ Wenno “instruksionko.”
^ Wenno “kantaandakami iti naladingit a kanta.”
^ Wenno “kanta ti panagladingit.”
^ Lit., “saan a nakugit ti puso.”
