Job 16:1-22
16 Insungbat ni Job:
2 “Adun ti kasta a nangngegko.
Mangpadpadagsenkayo amin, imbes a mangliwliwa!+
3 Diyo kadi isardeng ti awan kaes-eskanna* a panagsasaoyo?
Ania aya ti mangsugsugsog kadakayo a sumungbat iti kasta?
4 Makapagsaoak met a kas kadakayo.
No dakayo ti adda iti lugarko,Kabaelak ti agsao iti makakombinsir kontra kadakayoKen wingiwingankayo.+
5 Ngem ti ibagak ket mangpabileg kadakayo,Ken makapabang-ar dagiti pangliwliwak kadakayo.+
6 No agsaoak, saan a maep-ep ti ut-ot a marikriknak,+Ket no sumardengak nga agsao, maksayan aya ti ut-ot a marikriknak?
7 Ngem inibusna ti amin a pigsak;+Dinadaelna ti intero a sangakabbalayak.*
8 Tiniliwnak met ket makitkita dayta dagiti tattao,Isu a ti kinarapisko ti agtestigo maibusor kaniak.
9 Narangrangkayak gapu iti ungetna, ken kagurguranak.+
Agngaretnget maibusor kaniak.
Natadem ti panagkita kaniak ti kalabanko.+
10 Nagngangada tapno alun-onendak,+Tinungpadak tapno maumsidak;Nakaad-aduda a dimmarup kaniak.+
11 Iyawatnak ti Dios kadagiti agtutubo a lallaki,Ken ipalladawnak iti ima dagiti managdakdakes.+
12 Natalna idi ti kasasaadko, ngem pinerdim ti biagko;+Tinengngelmo ti tengngedko ket pinarparigatnak,Sa pinagbalinnak a puntiria.
13 Palpalikmutandak dagiti pumapanana;+Duyokenna dagiti batok*+ ket saan man la a maasian;Ibukbokna ti aprok iti daga.
14 Kaslaak la iti pader nga abut-abutanna;Kasla soldado a mangkamkamat kaniak.
15 Nangdaitak iti sako a bado a pangabbong iti kudilko,+Ken inkalik iti tapok ti dignidadko.*+
16 Iti kasasangitko, lumablabbaga ti rupak,+Ken lumitlitem dagiti* kalub ti matak,
17 Uray no awan ti dakes nga ar-aramidek,Ken napasnek dagiti kararagko.
18 O daga, saanmo a gaburan ti darak!+
Ken saan koma a mapasardeng dagiti asugko!
19 Uray ita, adda idiay langit ti mangsaksi kaniak,Daydiay mangtestigo kaniak ket adda iti kangatuan.
20 Uy-uyawendak dagiti kakaduak+Bayat nga agsangsangitak* iti Dios.+
21 Adda koma ukom iti nagbaetan ti tao ken ti Dios,A kas iti kaadda ti ukom iti nagbaetan ti dua a tao.+
22 Ta manmanon dagiti sumungad a tawtawen,Ket mapanakon iti dalan a saanakton a makasubli.+
Footnotes
^ Wenno “naangin.”
^ Wenno “dagidiay naummong a kakaduak.”
^ Iti Ingles, “kidney.”
^ Wenno “pigsak.” Lit., “sara.”
^ Wenno “anniniwan ni patay ti adda iti.”
^ Wenno mabalin nga, “a mapuypuyatak a kumitkita.”
