Job 2:1-13
2 Kalpasanna, dimteng ti aldaw a simrek dagiti annak ti pudno a Dios*+ tapno sumangoda ken Jehova,+ ket simrek met ni Satanas a kaduada tapno sumango ken Jehova.+
2 Insaludsod ni Jehova ken Satanas: “Naggapuam?” Insungbat ni Satanas ken Jehova: “Sinursorko ti daga ken nagpagnapagnaak sadiay.”+
3 Imbaga ni Jehova ken Satanas: “Napaliiwmo kadi ti* adipenko a ni Job? Awan kapadana iti daga. Nalinteg ken awan pagkuranganna,*+ agbuteng iti Dios ken saan nga agar-aramid iti dakes. Awan latta ti pagkuranganna+ uray no padasennak a sugsogan+ a mangdadael* kenkuana nga awan gapgapuna.”
4 Ngem insungbat ni Satanas ken Jehova: “Kudil iti kudil. Ited ti tao ti amin nga adda kenkuana para iti biagna.*
5 Ngem tapno agbaliw ti kasasaad, unnatem ta imam ken sagidem ti tulang ken lasagna, ket siguradonto nga iparupana kenka ti panangilunodna kenka.”+
6 Kinuna ni Jehova ken Satanas: “Kitaem! Isu ket addan iti imam!* Isuna laeng ta saanmo a pukawen ti biagna!”*
7 Isu a pimmanaw ni Satanas iti sango* ni Jehova ket pinagsakitna ni Job iti naut-ot a busali*+ manipud iti dapanna agingga iti tuktok ti ulona.
8 Nangala ni Job iti nabuong a paset ti banga a pangkudkodna iti bagina, ket dapo ti pagtugtugawanna.+
9 Kamaudiananna imbaga ti asawana: “Agtalinaedka kadi latta nga awan pagkuranganna? Ilunodmo ti Dios ket matayka!”
10 Ngem insungbatna: “Agsasaoka a kasla maysa kadagiti maag a babbai. Ti laeng kadi naimbag ti awatentayo iti pudno a Dios ket ditayon awaten ti dakes?”+ Iti laksid amin dagitoy, saan a nagbasol ni Job iti panagsasaona.+
11 Nadamag ti tallo a kakadua* ni Job ti amin a didigra a dimteng kenkuana isu nga immay da Elifaz+ a Temanita, ni Bildad+ a Suhita,+ ken ni Zofar+ a Naamatita a naggapu kadagiti bukodda a lugar. Nagtutulagda nga agkikitada tapno mapanda makipagrikna ken ni Job ken liwliwaenda.
12 Idi nakitada manipud iti adayo, saanda a nalasin. Nagsangitda iti napigsa ket pinisangda dagiti badoda, ken nangipuruakda iti tapok iti ngato ken iti uloda.+
13 Pito nga aldaw ken pito a rabii a nakitugawda kenkuana iti daga. Awan ti imbagbagada kenkuana ta nakitada a nakaro unay ti ut-ot a marikriknana.+
Footnotes
^ Hebreo nga idiomatiko a sasao a tumukoy kadagiti anghel nga annak ti Dios.
^ Lit., “Insaadmo kadi ta pusom iti.”
^ Wenno “Awan pakababalawanna ken adda integridadna.”
^ Lit., “mangalun-on.”
^ Wenno “kararuana.”
^ Wenno “Kontroladomon.”
^ Wenno “kararuana.”
^ Lit., “rupa.”
^ Wenno “nakaro a gaddil.”
^ Wenno “gagayyem.”
