Job 32:1-22
32 Gapu ta kombinsido ni Job nga isu ket nalinteg,* simmardeng dagitoy tallo a lallaki iti panangikagumaanda a mangsungbat kenkuana.+
2 Ngem nakapungtot unay ni Elihu nga anak ni Barakel a Buzita+ iti pamilia ni Ram. Nakapungtot ken Job gapu ta ikalkalinteganna nga isu ti husto imbes a ti Dios.+
3 Nakapungtot met unay iti tallo a kakadua ni Job gapu ta awan ti nasayaat a naisungbatda. Imbagada ketdi a dakes ti Dios.+
4 Nagur-uray ni Elihu a sumungbat ken Job, ta in-inaunada ngem isuna.+
5 Nakapungtot ni Elihu idi nakitana nga awanen ti maisungbat ti tallo.
6 Isu a rinugian ni Elihu nga anak ni Barakel a Buzita ti agsao:
“Ubingak*Idinto ta lallakaykayon.+
Isu nga inggawidko ti bagik ta raraemenkayo,+Ken saanko nga imbaga kadakayo dagiti ammok.
7 Kinunak iti un-unegko, ‘Bay-am dagiti lallakay* nga agsao,Ken dagiti adun ti tawenna a mangipakaammo iti sirib.’
8 Ngem ti espiritu nga adda kadagiti tattao,Ti anges ti Mannakabalin-amin—dayta ti mangted kadakuada iti pannakaawat.+
9 Saan a gapu ta lakayen* ti maysa ket masiriben,Saan met a dagiti laeng lallakay ti umiso ti pannakaawatda.+
10 Isu nga ibagak, ‘Agimdengkayo kaniak.Ket ibagak met kadakayo dagiti ammok.’
11 Kitaenyo! Inan-anusak ti dimngeg kadagiti imbagayo;Immimdengak iti panagrasrasonyo+Bayat a nagpampanunotkayo kadagiti ibagayo.+
12 Dimngegak a naimbag kadakayo,Ngem awan kadakayo ti nakapaneknek a kamali ni Job,*Wenno nakasungbat kadagiti argumentona.
13 Isu a diyo ibagbaga, ‘Nasarakanmi ti sirib;Ti Dios ti mangilinteg kenkuana, saan a ti tao.’
14 Saan a siak ti kasasao ni Job,Isu a saan a dagiti argumentoyo ti pangsungbatko kenkuana.
15 Nadismayada, awanen ti maisungbatda;Awanen ti maibagada.
16 Nagur-urayak, ngem saandan nga intuloy ti agsao;Nakatakderda lattan nga awanen ti maisungbatda.
17 Isu a sumungbatak metten;Ibagak metten dagiti ammok,
18 Ta adu dagiti kayatko nga ibaga;Pilpilitennak ti espiritu nga adda kaniak.
19 Magagaranak unayen nga agsao.*No diak agsao, bumtak ti barukongko.*+
20 Bay-andak nga agsao tapno mabang-aranak!
Ungapekto ti bibigko ket sumungbatak.
21 Awan ti idumdumak;+Awan met ti tao a patpatiray-okak,*
22 Ta diak ammo ti mangpatiray-ok;Ta no ammok koma, pinataynakon a dagus ti Nangaramid kaniak.
Footnotes
^ Wenno “ta nalinteg ti panangkitana iti bagina.”
^ Lit., “bassit ti al-aldawko.”
^ Lit., “dagiti aldaw.”
^ Wenno “Saan a gapu ta adun ti aldaw.”
^ Wenno “nangtubngar ken Job.”
^ Lit., “Ti tianko ket kas arak nga awan pagsengngawanna.”
^ Lit., “Kas kadagiti baro a lalat a pagkargaan iti arak a dandanin mabtak.”
^ Wenno “padpadayawak.”
