Job 41:1-34
-
Iladawan ti Dios ti nakaskasdaaw a Leviatan (1-34)
41 “Matiliwmo aya ti Leviatan*+ babaen ti banniitWenno magalutam aya ti dilana?
2 Makaikabilka aya iti ruot* a tali iti abut ti agongnaWenno malussokam aya dagiti pangana iti kawit?*
3 Mamin-adunto aya nga agpakaasi kenka,Wenno naalumamayto kadi a makisarita kenka?
4 Makitulagto kadi kenka,Tapno agnanayon nga agbalin nga adipenmo?
5 Kaay-ayammonto aya a kas iti billit,Wenno galutam kadi tapno ay-ayamen dagiti ubbing nga annakmo a babbai?
6 Tawaranto kadi dayta dagiti negosiante?
Pagbibingayanto aya dayta dagiti aglaklako?
7 Maduyokmo aya ti kudilna kadagiti balabag*+Wenno ti ulona kadagiti pika ti ikan?
8 Iparabawmo kenkuana ti imam;Saanmonto a malipatan ti laban ket dimonton mapidua!
9 Saanmon a namnamaen a matiliwmo.
Makitam pay laeng, sumgaren ti dutdotmo.*
10 Awan ti makaitured a mangrurod iti dayta.
Isu nga asino ti makabael a mangsango kaniak?+
11 Asino ti kaunaan a nangted kaniak tapno masubadak?+
Amin nga adda iti baba ti langit ket kukuak.+
12 Saanakto nga agulimek maipapan kadagiti sakana,Maipapan iti kinapigsa ken kinapintas ti porma ti bagina.
13 Asino ti nangikkat iti lalatna?
Asino ti sumrek iti nakanganga a ngiwatna?
14 Asino ti makaungap iti ngiwatna?*
Nakabutbuteng ti amin a ngipenna.
15 Adda nalinialinia a siksik* iti bukotnaNairut ti panagkakamangda.
16 Nairut ti panagaabaydaTapno awan angin a sumrek iti nagbabaetanda.
17 Agdedekketda;Agkikinnapetda ken saanda a mapagsisina.
18 No agbang-es, adda rummuar a lawag,Dagiti matana ket kasla silnag ti parbangon.
19 Rummuar iti ngiwatna ti aggilapgilap a kimat;Agruar dagiti rissik ti apuy.
20 Umas-asuk ti agongna,Kas iti pugon a nasungrodan iti ruot.
21 Ti angesna ti mangpasged iti uging,Ket adda gil-ayab a rummuar iti ngiwatna.
22 Nakapigpigsa ti tengngedna,Mapabutngan ti amin a makasabat iti dayta.
23 Namnamsek ti amin a lasagna;Natangken a kas iti metal a saan a maikkat.
24 Kasla bato ti katangken ti pusona,Wen, kas katangken ti makimbaba a bato ti gilingan.
25 No rumkuas, mapabutngan uray dagiti napigsa;Makapataranta no agkutikuti ken iyabla-ablatna ti ipusna.
26 Awan ti espada a makaduyok iti dayta;Uray ti pika, sabat, wenno tirad ti pana.+
27 Ibilangna ti landok a kas garami,Ti gambang a kas narukop a kayo.
28 Saan nga aglibas uray no mapana;Kasla garami laeng dagiti bato a maipalsiit kenkuana.
29 Kasla garami laeng ti panagriknana iti pang-or,Ken katawaanna ti pika a maipuntiria kenkuana.
30 Ti buksitna ket kas iti katadem ti nabuong a damili;Agilad iti kapitakan a kas iti pagirik a pasagad.+
31 Pagburekenna ti adalem a kadanuman a kas iti danum ti banga;Pagluagenna ti baybay a kas iti lumlummuag a sapsapo iti banga.
32 Aglabutab ti mapagnaanna a danum.
Ipagarup daydiay makakita nga adda uban ti kadanuman.
33 Awan ti kas kenkuana iti rabaw ti daga,Dayta ket parsua nga awan ti kabutengna.
34 Mulagatanna ti amin a natangsit.
Dayta ti ari ti amin a napigsa nga atap nga animal.”
Footnotes
^ Mabalin a ti buaya.
^ Lit., “tanutubo.”
^ Lit., “siit.”
^ Kasla pika nga instrumento, a mabalin nga adda ngipenna a kas iti banniit.
^ Wenno “maitappuakkan.”
^ Lit., “rupana.”
^ Wenno mabalin a, “Pagtangtangsitna dagiti naintar a siksikna.”
