Job 42:1-17
42 Ket insungbat ni Job ken Jehova:
2 “Ammok itan a kabaelam nga aramiden ti amin a bambanagKen iti amin a pampanunotem nga aramiden, awan ti imposible kenka.+
3 Imbagam, ‘Asino daytoy agduadua iti balakadko nga awanan iti pannakaammo?’+
Nagsaoak ngarud ngem diak idi maaw-awatan ti ibagbagakMaipapan kadagiti banag a nakaskasdaaw unay kaniak a saanko nga ammo.+
4 Imbagam, ‘Pangngaasim ta dumngegka, ket agsaoak.
Sungbatam dagiti isaludsodko kenka.’+
5 Adda dagiti nangngegko maipapan kenka,Ngem ita, makitkitakan kadagiti bukodko a mata.
6 Isu nga ibabawik* dagiti imbagak,+Ken agbabawiak iti tapok ken dapdapo.”+
7 Kalpasan nga imbaga ni Jehova dagita ken Job, kinuna ni Jehova ken Elifaz a Temanita:
“Makapungtotak kenka ken iti dua a kakaduam,+ ta saanyo nga imbaga ti kinapudno maipapan kaniak+ kas iti inaramid ti adipenko a ni Job.
8 Mangalakayo ngarud iti pito a kalakian a baka ken pito a kalakian a karnero ken mapankayo ken adipenko a Job, ket puoranyo kas daton gapu iti basolyo. Ket ikararagannakayto+ ti adipenko a ni Job. Sigurado a patgakto ti kiddawna* a saankayo a dusaen gapu iti kinamaagyo, ta saanyo nga imbaga ti kinapudno maipapan kaniak kas iti inaramid ti adipenko a ni Job.”
9 Isu a napan ni Elifaz a Temanita, ni Bildad a Suhita, ken ni Zofar a Naamatita ket tinungpalda ti impaaramid kadakuada ni Jehova. Ket impangag ni Jehova ti kararag ni Job.
10 Kalpasan nga inkararagan ni Job dagiti kakaduana,+ pinagpatingga ni Jehova ti panagrigrigat ni Job,+ ket insublina ti narang-ay a biagna.* Dinoble ni Jehova ti kaadu ti dati a sanikua ni Job.+
11 Immay kenkuana ti amin a kakabsatna a lallaki ken babbai ken amin a dati a gagayyemna,+ ket nakipanganda kenkuana iti balayna. Nakipagriknada ken liniwliwada gapu iti amin a didigra nga impalubos ni Jehova a dumteng kenkuana. Nangted ti tunggal maysa kadakuada iti kuarta ken balitok a singsing.
12 Ad-adu a bendision ti inted ni Jehova iti maudi a paset ti biag ni Job ngem idi damo,+ isu a naaddaan ni Job iti 14,000 a karnero, 6,000 a kamelio, 1,000 a paris a baka, ken 1,000 a kabaian nga asno.+
13 Naaddaan met iti pito pay nga annak a lallaki ken tallo nga annak a babbai.+
14 Jemima ti impanaganna iti umuna, Kezia iti maikadua, ken Keren-hapuk iti maikatlo.
15 Awan idi ti babbai iti intero a daga a kas kapintas dagiti babbai nga annak ni Job, ket inikkan ida ni amada iti tawid a kas kadagiti kakabsatda a lallaki.
16 Kalpasan dayta, nagbiag ni Job iti 140 a tawen, ket nakitana dagiti annakna ken appokona—uppat a henerasion.
17 Kamaudiananna, natay ni Job kalpasan ti atiddog ken makapnek a biagna.*
Footnotes
^ Wenno “a ladingitek.”
^ Lit., “Sigurado a patangadekto ti rupana.”
^ Lit., “Binaliwan ni Jehova ti arig balud a kasasaad ni Job.”
^ Lit., “lakayen ken aduanen iti aldaw.”
