Job 6:1-30
6 Insungbat ngarud ni Job:
2 “No matimbang la koma ti amin a panagrigatko+Ken ti mapaspasarak a didigra!
3 Ta nadagdagsen payen dayta ngem kadagiti darat iti baybay.
Dayta ti makagapu a ti la adda a maibagbagak.*+
4 Ta sinalputnak dagiti pana ti Mannakabalin-amin,Mariknak nga agwarwaras iti bagik ti sabidongda;+Siak ti puntiria dagiti pammutbuteng ti Dios.
5 Aguni kadi ti atap nga asno+ no mangmangan iti ruot,Wenno agemmak kadi ti baka no agngalngalngal?
6 Makanmo kadi ti awan ramramanna a taraon no saan a maasinan,Wenno adda kadi nanam ti tubbog ti malbabisko?*
7 Diak kayat nga iggaman dagiti kasta a banag.
Kasda la rugit iti taraonko.
8 O matungpal koma ti kiddawkoKen patgan koma ti Dios ti dawatko!
9 Patayennak koman ti Dios,Ken usarenna ti imana a mangpugsat iti angesko!+
10 Ta uray dayta ket makaliwliwa kaniak;Aglagtoak gapu iti rag-o uray nakaro ti marikriknak nga ut-ot,Ta diak inlemmeng ti sasao ti Nasantuan a Dios.+
11 Adda pay aya pigsak nga aguray?+
Adda pay aya masakbayak tapno agtultuloyak nga agbiag?*
12 Kasla kadi iti dakkel a bato ti bilegko?
Wenno gambang kadi ti lasagko?
13 Adda kadi aniaman a pamay-an a matulongak ti bagikIdinto ta awanen ti mangsuporta kaniak?
14 Asinoman a mangipaidam iti napudno nga ayatna iti padana a tao+Ket awan panagbutengna iti Mannakabalin-amin.+
15 Dagiti mismo a kakabsatko ket manangallilaw+ a kas iti waig iti tiempo ti lam-ek,Kas iti danum dagiti nagmaga a waig no tiempo ti lam-ek.
16 Limmibegda gapu iti yelo,Ken marunrunaw ti niebe iti unegda.
17 Adda tiempo nga agmaga ken maatiananda;Iti tiempo ti pudot, agmagada.
18 Agbaliw ti panagayusda;Agayusda kadagiti desierto ket mapukawda.
19 Birbiroken ida ti grupo dagiti biahero ti Tema;+Ur-urayen ida dagiti biahero a naggapu iti Sheba.*+
20 Mabainda gapu ta sabali ti nagtalkanda;Napanda sadiay ngem napaayda.
21 Ta kasta ti nagbalinanyo kaniak;+Nagbutengkayo idi nakitayo ti nakaro a pannakadidigrak.+
22 Imbagak kadi nga, ‘Ikkandak,’
Wenno kiniddawko aya a regaluandak manipud iti kinabaknangyo?
23 Impakaasik kadi nga alawendak iti ima ti kabusorWenno isalakandak* kadagiti mangikuskuspil?
24 Isurodak ket agulimekakto;+Tulongandak a mangkita iti kamalik.
25 Saan a nasakit dagiti napudno a sasao!+
Ngem ania ti pagsayaatan ti panangtubngaryo?+
26 Pangpanggepenyo aya a kritikaren ti ibagbagak,Ti desperado+ a kas kaniak a ti sasaona ket itayab ti angin?
27 Uray ti ulila+ ket pagbibinnunotanyoKen ilakoyo* ti mismo a gayyemyo!+
28 Ket ita taliawendak ken kitaendak,Ta diak agulbod iti mismo a rupayo.
29 Panunotenyo manen, pangngaasiyo—saandak a husgaran—Wen, panunotenyo manen, ta nalintegak latta.
30 Saan aya a husto ti ibagbagak?
Diak aya mailasin no ti banag ket di umiso?
Footnotes
^ Wenno “darasudos ti panagsasaok.”
^ Iti Ingles, “mallow.”
^ Wenno “tapno pagpautek ti biagko (kararuak).”
^ Wenno “dagiti agdaldaliasat a bunggoy dagiti Sabeo.”
^ Lit., “subbotendak.”
^ Wenno “isukatyo.”
