Josue 10:1-43
10 Nadamag ni Ari Adoni-zedek ti Jerusalem a pinarmek ni Josue ti Ai ken dinadaelna dayta sa pinatayna ti arina+ a kas iti inaramidna iti Jerico ken iti arina.+ Naammuanna pay a nakikappia dagiti umili ti Gibeon kadagiti Israelita+ ken makipagnanaedda kadakuada.
2 Isu a nagbuteng unay+ ta dakkel a siudad ti Gibeon, kas kadagiti siudad nga iturturayan ti maysa nga ari. Dakdakkel ngem iti Ai+ ken mannakigubat ti amin a lallaki sadiay.
3 Isu nga impaibaga ni Adoni-zedek nga ari ti Jerusalem ken ni Hoham nga ari ti Hebron,+ ken ni Piram nga ari ti Jarmut, ken ni Jafia nga ari ti Lakis, ken ni Debir nga ari ti Eglon:+
4 “Tulongandak, rautentayo ti Gibeon ta nakikappiada ken Josue ken kadagiti Israelita.”+
5 Pinagkakadua ngarud ti lima nga ar-ari dagiti Amoreo+—ti ari ti Jerusalem, ti ari ti Hebron, ti ari ti Jarmut, ti ari ti Lakis, ken ti ari ti Eglon—dagiti armadada ket nagkampoda tapno gubatenda ti Gibeon.
6 Impaibaga dagiti lallaki ti Gibeon ken ni Josue iti kampoda idiay Gilgal:+ “Dimo koma baybay-an* dagiti adipenmo.+ Umayka a dagus! Isalakannakami, tulongannakami! Nagkakaduan ti amin nga ar-ari dagiti Amoreo nga aggigian iti kabambantayan a bumusor kadakami.”
7 Manipud Gilgal, nagrubbuat ni Josue a kaduana ti amin a soldadona ken dagiti nabileg a mannakigubat.+
8 Kinuna ni Jehova ken Josue: “Dimo kabuteng ida,+ ta intedkon ida kenka.+ Awanto ti uray maysa kadakuada a makaitured a lumaban kenka.”+
9 Nagpatnag a nagna ni Josue manipud Gilgal ket rinautna dagiti Amoreo a dida napakpakadaan.
10 Riniribuk ni Jehova dagiti kabusor+ ket rinugian dagiti Israelita a papatayen ti adu kadakuada idiay Gibeon. Kinamkamatda ida iti sang-atan ti Bet-horon ket intultuloyda ida a pinapatay agingga idiay Azeka ken Makeda.
11 Bayat nga itartarayanda dagiti Israelita iti pagsalogan iti Bet-horon, pinagtudo ni Jehova iti uraro* agingga idiay Azeka ket natayda. Kinapudnona, ad-adu ti natay gapu iti uraro ngem iti pinatay dagiti Israelita iti espada.
12 Iti dayta nga aldaw, pinagballigi ni Jehova dagiti Israelita iti pananggubatda kadagiti Amoreo. Imbaga ni Josue ken ni Jehova iti sango dagiti Israelita:
“Init, dika umak-akar+ iti ngato ti Gibeon,+
Ken bulan, dika agkutkuti iti ngato ti Tanap* ti Aijalon!”
13 Isu nga iti dayta nga aldaw, saan nga immakar ti init ken saan a nagkutkuti ti bulan agingga a nakaibales ti nasion ti Israel kadagiti kabusorna. Saan aya a naisurat dayta iti libro ni Jasar?+ Saan nga immak-akar ti init iti tengnga ti langit ken intantanna ti limnek iti agarup maysa nga aldaw.
14 Saan pay a pulos a napaspasamak ti kasta, sakbay wenno kalpasanna, idi impangag ni Jehova ti timek ti maysa a tao,+ ta ni Jehova ti makigubgubat idi para iti Israel.+
15 Kalpasan dayta, nagsubli ni Josue ken ti amin a kakaduana nga Israelita iti kampo idiay Gilgal.+
16 Kabayatanna, naglibas ti lima nga ari ken naglemmengda iti kueba idiay Makeda.+
17 Naipadamag ken Josue: “Aglemlemmeng ti lima nga ari iti kueba idiay Makeda.”+
18 Isu a kinuna ni Josue: “Mangitulidkayo iti dadakkel a bato iti wangawangan ti kueba ket mangibaonkayo kadagiti mangguardia kadakuada.
19 Ngem itultuloy latta a kamaten ti dadduma kadakayo dagiti kabusoryo. Papatayenyo ida manipud iti likudan.+ Diyo ipalubos a makastrekda kadagiti siudadda, ta inted idan ni Jehova a Diosyo kadakayo.”
20 Kalpasan a pinatay ni Josue ken ti kakaduana nga Israelita ti nagadu a kabusorda, nupay adda sumagmamano a nakalibas ken nakastrek kadagiti napaderan a siudad,
21 amin a mannakigubat ket sitatalged a nagsubli ken Josue iti kampo idiay Makeda. Awan ti asinoman a nagsao* iti maikontra kadagiti Israelita.
22 Kalpasanna, imbaga ni Josue: “Luktanyo ti kueba. Iruaryo ti lima nga ari ket iyegyo kaniak.”
23 Isu nga inyegda kenkuana ti lima nga ari nga inruarda iti kueba: ti ari ti Jerusalem, Hebron, Jarmut, Lakis, ken Eglon.+
24 Idi addan dagiti ari iti sango ni Josue, pinaayabanna ti amin a lallaki ti Israel ket imbagana kadagiti komander dagiti soldado a kimmuyog kenkuana: “Umasidegkayo. Payatenyo ti teltel dagitoy nga ar-ari.” Isu nga immasidegda ket kasta ti inaramidda.+
25 Kinuna kadakuada ni Josue: “Dikay agbuteng wenno agamak.+ Papigsaenyo ti pakinakemyo ken bumilegkayo, ta kastoy ti aramidento ni Jehova iti amin a gubgubatenyo a kabusoryo.”+
26 Kalpasanna, pinapatay ida ni Josue sa imbitinna a saggaysa iti lima a poste,* ket nagtalinaedda a nakabitin agingga a sumipnget.
27 Idi lumneken ti init, impaibaba ida ni Josue kadagiti nakaibitinanda a poste+ ket impaipalladawna iti kueba a naglemmenganda idi. Kalpasanna, naserraan ti kueba iti dadakkel a bato, ket adda pay laeng dagita idiay agingga ita.
28 Iti dayta nga aldaw, pinarmek ni Josue ti Makeda+ ket pinatayna ti ari ken amin nga umili* iti espada. Awan a pulos ti nabati.+ Inaramidna iti ari ti Makeda+ ti kas iti inaramidna iti ari ti Jerico.
29 Kalpasanna, nagrubbuat ni Josue ken dagiti soldadona idiay Makeda ket napanda ginubat ti Libna.+
30 Inted met ni Jehova ti Libna ken ti arina+ kadagiti Israelita, ket sinerrekda dayta ken pinatayda iti espada ti amin nga umili* sadiay. Awan a pulos ti nabati a sibibiag. Inaramidda iti ari ti Libna ti kas iti inaramidda iti ari ti Jerico.+
31 Manipud Libna, napan ni Josue ken ti amin a kakaduana nga Israelita idiay Lakis+ ket nagkampoda sadiay ken ginubatda.
32 Iti maikadua nga aldaw, inted ni Jehova ti Lakis kadagiti Israelita ken pinarmekda dayta. Pinatayda iti espada ti amin nga umili* sadiay+ kas iti inaramidda iti Libna.
33 Immay ni Horam nga ari ti Gezer+ tapno tulonganna ti Lakis. Ngem pinatay ni Josue ni Horam ken dagiti soldadona. Awan a pulos ti nabati a sibibiag.
34 Manipud Lakis, napan ni Josue ken ti amin a kakaduana nga Israelita idiay Eglon+ ket nagkampoda sadiay ken ginubatda.
35 Iti dayta nga aldaw, pinarmekda dayta babaen ti espada. Pinapatayda ti amin nga umili* iti dayta nga aldaw kas iti inaramidda iti Lakis.+
36 Manipud Eglon, napan ni Josue ken ti amin a kakaduana nga Israelita idiay Hebron+ ket ginubatda.
37 Sinakup ken dinadaelda dayta ken dagiti ilina. Pinatayda met ti ari ken amin nga umili* iti espada. Awan a pulos ti imbatida a sibibiag. Kas iti inaramid ni Josue iti Eglon, dinadaelna ti Hebron ken pinatayna ti amin nga umili* sadiay.
38 Kamaudiananna, napan ni Josue ken ti amin a kakaduana nga Israelita idiay Debir+ ket ginubatda.
39 Pinarmek ken dinadaelda dayta ken dagiti ilina. Pinatayna met ti ari ken amin nga umili* iti espada.+ Awan a pulos ti imbatina a sibibiag.+ Inaramidna iti Debir ken iti ari dayta a lugar ti inaramidna iti Hebron ken iti Libna ken iti arida.
40 Sinakup ni Josue ti intero a daga iti kabambantayan, ti Negeb, ti Sefela,+ ken dagiti bakras, ken pinapatayna ti amin nga arida. Awan a pulos ti imbatina a sibibiag; pinatayna ti amin nga umili+ kadagita a lugar kas iti imbilin ni Jehova a Dios ti Israel.+
41 Pinapatay ida ni Josue manipud Kades-barnea+ agingga idiay Gaza+ ken iti intero a daga ti Gosen+ ken agingga idiay Gibeon.+
42 Pinarmek ni Josue amin dagitoy nga ari ken ti dagada, iti maysa a pannakigubat, ta ni Jehova ti makigubgubat para iti Israel.+
43 Kalpasanna, nagsubli ni Josue ken ti amin a kakaduana nga Israelita iti kampo idiay Gilgal.+
Footnotes
^ Lit., “pagpallailangen ta imam.”
^ Wenno “dadakkel a yelo.”
^ Wenno “Kapatagan.”
^ Lit., “nangpatadem iti dilana.”
^ Wenno “kayo.”
^ Wenno “a kararua.”
^ Wenno “a kararua.”
^ Wenno “a kararua.”
^ Wenno “a kararua.”
^ Wenno “a kararua.”
^ Wenno “a kararua.”
^ Wenno “a kararua.”
