Josue 11:1-23
11 Apaman a nadamag dayta ni Jabin nga ari ti Hazor, pinakaammuanna ni Jobab nga ari ti Madon,+ ken ti ari ti Shimron, ti ari ti Acsaf,+
2 dagiti ari nga adda iti makin-amianan a kabambantayan, dagiti adda iti kapatagan* iti abagatan ti Kineret, dagiti adda idiay Sefela ken kadagiti bakras ti Dor+ iti laud,
3 dagiti Canaanita+ iti daya ken laud, dagiti Amoreo,+ Heteo, Perizeo, dagiti Jebuseo iti kabambantayan, ken dagiti Heveo+ iti puon ti Bantay Hermon+ idiay Mizpa.
4 Isu a nagsaganada a kadua ti amin nga armadada a kas iti kaadu ti darat iti igid ti baybay, agraman ti nakaad-adu a kabalio ken karuahe a pakigubat.
5 Nagtutulag dagitoy nga ar-ari nga agdadanonda ken agkampoda iti igid ti waig ti Merom tapno gubatenda ti Israel.
6 Imbaga ni Jehova ken ni Josue: “Dimo kabuteng ida.+ Inton bigat, iti agarup kastoy nga oras, iyawatkonto ida kadakayo tapno mapapatayyo amin ida. Tukkolenyo ti saka dagiti kabalioda+ ken puoranyo dagiti karuaheda.”
7 Idi addadan iti igid ti waig ti Merom, pagammuan ta rinaut ida ni Josue ken ti amin a soldadona.
8 Inyawat ida ni Jehova kadagiti Israelita,+ ket inabak ken kinamatda ida agingga iti Dakkel a Sidon+ ken Misrefot-maim+ ken iti Tanap ti Mizpe iti daya. Dida simmardeng a nangpapatay agingga nga awan a pulos ti uray maysa a nabati a sibibiag.+
9 Tinungpal ni Josue ti amin nga imbilin ni Jehova kenkuana; tinukkolna ti saka dagiti kabalioda ken pinuoranna dagiti karuaheda.+
10 Kalpasanna, nagsubli ni Josue ket pinarmekna ti Hazor ken pinatayna ti ari iti espada,+ ta ti Hazor ti kabilgan idi kadagita a pagarian.
11 Pinapatayda amin a tattao* iti espada.+ Awan a pulos ti nabati a sibibiag.+ Kalpasanna, pinuoranda ti Hazor.
12 Pinarmek ni Josue amin dagitoy a siudad ken pinapatayna amin nga arida babaen ti espada.+ Dinadaelna amin ida+ a kas iti imbilin ni Moises nga adipen ni Jehova.
13 Ngem saan a pinuoran dagiti Israelita ti aniaman a siudad a naibangon kadagiti turod. Ti laeng Hazor ti pinuoran ni Josue.
14 Sinamsam dagiti Israelita ti amin a napateg a banag kadagita a siudad ken dagiti tarakenda nga animal,+ ngem pinapatayda amin a tattao.+ Awan a pulos ti nabati a sibibiag.+
15 No ania ti imbilin ni Jehova ken ni Moises, dayta met ti imbilin ni Moises ken ni Josue,+ ket kasta ti inaramid ni Josue. Tinungpalna ti amin nga imbilin ni Jehova ken ni Moises.+
16 Pinarmek ni Josue ti intero a lugar, ti kabambantayan, ti intero a Negeb,+ ti intero a daga ti Gosen, ti Sefela,+ ti Araba,+ ken ti kabambantayan ti Israel ken ti katurturodanna,*
17 manipud Bantay Halak, a sumang-at idiay Seir, ken agingga idiay Baal-gad+ iti Tanap ti Lebanon iti puon ti Bantay Hermon.+ Tiniliwna met amin nga arida ken pinatayna ida.
18 Nabayag a nakigubat ni Josue kadagitoy nga ar-ari.
19 Awan ti siudad a nakikappia kadagiti Israelita no di laeng dagiti Heveo nga aggigian idiay Gibeon.+ Inabakda amin dagita iti gubat.+
20 Impalubos ni Jehova a tumangsitda+ isu a ginubatda dagiti Israelita tapno mapapatayna ida nga awanan asi.+ Masapul a mapapatayda amin, kas iti imbilin ni Jehova ken ni Moises.+
21 Iti dayta a tiempo, pinapatay ni Josue ti amin nga Anakim+ nga aggigian iti kabambantayan, iti Hebron, Debir, Anab, ken iti intero a kabambantayan ti Juda ken iti intero a kabambantayan ti Israel. Dinadaelna amin ida ken dagiti siudadda.+
22 Awan ti nabati nga Anakim iti daga nga ayan dagiti Israelita, no di laeng idiay Gaza,+ Gat,+ ken Asdod+ ti ayanda.+
23 Kas inkari ni Jehova ken ni Moises, nasakup ni Josue amin dagita a daga.+ Biningbingayna ti daga para iti tunggal tribu dagiti Israelita kas tawidda.+ Adda talna iti daga ta awanen ti gubat.+
