Josue 16:1-10
16 Ti daga a naited*+ kadagiti annak ni Jose+ ket mangrugi iti Jordan idiay Jerico nga agtultuloy kadagiti ubbog ken waig iti daya ti Jerico, ken sumang-at nga agturong iti kabambantayan ti Bethel.+
2 Manipud iti Bethel a sakup ti Luz, agtultuloy dayta agingga iti pagpatinggaan ti teritoria dagiti Arkita idiay Atarot,
3 sa sumalog nga agpalaud agingga iti pagpatinggaan ti teritoria dagiti Jafleteo nga agdirdiretso iti pagpatinggaan ti teritoria ti Makimbaba a Bet-horon+ ken Gezer,+ sa agpatingga iti baybay.
4 Daytoy a daga ti tinagikua dagiti annak ni Jose,+ da Manases ken Efraim.+
5 Daytoy ti daga a kukua ti tribu ni Efraim sigun kadagiti pamiliada: Mangrugi iti Atarot-addar+ iti daya agingga iti Makinngato a Bet-horon,+
6 ken agtultuloy agingga iti baybay. Ti Mikmetat+ ti pagpatinggaan ti teritoriana iti amianan ken manglikaw iti daya agingga iti Taanat-shilo, sa agpadaya agingga iti Janoa.
7 Mangrugi iti Janoa, sumalog agingga iti Atarot ken Naara sa dumanon iti Jerico+ ken agpatingga iti Jordan.
8 Manipud Tapua,+ agtultuloy nga agpalaud agingga iti Karayan* ti Kana, ken agpatingga iti baybay.+ Dayta ti tawid ti tribu ni Efraim sigun kadagiti pamiliada;
9 adda met dagiti siudad ken purok a natawid ti tribu ni Efraim nga adda iti daga a tawid ti tribu ni Manases.+
10 Ngem saanda a pinapanaw dagiti Canaanita nga aggigian iti Gezer,+ ket nagtultuloy a nakipagyan dagiti Canaanita kadagiti Efraimita agingga ita,+ ken isuda ti nagtrabaho iti nadagsen.+
