Josue 20:1-9
-
Dagiti siudad a pagkamangan (1-9)
20 Kinuna ni Jehova ken Josue:
2 “Ibagam kadagiti Israelita, ‘Mangpilikayo kadagiti siudad a pagkamangan+ kas iti imbagak idi kadakayo babaen ken Moises,
3 tapno agkamang sadiay ti asinoman a di inggagara* a nakapatay. Dagita ti pagbalinenyo a pagkamangan tapno malisianna ti mangibales iti dara ti napapatay a tao.+
4 Masapul nga agkamang iti maysa kadagita a siudad+ ken agtakder iti pagserkan ti ruangan ti siudad+ ket ilawlawagna ti kasona kadagiti panglakayen iti dayta a siudad. Kalpasanna, masapul a pastrekenda iti siudad, ikkanda iti pagyananna, ken makipagyan kadakuada.
5 No sapulen ti mangibales iti dara ti napapatay a tao, saanda nga isuko kenkuana ta di inggagara* a nakapatay iti padana a tao, ken saanna met a dati a kagurgura.+
6 Masapul nga agyan iti dayta a siudad agingga a mausig ti kasona iti sango dagiti umili+ ken agtalinaed iti siudad a pagkamangan agingga iti ipapatay ti agak-akem a nangato a padi+ iti dayta a tiempo. Kalpasanna, mabalinnan ti agsubli iti naggapuanna a siudad ken agawid iti balayna.’”+
7 Isu a pinagbalinda a sagrado* ti Kedes+ idiay Galilea iti kabambantayan ti Neftali, ti Sikem+ iti kabambantayan ti Efraim, ken ti Kiriat-arba,+ wenno Hebron, iti kabambantayan ti Juda.
8 Iti rehion ti Jordan, iti daya ti Jerico, pinilida ti Bezer+ iti let-ang iti patad a lugar iti rabaw dagiti bantay iti tribu ni Ruben, ti Ramot+ idiay Gilead iti tribu ni Gad, ken ti Golan+ idiay Basan iti tribu ni Manases.+
9 Dagita ti siudad a napili para iti amin nga Israelita ken para kadagiti ganggannaet a residente a makipaggigian kadakuada, tapno makapagkamang sadiay ti asinoman a nakapatay a dina inggagara,+ ket saan a patayen ti mangibales iti dara ti napapatay a tao sakbay a mausig ti kasona iti sanguanan dagiti umili.+
