Josue 24:1-33
-
Ipalagip ni Josue dagiti pasamak iti pakasaritaan ti Israel (1-13)
-
Maiparegta ti panagserbi ken Jehova (14-24)
-
“No siak ken ti sangakabbalayak, agserbikami ken Jehova” (15)
-
-
Tulag ni Josue iti Israel (25-28)
-
Ipapatay ken pannakaitabon ni Josue (29-31)
-
Naikali idiay Sikem dagiti tulang ni Jose (32)
-
Ipapatay ken pannakaitabon ni Eleazar (33)
24 Inummong ni Josue ti amin a tribu ti Israel idiay Sikem ket inayabanna dagiti panglakayen, panguluen, ukom, ken opisial,+ ket nagtakderda iti sanguanan ti pudno a Dios.
2 Kinuna ni Josue iti amin a tattao: “Daytoy ti kinuna ni Jehova a Dios ti Israel, ‘Idi un-unana,+ iti ballasiw ti Karayan* ti nagyanan dagidi ammayo+—ni Tera nga ama da Abraham ken Nahor—ket agserserbida idi kadagiti sabali a dios.+
3 “‘Idi agangay, impanko daydi amayo nga Abraham+ iti ballasiw ti Karayan* ket pinasursorko ti intero a daga ti Canaan. Pinaaduk ti kaputotanna.*+ Intedko kenkuana ni Isaac;+
4 sa intedko ken ni Isaac da Jacob ken Esau.+ Kalpasanna, impatawidko ken Esau ti Bantay Seir;+ ket napan ni Jacob ken dagiti annakna idiay Egipto.+
5 Idi agangay, imbaonko da Moises ken Aaron+ ket dinidigrak ti Egipto.+ Kalpasanna, inruarkayo.
6 Idi inruarko idiay Egipto dagidi ammayo+ ken nakadanonda iti baybay, kinamat ida dagiti karuahe a pakigubat ken kabaliero ti Egipto agingga iti Nalabaga a Baybay.+
7 Gapu iti dayta, nagikkisda nga agpatulong ken Jehova+ isu a nangikabil iti sipnget iti nagbaetanyo kadagiti Egipcio ket pinagsabatna manen ti nabisngay a baybay a nanglemmes kadakuada.+ Nakita dagiti mismo a matayo dagiti inaramidko idiay Egipto.+ Kalpasanna, nagnaedkayo idiay let-ang iti adu a tawen.*+
8 “‘Impankayo iti daga dagiti Amoreo nga agnanaed idi iti bangir* ti Jordan. Ginubatdakayo+ ngem intedko ida kadakayo tapno kukuayon ti dagada, ket dinadaelko amin ida iti sanguananyo.+
9 Idi kuan, ni Balak nga anak ni Zipor nga ari ti Moab ket nagsagana a makigubat iti Israel, isu a pinaayabanna ni Balaam nga anak ni Beor tapno ilunodnakayo.+
10 Ngem saanak a dimngeg ken Balaam,+ isu a namin-adu a binendisionannakayo,+ ket insalakankayo kenkuana.+
11 “‘Kalpasanna, binallasiwyo ti Jordan+ ken nakadanonkayo iti Jerico.+ Ginubatdakayo dagiti lider* ti Jerico, dagiti Amoreo, Perizeo, Canaanita, Heteo, Girgaseo, Heveo, ken dagiti Jebuseo, ngem intedko ida kadakayo.+
12 Sumungsungadkayo pay laeng, nangyegakon iti pagbutnganda* isu a ti dua nga ari dagiti Amoreo ket napapatayyo,+ saan a babaen ti espadayo wenno panayo.+
13 Inikkankayo iti daga a saanyo a nagbannogan ken adu a siudad a saanyo a binangon,+ ket dagita ti nagyananyo. Mangmangankayo kadagiti bunga dagiti kaubasan ken kaolibuan a saanyo nga immula.’+
14 “Isu nga agbutengkayo ken Jehova ken agserbikayo nga awan pagkuranganna* ken simamatalek.*+ Ikkatenyo dagiti didiosen a nagserbian dagidi ammayo idiay bangir ti Karayan* ken idiay Egipto,+ ket agserbikayo ken Jehova.
15 Ngem no diyo kayat ti agserbi ken Jehova, pilienyo ngarud ita no asino ti pagserbianyo,+ no dagiti didiosen a nagserbian dagidi ammayo iti ballasiw ti Karayan*+ wenno dagiti didiosen dagiti Amoreo a makindaga idi iti paggigiananyo.+ Ngem no siak ken ti sangakabbalayak, agserbikami ken Jehova.”
16 Simmungbat dagiti umili: “Saanmi a pulos a tallikudan ni Jehova tapno agserbikami kadagiti sabali a dios.
17 Ni Jehova a Diostayo ti nangiruar kadatayo ken kadagidi ammatayo idiay Egipto,+ a nakaadipenantayo,+ ken nangaramid kadagiti milagro a nakitatayo+ ken kanayon a nangsalaknib kadatayo iti intero a panagdaliasattayo ken kadagiti tattao a nalabsantayo.+
18 Pinapanaw ni Jehova ti amin a tattao, agraman dagiti Amoreo, nga immun-una a nagnaed iti dagatayo. Gapuna, agserbikami met ken Jehova ta isu ti Diostayo.”
19 Imbaga ni Josue kadagiti tattao: “Talaga kadi a kabaelanyo ti agserbi ken Jehova? Isu ket nasantuan a Dios;+ Dios nga agkalikagum iti naipamaysa a debosion.+ No diyo aramiden dayta, saannanto a pakawanen dagiti kinasukir* ken basolyo.+
20 No tallikudanyo ni Jehova ken agserbikayo kadagiti didiosen dagiti sabali a nasion, dusaen ken dadaelennakayo amin uray no naimbag dagiti inaramidna para kadakayo.”+
21 Ngem kinuna dagiti tattao ken Josue: “Ni Jehova a talaga ti pagserbianmi!”+
22 Isu a kinuna ni Josue kadagiti tattao: “Dakayo ti saksi iti bagbagiyo a dakayo a mismo ti nagdesision a ni Jehova ti piniliyo a pagserbian.”+ Insungbat dagiti tattao: “Saksikami.”
23 “Ikkatenyo ngarud iti tengngayo dagiti didiosen dagiti sabali a nasion, ket naimpusuan nga agserbikayo ken Jehova a Dios ti Israel.”
24 Kinuna dagiti tattao ken Josue: “Ni Jehova a Diostayo ti pagserbianmi, ken agtulnogkami kenkuana!”
25 Nakitinnulag ni Josue kadagiti tattao ket inikkanna ida iti bilin ken pagannurotan idiay Sikem.
26 Kalpasanna, insurat ni Josue dagitoy a sasao iti libro ti Linteg ti Dios+ ket nangala iti dakkel a bato+ ken inkabilna iti sirok ti dakkel a kayo iti abay ti santuario ni Jehova.
27 Kinuna ni Josue iti amin a tattao: “Kitaenyo! Daytoy a bato ti saksi maibusor kadatayo,+ ta nangngegna ti amin nga imbaga kadatayo ni Jehova, ken saksi maibusor kadakayo, tapno saanyo a tallikudan ti Diosyo.”
28 Kalpasanna, pinagawiden ni Josue dagiti tattao ket napandan kadagiti bukodda a tawid.+
29 Idi agangay, natay ti adipen ni Jehova a ni Josue nga anak ni Nun idi agtawen iti 110.+
30 Isu nga intabonda iti teritoria a tawidna idiay Timnat-sera,+ iti kabambantayan ti Efraim, iti amianan ti Bantay Gaas.
31 Intultuloy dagiti Israelita ti nagserbi ken Jehova bayat a sibibiag ni Josue ken dagiti panglakayen a naud-udi a natay ngem ni Josue ken makaammo iti amin nga inaramid ni Jehova para iti Israel.+
32 Dagiti tulang ni Jose,+ nga intugot dagiti Israelita manipud Egipto, ket naikali idiay Sikem iti lote a ginatang ni Jacob iti 100 a pedaso a kuarta+ manipud kadagiti annak ni Hamor,+ nga ama ni Sikem; ket nagbalin dayta a tawid dagiti annak ni Jose.+
33 Natay met ni Eleazar nga anak ni Aaron,+ isu nga intabonda idiay Turod ni Finehas nga anakna,+ a naited kenkuana iti kabambantayan ti Efraim.
Footnotes
^ Kayatna a sawen, ti Eufrates.
^ Kayatna a sawen, ti Eufrates.
^ Lit., “bin-ina.”
^ Lit., “nga al-aldaw.”
^ Kayatna a sawen, iti daya.
^ Wenno mabalin a, “dagiti makinkukua iti daga.”
^ Wenno mabalin a, “makagapu a matarantada, madanaganda.”
^ Wenno “awan pakababalawanna.”
^ Wenno “sipupudno.”
^ Kayatna a sawen, ti Eufrates.
^ Kayatna a sawen, ti Eufrates.
^ Wenno “panagrebelde.”
