Josue 4:1-24
-
Dagiti bato nga agserbi a palagip (1-24)
4 Idi nakaballasiwen ti amin nga Israelita iti Jordan, imbaga ni Jehova ken Josue:
2 “Ayabam ti 12 a lallaki a pinilim iti tunggal tribu ti Israel,+
3 ket ibilinmo kadakuada, ‘Mangalakayo iti 12 a bato iti tengnga ti karayan a nagtakderan dagiti papadi.+ Bagkaten ken ikabilyo dagita iti lugar nga umyananyo.’”+
4 Inayaban ni Josue ti 12 a lallaki a pinilina manipud iti tunggal tribu ti Israel.
5 Kinunana iti tunggal maysa kadakuada: “Labsanyo ti Lakasa ni Jehova a Diosyo iti tengnga ti Jordan, ket mangibaklaykayo sadiay iti bato, sigun iti bilang dagiti tribu ti Israel.
6 Dagitoy a bato ket agserbi a pagilasinan iti inaramid ti Dios kadakayo. No damagento dagiti annakyo,* ‘Apay nga addaankayo kadagiti kastoy a bato?’+
7 ibagayonto kadakuada: ‘Gapu ta nagsardeng ti ayus ti Jordan idi maiballasiw ti lakasa+ ti tulag ni Jehova. Dagitoy a bato ti kanayonto a mangipalagip kadagiti Israelita iti napasamak.’”+
8 Ket inaramid dagiti Israelita ti imbilin ni Josue. Nangalada iti 12 a bato iti tengnga ti Jordan, kas iti imbilin ni Jehova ken Josue, sigun iti bilang dagiti tribu ti Israel. Binagkatda dagita nga impan iti imyananda.
9 Nangipan met ni Josue iti 12 a bato iti tengnga ti Jordan a nagtakderan dagiti papadi a nangbagkat iti lakasa ti tulag.+ Adda pay laeng sadiay dagiti bato agingga ita.
10 Dagiti papadi a mangbagbagkat iti Lakasa ket nagtalinaed a sitatakder iti tengnga ti Jordan agingga a naibaga ni Josue kadagiti tattao ti amin nga imbilin ni Moises kenkuana a naggapu ken Jehova. Nagdardaras a bimmallasiw dagiti Israelita.
11 Idi nakaballasiwdan, imballasiw metten dagiti papadi ti Lakasa ni Jehova a kitkitaen dagiti Israelita.+
12 Ti tribu ni Ruben, ti tribu ni Gad, ken ti kagudua ti tribu ni Manases bimmallasiwda a kas kadagiti agmartsa a soldado+ ken immun-unada ngem kadagiti dadduma nga Israelita, kas iti imbilin ni Moises kadakuada.+
13 Dandani 40,000 nga armado a soldado ti bimmallasiw iti imatang ni Jehova agingga kadagiti tanap ti Jerico.
14 Iti dayta nga aldaw, pinadayawan ni Jehova ni Josue iti imatang ti intero nga Israel,+ isu a nagdakkel ti panagraemda* kenkuana bayat a sibibiag, kas iti kadakkel ti panagraemda idi ken Moises.+
15 Imbaga itan ni Jehova ken Josue:
16 “Bilinem dagiti papadi a mangbagbagkat iti lakasa+ ti Testimonia a sumang-atda iti Jordan.”
17 Isu a binilin ni Josue dagiti papadi: “Sumang-atkayo iti Jordan.”
18 Simmang-at dagiti papadi a mangbagbagkat iti lakasa+ ti tulag ni Jehova. Apaman a nagdisso dagiti sakada iti ballasiw, nagayus manen ti Jordan ket naglippias dagiti danumna+ a kas iti dati.
19 Nakaballasiw dagiti Israelita iti Jordan iti maika-10 nga aldaw ti umuna a bulan ket nagkampoda idiay Gilgal+ iti makindaya a pagpatinggaan ti teritoria ti Jerico.
20 Inkabil ni Josue idiay Gilgal ti 12 a bato nga innalada iti Jordan.+
21 Imbagana kadagiti Israelita: “Inton damagen dagiti annakyo, ‘Ania ti kaipapanan dagitoy a bato?’+
22 ilawlawagyonto kadakuada: ‘Binallasiwmi ti Jordan nga awan danumna,+
23 ta pinasardeng ni Jehova a Diosyo ti ayus ti Jordan agingga a nakaballasiwkami, kas iti inaramid ni Jehova a Diostayo idi binisngayna ti Nalabaga a Baybay agingga a nakaballasiwkami.+
24 Inaramidna dayta tapno maammuan ti amin a tattao iti daga no kasano kapigsa ti mannakabalin nga ima ni Jehova+ ken tapno kanayon nga agbutengkayo ken Jehova a Diosyo.’”