Ebanghelio ni Juan 15:1-27
15 “Siak ti pudno a puon ti ubas, ket ti Amak ti agay-aywan.
2 Putdenna dagiti sanga a saan nga agbunga, ket dalusanna dagiti sanga nga agbungbunga, tapno ad-adu pay ti ibungada.+
3 Nadaluskayon gapu iti sao nga imbagak kadakayo.+
4 Agtalinaedkayo a naikaykaysa kaniak, ket agtalinaedak met a naikaykaysa kadakayo. No kasano a saan a makapagbunga ti sanga a bukbukodna malaksid no agtalinaed a naisilpo iti puon ti ubas, saankayo met a makapagbunga malaksid no agtalinaedkayo a naikaykaysa kaniak.+
5 Siak ti puon ti ubas; dakayo dagiti sanga. Agbunga iti adu daydiay agtalinaed a naikaykaysa kaniak ken naikaykaysaak kenkuana,+ ta awan a pulos ti maaramidanyo no naisinakayo kaniak.
6 Ti saan nga agtalinaed a naikaykaysa kaniak ket kas iti maysa a sanga a maibelleng ken magango. Urnongen dagiti tattao dagita a sanga sa puoranda.
7 No agtalinaedkayo a naikaykaysa kaniak ken agtalinaed ti sasaok iti pusoyo, kiddawenyo ti aniaman a kayatyo ket mapatganto.+
8 Maidaydayaw ti Amak no agtultuloykayo nga agbunga iti adu ken no paneknekanyo a dakayo dagiti adalak.+
9 No kasano ti panagayat kaniak ti Ama,+ kasta met ti panagayatko kadakayo. Agtalinaedkayo iti ayatko.
10 No tungpalenyo dagiti bilinko, makapagtalinaedkayo iti ayatko, no kasano a tinungpalko dagiti bilin ti Ama ket nagtalinaedak iti ayatna.
11 “Imbagak dagitoy kadakayo, tapno naan-anay a mariknayo ti rag-o a marikriknak.+
12 Ibilinko nga agiinnayatkayo kas iti panagayatko kadakayo.+
13 Awan ti dakdakkel nga ayat ngem iti daytoy, nga ited ti maysa ti biagna* para kadagiti gagayyemna.+
14 Dakayo ti gagayyemko no tungpalenyo ti ibilbilinko.+
15 Saankayon nga awagan iti adipen, ta saan nga ammo ti adipen ti ar-aramiden ti apona. Ngem awagankayo iti gagayyem, ta impakaammok kadakayo ti amin a nangngegko iti Amak.
16 Saandak a pinili, no di ket siak ti nangpili kadakayo, ken dinutokankayo tapno agtultuloykayo nga agbunga ket manayon koma ti bungayo. Iti kasta, patgan ti Ama ti aniaman a kiddawenyo iti naganko.+
17 “Ibilinko dagitoy kadakayo tapno agiinnayatkayo.+
18 No guraennakayo ti lubong, laglagipenyo a siak ti immun-una a ginurana sakbay a ginuranakayo.+
19 No pasetnakayo ti lubong, maayatan koma kadakayo ti lubong. Ngem gapu ta saankayo a paset ti lubong,+ no di ket pinilikayo manipud iti lubong, guraennakayo ti lubong.+
20 Laglagipenyo ti imbagak kadakayo: Saan a natantan-ok ti adipen ngem ti apona. No indadanesdak, idadanesdakayto met;+ no tinungpalda ti saok, tungpalendanto met ti saoyo.
21 Ngem aramidendanto amin dagitoy kadakayo maigapu iti naganko, ta saanda nga am-ammo Daydiay nangibaon kaniak.+
22 No saanak nga immay ken nagsao kadakuada, awan koma ti basolda.+ Ngem ita, saandan a mailibak ti basolda.+
23 Ti manggura kaniak guraenna met ti Amak.+
24 No saanda koma a nakita dagiti inaramidko a saan a maaramidan ti sabali, awan koma ti basolda;+ ngem ita, nakitadak ken ginuradak kasta met ti Amak.
25 Ngem napasamak daytoy tapno matungpal ti naisurat iti Lintegda: ‘Ginuradak nga awan gapgapuna.’+
26 Inton umay ti katulongan, ti espiritu a mangipakaammo iti kinapudno,+ nga ibaonko manipud iti Ama, saksiannanto ti maipapan kaniak;+
27 ket saksianyonto met ti maipapan kaniak,+ ta nakikadkaduakayo kaniak sipud idi damo.
Footnotes
^ Wenno “kararuana.”
