Ebanghelio ni Juan 2:1-25
2 Iti maikatlo nga aldaw, adda selebrasion ti kasar idiay Cana iti Galilea, ket naawis ti ina ni Jesus.
2 Naawis met ni Jesus ken dagiti adalanna iti dayta a selebrasion.
3 Idi dandanin maibus ti arak, kinuna ti ina ni Jesus: “Awanen ti arakda.”
4 Ngem insungbat ni Jesus: “Babai, apay koma a pakaseknanta dayta?* Saan pay a dimteng ti orasko.”
5 Kinuna ti inana kadagiti agserserbi: “Aramidenyo ti aniaman nga ibagana.”
6 Adda idi innem a burnay sadiay kas ikalikagum ti paglintegan dagiti Judio+ maipapan iti panagdalus. Makalaon ti tunggal burnay iti dua wenno tallo a likido a sukat.*
7 Kinuna ni Jesus: “Punnuenyo dagiti burnay iti danum.” Pinunnoda dagita agingga iti ngarabna.
8 Kinunana pay: “Tumakokayo ket ipanyo iti direktor ti kasar.” Kasta ti inaramidda.
9 Rinamanan ti direktor ti kasar ti danum a napagbalin nga arak, ngem saanna nga ammo ti naggapuan dayta nupay ammo dagiti nangtako iti danum. Kalpasanna, inayaban ti direktor ti kasar ti nobio
10 ket kinunana: “Kaugalian dagiti tattao nga idasar nga umuna ti nasayaat nga arak, ket inton mabartekdan, idasarda ti nababbaba ti kalidadna. Ita laeng nga inruarmo ti nasayaat nga arak.”
11 Inaramid daytoy ni Jesus idiay Cana iti Galilea kas umuna a milagrona ken pammaneknek iti dayagna,+ ket namati kenkuana dagiti adalanna.
12 Kalpasanna, napan idiay Capernaum+ a kaduana ni inana, dagiti kakabsatna,+ ken dagiti adalanna, ngem saanda a nagbayag sadiay.
13 Asideg idin ti Paskua+ dagiti Judio, ket napan ni Jesus idiay Jerusalem.
14 Nakitana iti templo dagiti aglaklako iti baka, karnero, ken kalapati.+ Nakitana met dagiti agsuksukat iti kuarta a nakatugaw sadiay.
15 Kalpasan a nangaramid iti pagsaplit a tali, pinapanawna amin ida iti templo agraman dagiti karnero ken baka, ken inwarana dagiti sinsilio dagiti agsuksukat iti kuarta ket binalintuagna dagiti lamisaanda.+
16 Kinunana kadagiti aglaklako iti kalapati: “Ikkatenyo dagitoy! Isardengyo a pagbalbalinen a pagtagilakuan ti balay ni Amak!”+
17 Nalagip dagiti adalanna ti naisurat: “Ti panangipategko iti balaymo ket kaslanto apuy a sumsumged iti pusok.”+
18 Gapuna, kinuna kenkuana dagiti Judio: “Ania ti maipakitam a pagilasinan,+ ta ar-aramidem dagitoy?”
19 Insungbat ni Jesus: “Rebbaenyo daytoy a templo, ket bangonekto iti tallo nga aldaw.”+
20 Kinuna ngarud dagiti Judio: “Naibangon daytoy a templo iti 46 a tawen, kasano koma a maibangonmo iti tallo nga aldaw?”
21 Ngem ti templo a tuktukoyenna idi ket ti bagina.+
22 Idi napagungar ni Jesus, nalagip dagiti adalanna a kanayonna idi nga ibagbaga dayta,+ ket namatida iti kasuratan ken iti imbagana.
23 Nupay kasta, idi adda idiay Jerusalem bayat ti piesta ti Paskua, adu a tattao ti namati kenkuana* idi nakitada ti adu a pagilasinan nga inaramidna.
24 Ngem saan a naan-anay a nagtalek ni Jesus kadakuada ta am-ammona amin ida
25 ken saanna a kasapulan ti asinoman a mangibaga kenkuana iti maipapan iti tao, ta ammona ti adda iti puso ti maysa a tao.+
Footnotes
^ Lit., “Ania koma ti bibiangta, babai?” Daytoy ket pagsasao a mangipakita iti panagkedked. Ti pannakausar ti sao a “babai” saanna nga ipamatmat ti kinaawan panagraem.
^ Lit., “iti naganna.”
