Ti Kanta ni Solomon 5:1-16
5 “Simrekak iti hardinko,+O kabsatko, nobiak.
Nagalaak iti mirra ken mula a pagpabanglo.+
Kinnanko ti dirok manipud iti rara;Ininumko ti arak ken gatasko.”+
“Mangankayo, patgek a gagayyem!
Uminumkayo ket agbartekkayo iti ebkas ti pammateg!”+
2 “Matmaturogak, ngem siririing ti pusok. +
Mangmangngegko ti panagtuktok ti patpatgek!
‘Ilukatannak, O kabsatko, ay-ayatek,Kalapatik nga awan pakapilawanna!
Ta nabasa ti ulok iti linnaaw,Nabasa ti buokko iti linnaaw ti rabii.’ +
3 Inuksobkon ti nagayad a badok.
Isuotko kadi manen?
Binugguakon dagiti sakak.
Rugitak kadi manen?
4 Inikkat ti patpatgek ti imana iti abut ti ridaw,Ket nagagaranak a makakita kenkuana.
5 Timmakderak tapno ilukatak ti patpatgek;Nagtedted iti imak ti mirra,Ken iti ramayko ti likido a mirra,Iti pagiggaman ti trangka.
6 Inlukatak ti patpatgek,Ngem nakapanawen ti patpatgek, awanen.
Nadismayaak idi immadayo.
Binirokko, ngem diak nasarakan.+
Inawagak, ngem dinak sinungbatan.
7 Nakitadak dagiti guardia nga agliklikmut iti siudad.
Kinabildak, sinugatandak.
Dagiti guardia iti pader inikkatda ti kagayko.*
8 Pagsapataenkayo, O annak a babbai ti Jerusalem:
No masarakanyo ti patpatgek,Ibagayo kenkuana nga agkakapsutak gapu ken ayat.”
9 “Kasano koma a nasaysayaat ti patpatgem ngem ti asinoman a maipatpateg,O kapintasan kadagiti babbai?
Kasano koma a nasaysayaat ti patpatgem ngem ti asinoman a maipatpateg,Ta uray la pagsapataennakami?”
10 “Naguapo ken lumabbasit ti kudil ti patpatgek;Naiduma iti sangapulo a ribu.
11 Ti ulona ket kas iti balitok, ti kasayaatan a balitok.
Ti buokna ket kas iti mayang-angin a bulbulong ti palma,*Kas kangisit ti wak.
12 Dagiti matana ket kas kadagiti kalapati iti igid ti agay-ayus a danum,Nga agdigdigus iti gatasKen agtugtugaw iti ngarab ti agliplippias a pagurnongan iti danum.*
13 Ti pingpingna ket kas iti pagmulaan iti pagpabanglo,+Binunton a nabanglo a yerba.
Ti bibigna ket kasla lirio, nga agtedtedted iti likido a mirra.+
14 Dagiti imana ket kasla tubo a balitok, nga addaan iti krisolito.
Ti tianna ket kasla nasileng a marfil a nakalupkopan iti safiro.
15 Dagiti luppona ket kasla adigi a marmol a naiparabaw iti kasayaatan a balitok.
Kas kapintas ti Lebanon ti langana, kas katayag ti kayo a sedro.+
16 Nasam-it ti ngiwatna,*Ken makaay-ayo ti amin a maipapan kenkuana.+
Daytoy ti patpatgek, daytoy ti ay-ayatek, O annak a babbai ti Jerusalem.”
Footnotes
^ Wenno “dalungdongko.”
^ Wenno mabalin a, “raay ti datiles.”
^ Wenno mabalin a, “ngarab ti bubon.”
^ Lit., “ngadasna.”
