Levitico 14:1-57
14 Intuloy a kinuna ni Jehova ken ni Moises:
2 “Daytoy ti linteg a masurot iti aldaw a maipakaammo a nadalusen ti agkukutel. Masapul a maipan iti padi.+
3 Rummuar ti padi iti kampo ket kitaenna ti agkukutel. No immimbagen,
4 ibilin ti padi a mangyeg iti dua a sibibiag a billit a maibilang a nadalus, sanga ti kayo a sedro, nalabaga a lupot, ken mula a hisopo para iti pannakadalusna.+
5 Ibaga ti padi a maparti ti maysa a billit iti ngatuen ti karamba a nakargaan iti danum ti ubbog.
6 Ngem alaenna ti sibibiag a billit agraman ti sanga ti kayo a sedro, nalabaga a lupot, ken mula a hisopo ket isawsawna dagita iti dara ti billit a naparti iti ngatuen ti danum a naala iti ubbog.
7 Kalpasanna, mamimpito a warsianna ti tao a nadalusanen manipud iti kukutel ket ipakaammona a nadalusen dayta a tao, sa ibulosna iti tanap+ ti sibibiag a billit.
8 “Ti tao a madaldalusan masapul a labaanna dagiti badona, kiskisanna ti intero a bagina, ken agdigus ket maibilangen a nadalus. Kalpasanna, mabalinnan ti sumrek iti kampo ngem agyan iti ruar ti toldana iti pito nga aldaw.
9 Iti maikapito nga aldaw, masapul a kiskisanna ti amin a buok ti ulo, timid, ken kidayna. Kalpasanna, labaanna dagiti badona, agdigus, ket maibilangen a nadalus.
10 “Iti maikawalo nga aldaw, mangala iti dua a nasalun-at nga urbon a kalakian a karnero, maysa a nasalun-at a kabaian a karnero+ nga agarup maysa ti tawenna, tallo nga apagkapullo ti efa* a napino nga arina a nalaokan iti lana kas daton a bukbukel,+ ken maysa a log* a lana;+
11 ket ipan ti padi ti tao a madaldalusan, agraman dagiti datonna, iti sanguanan ni Jehova iti ruangan ti tolda a pagkonsultaan.
12 Alaen ti padi ti urbon a kalakian a karnero ket idatagna kas daton gapu iti biddut+ agraman ti maysa a log a lana, ket ingatona nga ilili dagita kas daton iti sanguanan ni Jehova.+
13 Kalpasanna, partienna ti urbon a kalakian a karnero iti nasantuan a disso, iti pagpartian iti daton gapu iti basol ken daton a mapuoran.+ Kas iti daton gapu iti basol, kukua ti padi ti daton gapu iti biddut.+ Nasantuan unay dayta.+
14 “Mangala ti padi iti dadduma a dara ti daton gapu iti biddut, ket ipulagidna iti kannawan a piditpidit ti tao a madaldalusan ken iti tangan ti kannawan nga ima ken sakana.
15 Alaen ti padi ti maysa a log a lana+ ket mangibukbok iti bassit iti kannigid a dakulapna.
16 Kalpasanna, isawsawna ti kannawan a ramayna iti lana nga adda iti kannigid a dakulapna ket mamimpito nga iwarsina dayta iti sanguanan ni Jehova.
17 Ipulagid ti padi ti dadduma a natedda a lana nga adda iti dakulapna iti kannawan a piditpidit ti tao a madaldalusan ken iti kannawan a tangan ti ima ken sakana, kas iti inaramidna iti dara ti daton gapu iti biddut.
18 Ikabil ti padi ti natedda a lana iti dakulapna iti ulo ti tao a madaldalusan. Aramiden daytoy ti padi tapno maibilang a nadalus dayta a tao iti sanguanan ni Jehova.+
19 “Idatag ti padi ti daton gapu iti basol+ tapno mapakawan ken maibilang a nadalus ti tao a madaldalusan, sa partienna ti daton a mapuoran.
20 Idatag ti padi ti daton a mapuoran ken ti daton a bukbukel+ iti rabaw ti altar tapno mapakawan ti basol ti tao a madaldalusan+ ket maibilang a nadalus.+
21 “Ngem no napanglaw ket saanna a kabaelan dagita, mangala iti maysa nga urbon a kalakian a karnero kas daton gapu iti biddut ket ingatona nga ilili tapno mangaramid iti panangabbong, agraman ti apagkapullo ti maysa nga efa* a napino nga arina a nalaokan iti lana kas daton a bukbukel, maysa a log a lana,
22 ken dua a pagaw wenno dua a sibong ti atap a kalapati, sigun iti kabaelanna. Ti maysa ket daton gapu iti basol ken ti maysa ket daton a mapuoran.+
23 Iti maikawalo nga aldaw,+ ipanna dagita iti padi iti ruangan ti tolda a pagkonsultaan tapno mapatalgedan a nadalusen iti sanguanan ni Jehova.+
24 “Alaen ti padi ti urbon a kalakian a karnero kas daton gapu iti biddut+ ken ti maysa a log a lana, ket ingatona nga ilili dagita kas daton iti sanguanan ni Jehova.+
25 Kalpasanna, partienna ti urbon a kalakian a karnero kas daton gapu iti biddut, ket mangala ti padi iti dara dayta a daton sa ipulagidna iti kannawan a piditpidit ti tao a madaldalusan ken iti tangan ti kannawan nga ima ken sakana.+
26 Mangibukbokto ti padi iti dadduma a lana iti kannigid a dakulapna,+
27 ken isawsawna ti kannawan a ramayna iti lana nga adda iti kannigid a dakulapna sa mamimpito nga iwarsina dayta iti sanguanan ni Jehova.
28 Ipulagid ti padi ti dadduma a lana nga adda iti dakulapna iti kannawan a piditpidit ti tao a madaldalusan ken iti kannawan a tangan ti ima ken sakana, kas iti inaramidna iti dara ti daton gapu iti biddut.
29 Ikabil ti padi ti natedda a lana iti dakulapna iti ulo ti tao a madaldalusan. Aramiden daytoy ti padi tapno maibilang a nadalus dayta a tao iti sanguanan ni Jehova.
30 “Idatonna ti maysa kadagiti pagaw wenno maysa kadagiti sibong ti atap a kalapati, sigun iti kabaelanna,+
31 agpaay ti maysa kas daton gapu iti basol ken ti sabali kas daton a mapuoran,+ agraman ti daton a bukbukel. Aramiden daytoy ti padi tapno mapakawan ti basol ti tao a madaldalusan iti sanguanan ni Jehova.+
32 “Daytoy ti linteg para iti agkukutel a saanna a kabaelan nga ipaay dagiti kasapulan a daton inton mapatalgedan a nadalusen.”
33 Kinuna ni Jehova kada Moises ken Aaron:
34 “Inton makadanonkayo idiay Canaan,+ nga itedko kas sanikuayo,+ ket palubosak a makaptan iti sakit a kukutel ti maysa a balay iti dagayo,+
35 daydiay makimbalay masapul nga ibagana iti padi, ‘Adda timmaud a kasla impeksion iti didingko.’
36 Ibilin ti padi a maikkat dagiti nagyan ti balay sakbay nga eksamenenna dayta, tapno saanna nga ipakaammo a narugit ti amin nga adda sadiay. Kalpasanna, sumrek ket kitaenna ti balay.
37 Eksamenenna ti apektado a paset ti balay ket no makitana a dumuyaw a berde wenno lumabaga dayta ken immuneg iti diding,
38 rummuar ti padi ket mapan iti ruangan ti balay sa ipaserrana dayta iti pito nga aldaw.+
39 “Kalpasanna, agsubli ti padi iti maikapito nga aldaw ket eksamenenna ti balay. No nagwaras ti impeksion kadagiti diding,
40 ibilinna a maikkat dagiti naimpektaran a bato ti diding ken maibelleng iti narugit a disso iti ruar ti siudad.
41 Kalpasanna, pakuskosanna a naimbag ti uneg ti balay, ken paibellengna ti naikkat a palitada iti narugit a disso iti ruar ti siudad.
42 Sukatanda dagiti naikkat a bato sa palitadaanda manen ti balay.
43 “Ngem no agparang manen ti impeksion iti balay ken agwaras kalpasan a maikkat dagiti naimpektaran a bato ti diding, makuskosan ti uneg ti balay, ken mapalitadaan manen,
44 sumrek ti padi ket eksamenenna dayta. No nagwaras ti impeksion iti balay, makadadael dayta+ ket maibilang a narugit ti balay.
45 Iparebbana ti balay ket maipan dagiti bato, tarikayo, ken amin a naikkat a palitadana iti narugit a disso iti ruar ti siudad.+
46 Ngem asinoman a sumrek iti balay bayat a nakaserra+ ket maibilang a narugit agingga a lumnek ti init;+
47 ken asinoman nga agidda wenno mangan iti uneg ti balay masapul a labaanna dagiti badona.
48 “Ngem no sumrek ti padi ket makitana a saan a nagwaras ti impeksion iti balay kalpasan a napalitadaan manen, ipakaammo ti padi a nadalusen ti balay ta awanen ti impeksionna.
49 Tapno maikkat ti kinarugit* ti balay, mangala iti dua a billit, sanga ti kayo a sedro, nalabaga a lupot, ken mula a hisopo.+
50 Partienna ti maysa a billit iti ngatuen ti karamba a nakargaan iti danum ti ubbog.
51 Kalpasanna, alaenna ti sanga ti kayo a sedro, mula a hisopo, nalabaga a lupot, ken ti sibibiag a billit sa isawsawna dagita iti dara ti billit a naparti iti ngatuen ti danum a naala iti ubbog. Mamimpito a warsianna+ iti dara ti balay.
52 Ken dalusanna ti kinarugit* ti balay babaen ti dara ti billit, danum manipud iti ubbog, sibibiag a billit, sanga ti sedro, mula a hisopo, ken nalabaga a lupot.
53 Kalpasanna, ibulosna ti sibibiag a billit iti tanap iti ruar ti siudad. Iti kasta, maikkat ti kinarugit* iti balay ket maibilang a nadalus.
54 “Daytoy ti linteg maipapan iti kukutel, impeksion iti kudil ti ulo wenno iti barbas,+
55 kukutel a kimpet iti bado+ wenno balay,+
56 letteg, gaddil, ken marka iti kudil,+
57 tapno maammuan no maibilang a narugit wenno nadalus ti maysa a banag.+ Daytoy ti linteg maipapan iti kukutel.”+
