Levitico 18:1-30
18 Intuloy a kinuna ni Jehova ken ni Moises:
2 “Ibagam kadagiti Israelita, ‘Siak ni Jehova a Diosyo.+
3 Diyo tultuladen dagiti maar-aramid idiay Egipto, a nagnaedanyo, ken diyo tultuladen dagiti maar-aramid idiay Canaan, a pangipanak kadakayo.+ Diyo suroten dagiti kaugalianda.
4 Masapul a tungpalenyo dagiti pangngeddengko ken dagiti paglintegak.+ Siak ni Jehova a Diosyo.
5 Masapul a surotenyo dagiti paglintegak ken dagiti pangngeddengko. Agbiagto ti mangtungpal kadagita.+ Siak ni Jehova a Diosyo.
6 “‘Dikay makidenna iti* asinoman nga asideg a kabagianyo.+ Siak ni Jehova.
7 Dika makidenna ken tatangmo. Dika met makidenna ken nanangmo ta isu ti nanangmo.
8 “‘Dika makidenna iti asawa ni tatangmo,+ ta pakaibabainan dayta ni tatangmo.*
9 “‘Dika makidenna iti kabsatmo a babai, anak man ni tatang wenno nanangmo, nayanak man iti sangakabbalayanyo wenno saan.+
10 “‘Dika makidenna iti apokom a babai, anak man ti anakmo a lalaki wenno babai, ta pakaibabainam dayta.
11 “‘Dika makidenna iti babai a kabsatmo iti ama, ta anak ni tatangmo ken kabsatmo.
12 “‘Dika makidenna iti kabsat a babai ni tatangmo, ta asideg a kabagian+ ni tatangmo.
13 “‘Dika makidenna iti kabsat a babai ni nanangmo, ta asideg a kabagian ni nanangmo.
14 “‘Dika makidenna iti asawa ti kabsat a lalaki ni tatangmo ta pakaibabainanna dayta.* Isu ket antim.+
15 “‘Dika makidenna iti manugangmo a babai,+ ta asawa ti anakmo a lalaki.
16 “‘Dika makidenna iti ipagmo,+ ta pakaibabainan dayta ti kabsatmo.*
17 “‘Dika makidenna iti maysa a babai ken iti anakna a babai+ wenno iti apokona a babai.* Asideg a kabagianna ida. Nagdakes* dayta nga aramid.
18 “‘Dimo alaen ti ipagmo kas maikadua nga asawam+ ken dika makidenna kenkuana bayat a sibibiag ti asawam.
19 “‘Dika makidenna iti maysa a babai bayat ti panagreglana.+
20 “‘Dika makidenna iti asawa ti padam a tao,* ta agbalinka a narugit+ no aramidem dayta.
21 “‘Dimo idaton ken Molek ti asinoman kadagiti annakmo,+ ta pakaibabainan dayta ti nagan ti Dios.+ Siak ni Jehova.
22 “‘Dika makidenna iti padam a lalaki a kas iti pannakidennam iti babai.+ Nagdakes dayta nga aramid.
23 “‘Saan a rumbeng a makidenna ti maysa a lalaki iti animal, ta agbalin a narugit no aramidenna dayta. Saan met a rumbeng a makidenna ti maysa a babai iti animal.+ Makaparurod dayta.
24 “‘Diyo rugitan ti bagiyo iti aniaman kadagitoy nga aramid, ta dagitoy ti makagapu a nagbalin a narugit dagiti nasion a papanawek iti sanguananyo.+
25 Iti kasta, nagbalin a narugit ti daga ket dusaekto dagiti umili gapu kadagiti basolda ken mapapanawdanto iti dagada.+
26 Ngem dakayo ken dagiti ganggannaet a residente,+ masapul a tungpalenyo dagiti paglintegak ken dagiti pangngeddengko,+ ken diyo aramiden ti aniaman kadagitoy a nagdakes nga aramid.
27 Ta amin dagitoy a nagdakes a banag ti ar-aramiden dagiti tattao iti daga nga immun-una a nagnaed ngem dakayo,+ isu a narugiten ti daga.
28 Iti kasta, saankayto a mapapanaw iti daga kas iti pannakapapanaw dagiti nasion nga immun-una ngem dakayo ken nangrugit iti dayta.
29 Mapapatay ti asinoman kadakayo a mangaramid kadagitoy a nagdakes a banag.
30 Masapul a tungpalenyo dagiti bilinko babaen ti saanyo a panangaramid iti aniaman kadagiti nagdakes a kaugalian dagiti tattao nga immun-una ngem dakayo,+ tapno saankayo nga agbalin a narugit. Siak ni Jehova a Diosyo.’”
Footnotes
^ Lit., “lukaisan ti kinalamolamo ti,” ditoy ken kadagiti sumaruno a pagparanganna.
^ Lit., “kinalamolamo dayta ni tatangmo.”
^ Lit., “kinalamolamo dayta ti kabsat ni tatangmo.”
^ Lit., “kinalamolamo dayta ti kabsatmo.”
^ Wenno “Nakababain; Nakaal-alas.”
^ Wenno “anak a babai ti anakna a lalaki wenno babai.”
^ Wenno “ti kaarrubam; ti kaduam.”
