Levitico 22:1-33
22 Kinuna pay ni Jehova ken ni Moises:
2 “Ibagam ken Aaron ken kadagiti annakna a masapul nga agannadda a mangidatag* kadagiti daton dagiti Israelita a pagbalbalinenda a nasantuan para kaniak+ tapno saanda a maibabain ti nasantuan a naganko.+ Siak ni Jehova.
3 Ibagam pay kadakuada, ‘Mapapatayto iti sanguanak ti asinoman a lalaki iti amin a henerasionyo nga umasideg kadagiti nasantuan a banag nga indaton dagiti Israelita ken Jehova bayat a maibilang a narugit dayta a tao.+ Siak ni Jehova.
4 Asinoman a lalaki a kaputotan ni Aaron nga agkukutel+ wenno agparuar ti mabagbagina+ gapu iti sakit ket saan a mabalin a mangan kadagiti nasantuan a banag agingga a maibilang a nadalus,+ uray ti lalaki a nakasagid iti sabali a tao a nagbalin a narugit gapu ta nakasagid iti bangkay ti tao,+ ken ti lalaki a nagparuar iti semilia,+
5 kasta met ti lalaki a nakasagid iti agkarayam a parsua+ wenno tao a maibilang a narugit.+
6 Ti tao a makasagid iti aniaman kadagitoy ket maibilang a narugit agingga a lumnek ti init ken saanna a mabalin ti mangan iti nasantuan a banag. Masapul nga agdigus.+
7 Maibilang a nadalus no limneken ti init, ket mabalinnan ti mangan kadagiti nasantuan a banag, ta taraonna dagita.+
8 Saan met a mangan iti aniaman nga animal a natay wenno rinangrangkay ti atap nga animal tapno saan nga agbalin a narugit.+ Siak ni Jehova.
9 “‘Masapul a tungpalenda dagiti bilinko tapno saanda nga agbasol ken matay gapu ta rinugitanda dagiti nasantuan a banag. Siak ni Jehova a namagbalin kadagita a nasantuan.
10 “‘Maiparit a mangan ti saan nga autorisado* iti aniaman a banag a nasantuan.+ Maiparit met a kanen dayta ti maysa nga estranghero a bisita ti padi wenno ti maysa a matangtangdanan a trabahador.
11 Ngem mabalin a mangan iti dayta ti maysa nga adipen a ginatang ti padi. Mabalin met a makipangan iti taraonna ti amin nga adipen a nayanak iti balayna.+
12 No saan a padi* ti pakiasawaan ti anak a babai ti maysa a padi, saanna a mabalin ti mangan kadagiti nasantuan a kontribusion.
13 Ngem no ti anak a babai ti maysa a padi ket mabalo wenno maidiborsio nga awanan iti anak ken agsubli iti balay ni amana a nagyananna idi ubing pay, mabalinna ti mangan iti taraon ni amana;+ ngem maiparit a mangan iti dayta ti saan nga autorisado.*
14 “‘No di inggagara a nakapangan ti maysa a lalaki iti nasantuan a banag, masapul a mangited iti padi iti nasantuan a daton ken nayonanna iti 20 a porsiento dayta a gatad.+
15 Saanda ngarud a rugitan dagiti nasantuan a banag nga inted dagiti Israelita ken Jehova+
16 tapno saanda a makabasol ken madusa gapu iti pannanganda kadagiti nasantuan a banag; ta siak ni Jehova a namagbalin kadagita a nasantuan.’”
17 Intuloy a kinuna ni Jehova ken ni Moises:
18 “Ibagam ken Aaron, kadagiti annakna, ken iti amin nga Israelita, ‘No ti maysa nga Israelita wenno ganggannaet a residente iti Israel ket mangipaay ken Jehova iti daton a mapuoran+ kas panangtungpalna iti karina wenno kas boluntario a daton,+
19 masapul a nasalun-at a kalakian+ nga urbon a karnero wenno kalding tapno awaten dayta ti Dios.
20 Dikay mangidaton iti aniaman nga adda depektona,+ ta saanto a maawat dayta.
21 “‘No mangipaay ti maysa a tao ken Jehova iti daton a pakikappia+ kas panangtungpalna iti karina wenno kas boluntario a daton, masapul a nasalun-at a baka, karnero, wenno kalding tapno awaten dayta ti Dios. Masapul nga awan depektona.
22 Diyo idaton ti animal a bulsek, natukkol ti tulangna, nasugat, agburtong, aggudgod, wenno agkurad; saankayo a mangipaay ken Jehova iti kasta nga animal ken mangipan kadagita iti altar para ken Jehova.
23 Mabalinyo nga ipaay kas boluntario a daton ti kalakian a baka wenno karnero nga atiddog wenno ababa unay ti maysa a sakana, ngem saan a maawat dayta no maidaton a pangtungpal iti kari.
24 Diyo idaton ken Jehova ti animal a nadadael ti ukel-ukelna wenno nataltal wenno nakapon. Diyo idaton ti kasta nga animal iti dagayo.
25 Diyo idaton ti aniaman kadagitoy nga ited ti maysa a ganggannaet kas daton iti Diosyo, ta narugit ken adda depekto dagitoy. Saanto a maawat dagita.’”
26 Kinuna pay ni Jehova ken ni Moises:
27 “No mayanak ti maysa a baka wenno kalakian a karnero wenno kalding, saan a maisina iti inana iti pito nga aldaw.+ Kalpasan dayta, mabalinen nga ipaay ken Jehova kas daton a mapuoran.
28 Diyo paggiddanen a partien ti baka wenno karnero ken ti urbonda iti maymaysa nga aldaw.+
29 “No mangipaaykayo iti daton ti panagyaman ken Jehova,+ ipaayyo dayta iti umiso a pamay-an tapno awatennakayo.
30 Masapul a makan dayta iti aldaw a pannakaidatonna. Awan koma ti maipabigat.+ Siak ni Jehova.
31 “Masapul a tungpalenyo dagiti bilinko.+ Siak ni Jehova.
32 Diyo ibabain ti nasantuan a naganko,+ ket masapul a maidaydayawak iti tengnga dagiti Israelita.+ Siak ni Jehova a namagbalin kadakayo a nasantuan,+
33 daydiay nangiruar kadakayo idiay Egipto tapno mapaneknekak a siak ti Diosyo.+ Siak ni Jehova.”
Footnotes
^ Lit., “masapul nga isinada ti bagida.”
^ Lit., “estranghero,” kayatna a sawen, saan a miembro ti pamilia ni Aaron.
^ Wenno “No estranghero.”
^ Lit., “estranghero,” kayatna a sawen, saan a miembro ti pamilia ni Aaron.
