Levitico 6:1-30
6 Intuloy a kinuna ni Jehova ken ni Moises:
2 “No adda agbasol ken saan nga agmatalek ken Jehova+ babaen ti panangallilawna iti kaarrubana maipapan iti banag a naitalek wenno naipadulin kenkuana,+ wenno takawan wenno kusitenna ti kaarrubana,
3 wenno adda mabirokanna a napukaw ngem iyulbodna, ken ibagana nga awan basolna,+ kastoy ti rumbeng a mapasamak:
4 No inaramidna dagitoy ken mapaneknekan a nagbasol, masapul nga isublina ti innalana, ti tinakawna, ti kinusitna a naitalek kenkuana, wenno ti banag a nabirokanna,
5 wenno ti aniaman nga inyulbodna, ken masapul a bayadanna+ ti eksakto a gatad dayta, ken mangted pay iti 20 a porsiento dayta a gatad. Itedna dayta iti makinkukua iti aldaw a napaneknekan a nagbasol.
6 Mangted iti padi iti nasalun-at a kalakian a karnero, sigun iti gatad nga ikeddeng ti padi, kas daton gapu iti biddut+ para ken Jehova.
7 Idaton daytoy ti padi ken Jehova tapno maabbongan ti basol dayta a tao ken mapakawan ti aniaman a nagbasolanna.”+
8 Intuloy a kinuna ni Jehova ken ni Moises:
9 “Ibilinmo ken Aaron ken kadagiti annakna, ‘Daytoy ti linteg maipapan iti daton a mapuoran:+ Agtalinaed ti daton a mapuoran iti rabaw ti altar iti agpatnag agingga iti bigat, ken saan a maiddep ti apuy iti altar.
10 Isuot ti padi ti lienso nga opisial a badona+ ken ti lienso a sapinna.+ Ikkatenna dagiti dapo*+ ti daton a napuoran iti rabaw ti altar sa ikabilna iti abay ti altar.
11 Kalpasanna, sukatanna ti opisial a badona+ iti sabali a bado sa ibellengna dagiti dapo iti maysa a nadalus a lugar iti ruar ti kampo.+
12 Kanayon nga adda apuy iti altar ken saan a maid-iddep. Nasken a binigat a sungrodan+ ti padi ken urnosenna ti daton a mapuoran iti rabaw dayta ken puoranna ti taba dagiti daton a pakikappia.+
13 Kanayon nga adda apuy iti altar ken saan a maid-iddep.
14 “‘Daytoy ti linteg maipapan iti daton a bukbukel:+ Dagiti annak ni Aaron ti mangidaton iti dayta ken Jehova iti sanguanan ti altar.
15 Mangrakem ti maysa kadakuada iti napino nga arina a nalaokan iti lana ken amin nga olibano iti daton a bukbukel sa ipuorna iti rabaw ti altar a mangpataud iti makaay-ayo* a banglo kas simbolo ti datonna* ken Jehova.+
16 Kanen ni Aaron ken dagiti annakna ti matedda.+ Makan dayta kas tinapay nga awan lebadurana iti nasantuan a disso, iti paraangan ti tolda a pagkonsultaan.+
17 Maisagana dayta nga awan lebadurana.+ Intedko dayta kas bingayda kadagiti daton a mapuoran.+ Nasantuan unay+ daytoy a kas met laeng iti daton gapu iti basol ken daton gapu iti biddut.
18 Manganto iti dayta ti tunggal lalaki a kaputotan ni Aaron.+ Daytoy ti agnanayon a pannakabingayda manipud kadagiti daton a mapuoran para ken Jehova.+ Maibilang a nasantuan ti amin a maisagid kadagita.’”*
19 Kinuna manen ni Jehova ken ni Moises:
20 “Daytoy ti kanayonto nga idaton ni Aaron ken ti annakna para ken Jehova iti aldaw a madutokanda:*+ apagkapullo ti maysa nga efa*+ ti napino nga arina kas regular a daton a bukbukel,+ kagudua iti bigat ken kagudua iti rabii.
21 Maikkan daytoy iti lana sa mailuto iti daplat a pariok.+ Maiyegto daytoy a nalaokan iti lana ken napispisi sa maidaton kas naluto a tinapay a makaay-ayo* ti banglona ken Jehova.
22 Aramidento dayta ti nadutokan a padi a maysa kadagiti annakna+ a sumukat kenkuana. Daytoy ti regulasion a kanayon a masurot: Masapul a mapuoran nga interamente ti daton para ken Jehova.
23 Mapuoran ti amin a bukbukel nga idaton ti padi ken saan a mabalin a kanen.”
24 Kinuna manen ni Jehova ken ni Moises:
25 “Ibagam ken Aaron ken kadagiti annakna, ‘Daytoy ti linteg maipapan iti daton gapu iti basol:+ Maparti iti sanguanan ni Jehova ti daton gapu iti basol iti disso a pagpartian iti daton a mapuoran.+ Nasantuan unay daytoy.
26 Kanento daytoy ti padi a mangidatag iti daton gapu iti basol.+ Makan daytoy iti nasantuan a disso, iti paraangan ti tolda a pagkonsultaan.+
27 “‘Maibilang a nasantuan ti amin a maisagid iti daton, ken no adda maparsiakan ti badona iti dara ti daton iti nasantuan a disso, masapul a labaanna dayta.
28 Maburak ti banga a pakailutuan dayta. Ngem no maipaburek iti gambang a paglutuan, masapul a makuskosan ti paglutuan ken mabugguan.
29 “‘Kanento daytoy ti tunggal lalaki nga agserserbi kas padi.+ Nasantuan unay+ daytoy.
30 Ngem saan a mabalin a kanen ti daton gapu iti basol no ti dadduma a darana ket naipan iti tolda a pagkonsultaan, iti nasantuan a disso, kas pangabbong iti basol.+ Masapul a mapuoran dayta.
Footnotes
^ Wenno “nataba a dapo,” kayatna a sawen, dapo a nabasa iti taba dagiti daton.
^ Wenno “makapabang-ar.” Lit., “makapakalma.”
^ Wenno “kas pakalaglagipan (mangirepresentar) a paset dayta.”
^ Wenno “kadagiti daton.”
^ Wenno “mapulotanda.”
^ Wenno “makapabang-ar.” Lit., “makapakalma.”
