Levitico 9:1-24
-
Agdaton ni Aaron (1-24)
9 Iti maikawalo nga aldaw,+ inayaban ni Moises ni Aaron ken dagiti annakna ken dagiti panglakayen iti Israel.
2 Kinunana ken Aaron: “Mangalaka iti maysa a nasalun-at nga urbon a baka kas datonmo gapu iti basol+ ken maysa a kalakian a karnero kas datonmo a mapuoran ket idatagmo dagita ken Jehova.
3 Ngem ibagam kadagiti Israelita, ‘Mangalakayo iti maysa a kalakian a kalding kas daton gapu iti basol, maysa a nasalun-at a baka ken maysa a kalakian a karnero nga agtawen iti maysa kas daton a mapuoran,
4 ken maysa a baka ken maysa a kalakian a karnero kas daton a pakikappia,+ ket idatagyo dagita ken Jehova. Mangipaaykayo met iti daton a bukbukel+ a nalaokan iti lana ta agpakita kadakayo ni Jehova ita nga aldaw.’”+
5 Gapuna, impanda dagiti imbilin ni Moises iti tolda a pagkonsultaan. Kalpasanna, immasideg dagiti Israelita ket nagtakderda iti sanguanan ni Jehova.
6 Kinuna ni Moises: “Daytoy ti imbilin ni Jehova nga aramidenyo, tapno maipakita kadakayo ni Jehova ti kinadayagna.”+
7 Kalpasanna, kinuna ni Moises ken ni Aaron: “Umasidegka iti altar ket idatagmo ti datonmo gapu iti basol+ ken ti datonmo a mapuoran tapno maabbongan ti basolmo+ ken ti pamiliam, sa idatagmo ti daton dagiti Israelita+ tapno maabbongan ti basolda+ kas imbilin ni Jehova.”
8 Dagus nga immasideg ni Aaron iti altar ket pinartina ti urbon a baka kas daton gapu iti basolna.+
9 Kalpasanna, inted kenkuana dagiti annakna ti dara+ ket insawsawna ti ramayna iti dayta sa inikkanna iti dara dagiti sara ti altar ken imbukbokna ti natedda a dara iti baba ti altar.+
10 Pinuoran ni Aaron iti rabaw ti altar ti taba, dagiti bato, ken ti taba ti dalem ti daton gapu iti basol, kas imbilin ni Jehova ken ni Moises.+
11 Ngem pinuoranna ti karne ken kudil iti ruar ti kampo.+
12 Kalpasanna, pinarti ni Aaron ti daton a mapuoran ket inted kenkuana dagiti annakna ti dara. Inwarsina dayta iti amin a sikigan ti altar.+
13 Inyawatda kenkuana ti naguduagudua a daton a mapuoran agraman ti ulo, ket pinuoranna dagita iti rabaw ti altar.
14 Binugguanna met dagiti bagis ken gurong sa pinuoranna dagita a kagiddan ti daton a mapuoran iti rabaw ti altar.
15 Kalpasanna, indatagna ti daton dagiti Israelita. Innalana ti kalding a maidaton gapu iti basolda, pinartina dayta sa indatonna kas iti inaramidna iti datonna.
16 Kalpasanna, indatagna ti daton a mapuoran maitunos iti naibilin.+
17 Simmaruno nga indatagna ti daton a bukbukel.+ Nangrakem iti dayta sa pinuoranna iti rabaw ti altar, a karaman ti daton a mapuoran iti bigat.+
18 Pinarti met ni Aaron ti kalakian a baka ken karnero kas daton a pakikappia para kadagiti Israelita. Inted kenkuana dagiti annakna ti dara ket inwarsina iti amin a sikigan ti altar.+
19 No maipapan kadagiti taba ti baka,+ ti nataba nga ipus ti kalakian a karnero, ken ti taba a nangbalkut kadagiti lalaem, dagiti bato, ken ti taba ti dalem,+
20 imparabawda amin dagita kadagiti barukong sa pinuoranna iti rabaw ti altar.+
21 Ngem inlili ni Aaron dagiti barukong ken ti kannawan a luppo kas daton a mailili iti sanguanan ni Jehova, kas naibilin ken Moises.+
22 Simmango ni Aaron kadagiti Israelita ken inngatona dagiti imana ket binendisionanna ida+ sa bimmaba iti altar kalpasan a naidatagna ti daton gapu iti basol, ti daton a mapuoran, ken dagiti daton a pakikappia.
23 Kamaudiananna, simrek da Moises ken Aaron iti tolda a pagkonsultaan ket idi rimmuarda, binendisionanda dagiti Israelita.+
Nakita ti amin nga Israelita ti kinadayag ni Jehova.+
24 Rimmuar ti apuy manipud ken Jehova+ ket nauram ti intero a daton a mapuoran ken dagiti taba iti rabaw ti altar. Idi nakita dayta dagiti Israelita, nagpukpukkawda ket nagruknoyda.+
