Ebanghelio ni Lucas 1:1-80

I-PLAY

Surat para ken Teofilo (1-4)
Imbaga a nasaksakbay ni Gabriel ti pannakayanak ni Juan a Mammautisar (5-25)
Imbaga a nasaksakbay ni Gabriel ti pannakayanak ni Jesus (26-38)
Bisitaen ni Maria ni Elisabet (39-45)
Idaydayaw ni Maria ni Jehova (46-56)
Pannakayanak ni Juan ken panangpanagan kenkuana (57-66)
Padto ni Zacarias (67-80)

1 Katan-okan a Teofilo,+ adun ti nangurnong ken nangisurat iti salaysay maipapan kadagiti pasamak a patientayo nga umiso,+ ² kas iti imbaga kadatayo dagidiay a manipud idi damo ket nakasaksi+ ken nangipakaammo iti mensahe ti Dios.+ ³ Inkeddengko met nga isurat dagita kenka sigun iti panagsasarunoda gapu ta sinukimatko a naimbag amin dagita, ⁴ tapno masiguradom nga umiso dagiti naisuro kenka.+ ⁵ Idi tiempo ni Herodes*+ nga ari ti Judea, adda padi nga agnagan iti Zacarias a miembro ti grupo dagiti papadi nga idadauluan ni Abias.+ Elisabet ti nagan ti asawana manipud iti pamilia ni Aaron. ⁶ Agpadada a nalinteg iti Dios ken awan pakababalawanda ta tungtungpalenda ti amin a bilin ken linteg ni Jehova.* ⁷ Ngem awan anakda ta lupes* ni Elisabet ken baketen, sa lakay metten ni Zacarias. ⁸ Bayat nga ar-aramidenna ti trabahona kas padi iti imatang ti Dios idi batang ti grupona,+ ⁹ sigun iti nakairuaman* dagiti papadi, isu ti napili a sumrek iti santuario ni Jehova*+ a mangidaton iti insienso.+ ¹⁰ Bayat a maidatdaton ti insienso, agkarkararag met ti amin a tattao iti ruar. ¹¹ Nagparang kenkuana ti anghel ni Jehova* a nakatakder iti makannawan ti altar ti insienso. ¹² Nakigtot ni Zacarias iti nakitana ken napabutngan. ¹³ Ngem imbaga ti anghel: “Dika agbuteng, Zacarias, ta nangngeg ti Dios ti panagpakaasim isu a ni Elisabet nga asawam ket aganakto iti lalaki a panaganamto iti Juan.+ ¹⁴ Nakaragragsakkanto ken adunto ti makipagrag-o iti pannakayanakna,+ ¹⁵ ta agbalinto a naindaklan iti imatang ni Jehova.*+ Ngem masapul a saan nga uminum iti arak wenno aniaman a makabartek.+ Ket mapnonto iti nasantuan nga espiritu sakbay pay ti pannakayanakna.*+ ¹⁶ Adunto kadagiti Israelita ti pasublienna ken Jehova* a Diosda.+ ¹⁷ Ti anakmo ket ibaonto ti Dios a nasaksakbay. Addanto kenkuana ti espiritu ken pannakabalin ni Elias+ tapno pagbalinenna ti puso dagiti amma a kas iti puso dagiti annak*+ ket tulonganna dagiti nasukir a maaddaan iti praktikal a sirib ken agaramid iti umiso, tapno pagsaganaenna dagiti tattao para ken Jehova.”*+ ¹⁸ Kinuna ni Zacarias iti anghel: “Kasano a masiguradok dayta? Lakayak ngaminen ken baketen ti asawak.” ¹⁹ Insungbat ti anghel: “Siak ni Gabriel+ nga agtaktakder iti asideg ti Dios,+ ket naibaonak a makisarita kenka ken mangibaga iti daytoy a naimbag a damag. ²⁰ Ngem agumelkanto ken saankanto a makasao agingga a mapasamak dagitoy a bambanag, ta saanmo a pinati ti imbagak a matungpalto iti naikeddeng a tiempo.” ²¹ Kabayatanna, dagiti tattao nga adda iti ruar inur-urayda ni Zacarias, ket nasdaawda ta nakabaybayag idiay santuario. ²² Idi rimmuar, saanen a makapagsao kadakuada isu nga ammoda nga adda nakaskasdaaw* a nakitana iti santuario. Agsensenias lattan gapu ta saanen a makasao. ²³ Idi nalpasen ti nasantuan a panagserbina,* nagawiden idiay balayna. ²⁴ Kalpasan ti sumagmamano nga aldaw, nagsikog ni Elisabet nga asawana, ket saan a rimrimmuar iti balayda iti lima a bulan, ta ibagbagana: ²⁵ “Kastoy ti inaramid kaniak ni Jehova* kadagitoy nga aldaw. Linagipnak tapno maikkat ti pannakaibabainko kadagiti tattao.”+ ²⁶ Idi innem a bulanen ti sikog ni Elisabet, imbaon ti Dios ni anghel Gabriel+ idiay Nazaret a siudad iti Galilea, ²⁷ iti maysa a birhen+ a naikari a mayasawa* iti lalaki nga agnagan Jose, iti pamilia ni David. Maria ti nagan ti balasang.+ ²⁸ Nagparang ti anghel kenkuana ket kinunana: “Naimbag nga aldawmo, sika a naparaburan unay. Adda kenka ni Jehova.”* ²⁹ Ngem maburiboran unay kadagiti imbaga ti anghel ket inkagumaanna a tarusan ti kaipapanan dayta a kablaaw. ³⁰ Isu nga imbaga ti anghel: “Dika agbuteng, Maria, ta pinaraburannaka ti Dios. ³¹ Agsikogkanto, ken mangyanakka iti lalaki,+ ket panaganamto iti Jesus.+ ³² Agbalinto a natan-ok,+ ken maawaganto iti Anak ti Kangatuan,+ ket itedto kenkuana ni Jehova* a Dios ti trono ni David nga amana,+ ³³ ken agnanayonto nga agturay kas Ari iti sangakabbalayan ni Jacob, ken saanto nga agpatingga ti Pagarianna.”+ ³⁴ Ngem imbaga ni Maria iti anghel: “Kasano a mapasamak daytoy idinto ta saanak a makidendenna iti lalaki?”+ ³⁵ Insungbat ti anghel: “Addanto kenka ti nasantuan nga espiritu,+ ket salaknibannakanto ti pannakabalin ti Kangatuan. Gapu iti dayta, ti mayanak nga ubing ket maawaganto iti nasantuan,+ Anak ti Dios.+ ³⁶ Ni Elisabet a kabagiam ket innem a bulanen a masikog, nupay baketen ken agdindinamag a lupes, ³⁷ ta awan ti deklarasion nga imposible iti Dios.”+ ³⁸ Kinuna ni Maria: “Adtoyak nga adipen ni Jehova!* Maaramid koma kaniak ti deklarasionmo.” Kalpasanna, pimmanawen ti anghel. ³⁹ Isu a nagrubbuat ni Maria ken nagdardaras a nagbiahe a napan iti maysa a siudad iti kabambantayan ti Juda. ⁴⁰ Idi nakadanonen iti balay da Zacarias, kinablaawanna ni Elisabet. ⁴¹ Idi nangngeg ni Elisabet ti kablaaw ni Maria, nagkuti ti ubing iti aanakanna, ket napno ni Elisabet iti nasantuan nga espiritu, ⁴² ken impigsana a kinuna: “Naparaburanka iti amin a babbai. Naparaburan met ti sikogmo! ⁴³ Siasinoak koma tapno bisitaennak ti ina ti Apok? ⁴⁴ Ta apaman a nangngegko ti kablaawmo, nagkuti ti ubing iti aanakak gapu iti ragsakna. ⁴⁵ Naragsak met ti babai a namati, ta sigurado a matungpalto dagiti impaibaga kenkuana ni Jehova.”* ⁴⁶ Kinuna ni Maria: “Ti kararuak* idaydayawna ni Jehova,*+ ⁴⁷ ket maragsakanak unay iti Dios a mangisalakan kaniak,+ ⁴⁸ gapu ta nakitana ti kinanumok nga adipenna.+ Manipud ita, ibaganto ti amin a henerasion a naragsakak,+ ⁴⁹ gapu ta nangaramid ti Mannakabalin-amin iti nakaskasdaaw a bambanag para kaniak. Nasantuan ti naganna,+ ⁵⁰ ket kankanayon a kaasianna dagiti agbuteng kenkuana.+ ⁵¹ Inaramidna amin dagita babaen ti nabileg nga imana, inwarawarana dagiti natangsit ti pusoda.+ ⁵² Inikkatna dagiti nabileg nga agtuturay kadagiti tronoda+ ken intan-okna dagiti napakumbaba;+ ⁵³ pinennekna iti nasayaat a bambanag+ dagiti mabisbisin ket pinapanawna nga ima-ima dagiti babaknang. ⁵⁴ Tinulonganna ti Israel nga adipenna, a linaglagipna ti asina,+ ⁵⁵ kas iti imbagana kadagidi ammatayo, ken ni Abraham ken iti kaputotanna*+ iti agnanayon.” ⁵⁶ Nakipagyan ni Maria ken ni Elisabet iti dandani tallo a bulan. Kalpasanna, nagawid idiay balayda. ⁵⁷ Nadanon ti aldaw a naganak ni Elisabet, ket impasngayna ti maysa nga anak a lalaki. ⁵⁸ Nadamag dagiti kaarruba ken kabagianna ti kasta unay nga asi ni Jehova* kenkuana, ket nakipagrag-oda kenkuana.+ ⁵⁹ Immayda idi makugit ti ubing iti maikawalo nga aldaw,+ ket kayatda a panaganan iti Zacarias a kas ken amana. ⁶⁰ Ngem imbaga ti inana: “Saan! Juan ti maipanagan kenkuana.” ⁶¹ Kinunada kenkuana: “Ngem awan met ti kabagianyo a kasta ti naganna.” ⁶² Isu a sineniasanda ti amana no ania ti kayatna a maipanagan iti anakna. ⁶³ Dimmawat iti kayo a pagsuratan sana insurat: “Juan ti naganna.”+ Isu a nasdaawda amin. ⁶⁴ Dagus a nakapagsao manen ni Zacarias,+ ket indaydayawna ti Dios. ⁶⁵ Ket nagbuteng ti amin a kaarrubada. Nagwaras ti damag iti intero a kabambantayan ti Judea. ⁶⁶ Pinampanunot amin dagitoy dagiti nakadamag, ket ibagbagada: “Anianto ngata ti pagbalinan daytoy nga ubing?” Ta adda kenkuana ti pannakabalin ni Jehova.* ⁶⁷ Ket napno iti nasantuan nga espiritu ni Zacarias nga amana. Impadtona: ⁶⁸ “Maidaydayaw koma ni Jehova* a Dios ti Israel,+ ta linagipna dagiti adipenna ken insalakanna ida.+ ⁶⁹ Ket nangpataud iti sara ti pannakaisalakan*+ para kadatayo a sangakabbalayan ni David nga adipenna.+ ⁷⁰ Dayta ti inkarina babaen kadagiti matalek a propetana,+ ⁷¹ nga isalakannatayo kadagiti kabusortayo ken kadagiti manggurgura kadatayo.+ ⁷² Kaasiannatayto kas panangtungpalna iti imbagana kadagidi ammatayo ken laglagipennanto ti nasantuan a tulagna.+ ⁷³ Inkarina dayta ken Abraham nga amatayo.+ ⁷⁴ Kalpasan nga insalakannatayo manipud kadagiti kabusortayo, awanen ti pagbutngantayo a mangipaay iti sagrado a panagserbi kenkuana, ⁷⁵ tapno agbalintayo a napudno ken maaramidtayo ti umiso iti intero a panagbiagtayo. ⁷⁶ Ngem no maipapan kenka, anakko, maawagankanto a propeta ti Kangatuan, ta ibaonnakanto ni Jehova* a nasaksakbay tapno isaganam dagiti dalanna,+ ⁷⁷ tapno ipakaammom iti ilina nga isalakan ida ti Dios babaen ti panangpakawanna kadagiti basolda,+ ⁷⁸ gapu iti ayat ken asina. Gapu iti dayta nga asi, makitatayo ti lawag manipud langit nga agsilnag a kas iti panagsingising ti init, ⁷⁹ a mangsilaw kadagiti agtugtugaw iti kasipngetan ken iti anniniwan ni patay+ ken mangiturong kadagiti sakatayo iti dalan ti talna.” ⁸⁰ Dimmakkel ken pimmigsa ti ubing, ket nagtultuloy a nagyan iti let-ang agingga a dimteng ti tiempo a mapanen kadagiti tattao iti Israel.