Ebanghelio ni Lucas 12:1-59
-
Lebadura dagiti Fariseo (1-3)
-
Agbutengkayo iti Dios, saan nga iti tao (4-7)
-
Panangbigbig iti pannakikaykaysa ken Kristo (8-12)
-
Ilustrasion maipapan iti maag a baknang (13-21)
-
Saankayon a madanagan (22-34)
-
Bassit nga ipastoran (32)
-
-
Kinaridam (35-40)
-
Ti matalek a mayordomo ken ti di matalek a mayordomo (41-48)
-
Saan a talna no di ket panagsisina (49-53)
-
Nasken nga ammuen ti kaipapanan dagiti agdama a pasamak (54-56)
-
Panaginnareglo (57-59)
12 Kabayatanna, naguummong ti rinibu a tattao nga uray la mabaddebaddekanda ti saka ti sabsabali. Kinasarita ni Jesus nga immuna dagiti adalanna: “Agannadkayo iti lebadura dagiti Fariseo, kayatna a sawen, ti panaginsisingpetda.+
2 Ngem awan ti nailemmeng a dinto matakuatan, ken awan ti sekreto a dinto maammuan.+
3 Gapuna, aniaman a sawenyo iti kasipngetan, mangngegto iti lawag, ken aniaman nga iyarasaasyo iti nalimed, maipakaammonto iti tuktok dagiti balay.
4 Maysa pay, ibagak kadakayo gagayyemko,+ saanyo a kabuteng dagidiay mangpapatay iti bagi ken kalpasanna, awanen ti maaramidanda pay.+
5 Ngem ibagak kadakayo no asino ti pagbutnganyo: Agbutengkayo iti Daydiay adda autoridadna a mangpapatay ken mangitapuak idiay Gehenna.*+ Wen, ibagak kadakayo, Daydiay ti pagbutnganyo.+
6 Saan kadi a ti presio ti lima a billit-tuleng ket dua a sinsilio a bassit ti pategna?* Kaskasdi a saan a malipatan* ti Dios ti uray maysa kadakuada.+
7 Ngem ammona uray ti bilang ti buok ti uloyo.+ Dikay agbuteng; napatpategkayo ngem iti adu a billit-tuleng.+
8 “Kunak kadakayo, ti mangbigbig kaniak iti sanguanan dagiti tattao,+ bigbigento met ti Anak ti tao iti sanguanan dagiti anghel ti Dios.+
9 Ngem ti mangilibak kaniak iti sanguanan dagiti tattao, mailibakto met iti sanguanan dagiti anghel ti Dios.+
10 Asinoman nga agsao maibusor iti Anak ti tao ket mapakawan, ngem saanto a mapakawan ti asinoman nga agsao maibusor iti nasantuan nga espiritu.+
11 Inton ipandakayo iti sanguanan dagiti agtataripnong iti publiko,* kadagiti opisial ti gobierno, ken kadagiti autoridad, dikay madanagan no kasano ti panagsaoyo wenno no ania ti ibagayonto kas pangidepensa iti bagiyo,+
12 ta iti dayta met la nga oras, isuronto ti nasantuan nga espiritu dagiti rumbeng nga ibagayo.”+
13 Pagammuan ta imbaga ti maysa kadagiti adda iti bunggoy: “Mannursuro, ibagam iti kabsatko nga ibingayannak iti tawid.”
14 Insungbat ni Jesus: “Asino ti nangdutok kaniak kas ukom wenno mangbingay iti tawidyo nga agkabsat?”
15 Kinunana kadakuada: “Agannadkayo ken liklikanyo ti amin a kita ti kinaagum,+ ta uray no kasano kabaknang ti maysa a tao, ti biagna ket saan nga agdepende kadagiti adda kenkuana.”+
16 Isu a nangestoria kadakuada iti ilustrasion: “Adda idi maysa a baknang a nagadu ti naapitna.
17 Isu a pinampanunotna, ‘Ania ngaruden ti aramidek ita ta awanen ti pagikabilak kadagiti apitko?’
18 Intuloyna, ‘Kastoy ti aramidek:+ Rakrakekto dagiti kamarinko ken mangbangonak iti daddadakkel. Urnongekto idiay ti amin a bukbukel ken amin nga apitko,
19 ket ibagakto iti bagik: “Adun a nasasayaat a banag ti naurnongmo para iti adu a tawen; agnam-ayka, manganka, uminumka, agragragsakka.”’
20 Ngem kinuna ti Dios kenkuana, ‘Maag, ita a rabii, alaendanto ti biagmo.* Asinonto ngarud ti mangtagikua kadagiti inurnongmo?’+
21 Kasta ti mapasamak iti tao nga agurnong iti sanikua para iti bagina, ngem saan a nabaknang iti imatang ti Dios.”+
22 Kinunana kadagiti adalanna: “Isu nga ibagak kadakayo, saankayon a madanagan iti biagyo,* no anianto ti kanenyo wenno pagbadoyo.+
23 Ta napatpateg ti biag* ngem ti taraon ken napatpateg ti bagi ngem ti bado.
24 Kitaenyo dagiti wak: Saanda nga agmula iti bin-i wenno agani; awan met ti kamalig wenno kamarinda; ngem pakpakanen ida ti Dios.+ Saan kadi a napatpategkayo nga amang ngem kadagiti billit?+
25 Asino kadakayo ti makapaatiddog iti biagna iti maysa a kasiko* babaen ti panagdanagna?
26 No saanyo ngarud a kabaelan nga aramiden ti kasta kabassit a banag, apay a pakadanaganyo nga aramiden ti dadduma pay?+
27 Kitaenyo ti panagdakkel dagiti lirio: Saanda nga agtrabaho wenno agaramid iti sinulid; ngem laglagipenyo nga uray nakadaydayag ni Solomon, saan a nakawesan iti kas kapintas ti maysa kadagitoy a sabong.+
28 No kawesan ti Dios iti napintas dagiti mula iti tanap nga adda ita ngem mapuoran inton bigat, nangnangruna a kawesannakayo, dakayo a bassit ti pammatina!
29 Gapuna, saanyon a pakasikoran no ania ti kanen ken inumenyo, ken saankayon nga agdanag unay;+
30 ta dagitoy ti nangnangruna a sapsapulen dagiti tattao iti lubong, ngem ammo ni Amayo a kasapulanyo dagitoy a banag.+
31 Imbes ketdi, itultuloyyo a sapulen ti Pagarianna, ket dagitoy a banag mainayonto kadakayo.+
32 “Dikay agbuteng, bassit nga ipastoran,+ ta pagragsakan ni Amayo nga ited kadakayo ti Pagarian.+
33 Ilakoyo dagiti sanikuayo ket mangtedkayo iti sagut ti asi.*+ Mangisaganakayo kadagiti di marunot a pagkargaan iti kuarta, kayatna a sawen, dagiti di mapukaw a kinabaknang idiay langit,+ a saan a matakaw ken saan a perdien dagiti insekto.
34 Ta no sadino ti ayan ti kinabaknangyo, addanto met sadiay ti pusoyo.
35 “Agrubbuatkayo ken agsaganakayo*+ ket sindianyo dagiti lamparayo.+
36 Agbalinkayo koma a kas kadagiti mangpaspasungad iti panagsubli ti apoda+ manipud iti kasar,+ tapno inton sumangpet ken agtuktok, mailukatda a dagus ti ridaw para kenkuana.
37 Naragsak dagita nga adipen nga iti isasangpet ti apoda makitana ida nga agbambantay! Pudno kunak kadakayo, agisuotto ti apo iti bado ti agserserbi ken pagsadagenna ida iti lamisaan ken makisango tapno serbianna ida.
38 Uray no sumangpet iti maikadua a panagbantay* wenno iti maikatlo,* naragsakda inton masangpetanna ida a nakasagana!
39 Ngem panunotenyo daytoy, no ammo ti bumalay no ania nga oras nga umay ti mannanakaw, dina koma impalubos a maserrek ti balayna.+
40 Masapul ngarud a kanayon a nakasaganakayo met, ta umay ti Anak ti tao iti oras a saanyo nga ipagarup.”+
41 Dinamag ni Pedro: “Apo, para laeng kadi kadakami daytoy nga ilustrasion wenno para iti amin?”
42 Kinuna ti Apo: “Asino a talaga ti matalek a mayordomo,* daydiay masirib, a dutokan ti apona a mangaywan kadagiti adipenna,* tapno kanayon nga ipaayna ti umdas a taraonda iti umiso a tiempo?+
43 Naragsak dayta nga adipen no masangpetan ti apona a kasta ti ar-aramidenna!
44 Ipasiguradok a dutokannanto a mangaywan iti amin a sanikuana.
45 Ngem no ibaga ti adipen iti bagina, ‘Mabayag pay a sumangpet ti apok,’ ket kabilenna dagiti lallaki ken babbai a padana nga adipen, ken mangan ken uminum ken agbartek,+
46 umayto ti apona iti aldaw a saanna a namnamaen ken iti oras a dina ammo, ket dusaennanto iti kakaruan ken ipanna iti ayan dagiti saan a matalek.
47 Dayta nga adipen a makaammo iti kayat ti apona ngem saan a nagsagana wenno saan a nagtulnog* ket mabautto iti mamin-adu.+
48 Ngem daydiay dina ammo ti kayat ti apona, ngem inaramidna dagiti banag a maikari a pakabautanna, bassitto ti bautna. Kinapudnona, no adu ti naited iti maysa a tao, adu met ti manamnama kenkuana, ken no dakkel ti naitalek iti maysa a tao, dakkel met ti manamnama kenkuana.+
49 “Immayak a mangirugi iti apuy ditoy daga, ket ania pay koma ti tarigagayak ta napasgedanen dayta?
50 Kinapudnona, adda pannakabautisar a masapul a pakabautisarak, ket mariribukanak agingga a malpas dayta!+
51 Panagkunayo, immayak kadi a mangyeg iti talna ditoy daga? Kinaagpaysuanna, saan a talna no di ket panagsisina.+
52 Ta manipud ita, masinasinanto ti pamilia a lima ti miembrona, tallo kontra iti dua ken dua kontra iti tallo.
53 Agsisinadanto, ti ama kontra iti anakna a lalaki ken ti anak a lalaki kontra iti amana, ti ina kontra iti anakna a babai ken ti anak a babai kontra iti inana, ti katugangan a babai kontra iti manugangna a babai ken ti manugang a babai kontra iti katuganganna a babai.”+
54 Kalpasanna, imbagana met kadagiti tattao: “No makitayo a napuskol ti ulep iti laud, kunayo a dagus, ‘Adda um-umay a bagyo,’ ket kasta ti mapasamak.
55 Ket no madlawyo nga agpuypuyupoy ti angin ti abagatan, kunayo, ‘Addanto nakaro a pudot,’ ket kasta ti mapasamak.
56 Managinsisingpet! Maibagayo ti kasasaad ti paniempo babaen ti panangkitayo iti daga ken langit, ngem apay a diyo ammo ti kaipapanan dagiti mapaspasamak iti daytoy a tiempo?+
57 Apay a diyo met koma panunoten no ania ti umiso nga aramidenyo?
58 Kas pagarigan, no adda mangidarum kenka ket ipannaka iti korte, ikagumaam ti makiareglo kenkuana bayat nga addakayo pay laeng iti dalan tapno saannan nga idanon ti kasom iti hues, ken tapno saannakan nga iyawat ti hues iti opisial ti korte, ken tapno saannakan nga ibalud ti opisial ti korte.+
59 Laglagipem, dikanto pulos makaruar sadiay agingga a maibayadmo ti maudi a kuartam.”*
Footnotes
^ Wenno “baybay-an.”
^ Wenno mabalin nga, “iti sango dagiti sinagoga.”
^ Wenno “kararuam.”
^ Wenno “kararuayo.”
^ Wenno “kararua.”
^ Lit., “Bariksanyo dagiti lomoyo.”
^ Manipud tengnga ti rabii agingga iti agarup 3:00 ti parbangon.
^ Manipud agarup 9:00 ti rabii agingga iti tengnga ti rabii.
^ Wenno “nga agay-aywan iti balay.”
^ Wenno “kadagiti adipen ti sangakabbalayanna.”
^ Wenno “saanna nga inaramid ti pagayatan ti apona.”
