Ebanghelio ni Lucas 14:1-35
14 Iti maysa pay a Sabbath, napan nakipangan ni Jesus iti balay ti maysa kadagiti lider dagiti Fariseo, ket sinipsiputan dagiti adda sadiay.
2 Adtoy! Adda lalaki nga imbal ti bagina* a napan iti sangona.
3 Isu nga insaludsod ni Jesus kadagiti eksperto iti Linteg ken kadagiti Fariseo: “Maiparbeng kadi ti mangpaimbag iti Sabbath wenno saan?”+
4 Ngem dida nagun-uni. Iti kasta, sinagidna ti lalaki ken pinaimbagna sana pinagawid.
5 Insaludsodna pay: “Asino kadakayo ti saan a dagus a mangaon iti anakna wenno bakana a matnag iti bubon+ iti aldaw ti Sabbath?”+
6 Ket awan ti naisungbatda iti dayta.
7 Nadlawna a pilpilien dagiti bisita dagiti kasayaatan a pagtugawanda+ isu nga imbagana daytoy nga ilustrasion:
8 “No adda nangawis kenka iti kasaran, saanka a mapan agtugaw iti sango.+ Amangan no adda met naawis a natantan-ok ngem sika.
9 Ket inton umasideg ti nangawis kadakayo, ibagananto kenka, ‘Daytoy a tao ti pagtugawem dita tugawmo.’ Mabainankanto ket kapilitan a mapanka agtugaw iti likud.
10 Ngem no maawiska, agtugawka iti likud, tapno inton umay ti nangawis kenka, ibagananto, ‘Gayyem, umayka agtugaw ditoy sango.’ Iti kasta, maidaydayawkanto iti imatang ti amin a padam a bisita.+
11 Ta asinoman a mangitan-ok iti bagina, maipababanto, ket asinoman a mangipababa iti bagina, maitan-okto.”+
12 Kastoy met ti imbaga ni Jesus iti nangawis kenkuana: “No mangisaganaka iti pangngaldaw wenno pangrabii, saanmo nga awisen dagiti gagayyemmo wenno kakabsatmo wenno kakabagiam wenno dagiti nabaknang a kaarrubam. Ta nalabit awisendakanto met kas pangsubadda kenka.
13 Ngem no mangisaganaka iti padaya, awisem dagiti napanglaw, baldado, pilay, bulsek;+
14 ket naragsakkanto, ta awan maisubadda kenka. Ta masubadankanto inton panagungar+ dagiti nalinteg.”
15 Idi mangngeg daytoy ti padana a bisita, kinunana kenkuana: “Naragsak daydiay mangan* idiay Pagarian ti Dios.”
16 Kinuna ni Jesus kenkuana: “Adda tao a nangisagana iti engrande a pangrabii,+ ket adu ti inawisna.
17 Idi orasen ti pannangan, imbaonna ti adipenna a mangayab kadagiti naawis, ‘Umaykayon, ta naisaganan ti amin.’
18 Ngem nagpambarda amin.+ Imbaga kenkuana ti umuna, ‘Adda ginatangko a talon ket masapul a mapanko kitaen. Dispensarem ta diak makaumay.’
19 Kinuna met ti sabali, ‘Gimmatangak iti lima a paris a baka ket mapanko kitaen. Dispensarem ta diak makaumay.’+
20 Adda pay nangibaga, ‘Kakaskasarko isu a diak makaumay.’
21 Idi nagsubli ti adipen, imbagana dagitoy iti apona, isu a nakapungtot ket imbagana iti adipenna, ‘Darasem ti mapan iti dadakkel ken babassit a kalsada iti siudad, ket iyegmo ditoy dagiti napanglaw, baldado, bulsek, ken pilay.’
22 Nagsubli ti adipen ket kinunana, ‘Apo, naaramiden ti imbilinmo ngem adda pay bakante.’
23 Isu a kinuna ti apo iti adipenna, ‘Inka kadagiti dalan ken pagpagnaan ti tattao ket pilitem ida nga umay tapno mapno ti balayko.+
24 Ta ibagak kadakayo nga awan kadagidiay naawis ti makaraman iti insaganak a pangrabii.’”+
25 Adu a tattao ti sumursurot kenkuana isu a sinangona ida ket kinunana:
26 “No adda umay kaniak ket saanna a guraen ti* amana ken ti inana ken ti asawana ken ti annakna ken ti kakabsatna a lallaki ken ti kakabsatna a babbai, wen, ken uray ti mismo a biagna,*+ isu ket saan a makapagbalin nga adalak.+
27 Asinoman a saan a mangawit iti kayona a pagtutuokan* ken sumurot kaniak ket saan a makapagbalin nga adalak.+
28 Kas pagarigan, asino kadakayo ti mayat a mangbangon iti torre ti saan nga agtugaw nga umuna ket kuentaenna ti magastos tapno makitana no adda umanay a pangleppasna?
29 Ta no saan, mabalin a maikabilna ti pundasion ngem dinanto maileppas dayta, ket uyawento ti amin a makakita,
30 nga ibagbagada, ‘Rinugian daytoy a tao ti nagibangon ngem dina kabaelan nga ileppas.’
31 Wenno asino nga ari ti agmarmartsa a makigubat iti sabali nga ari ti saan nga agtugaw nga umuna ken agpabalakad tapno maammuanna no, babaen ti 10,000 a soldadona, ket kabaelanna nga abaken ti kalabanna nga addaan iti 20,000 a soldado?
32 Kinaagpaysuanna, no saan a kabaelan dayta nga ari, mangibaonen iti grupo dagiti embahador bayat nga adayo pay ti kalabanna, tapno kiddawenna nga agkappiada.
33 Iti umasping a pamay-an, masiguradoyo nga awan kadakayo a saan a mangpanaw iti amin a sanikuana ti makapagbalin nga adalak.+
34 “Talaga a nasayaat ti asin. Ngem no tumamnay ti asin, kasanonto pay a mapaapgad dayta?+
35 Awanen ti maitedna iti daga ken saanen a mabalin nga ilaok iti abuno. Ibelleng daytan dagiti tattao. Asinoman nga adda lapayagna a dumngeg, dumngeg koma.”+
Footnotes
^ Sobra ti kaadu ti pluido iti uneg ti bagina.
^ Lit., “mangan iti tinapay.”
^ Wenno “saan a basbassit ti panagayatna iti.”
^ Wenno “kararuana.”
