Ebanghelio ni Lucas 24:1-53
24 Ngem iti umuna nga aldaw ti lawas, nakasapsapada a napan iti tanem,* nga intugotda dagiti insaganada a nabanglo a yerba.+
2 Ngem nakitada a naituliden ti bato a serra ti tanem,*+
3 ket idi simrekda, awanen ti bagi ni Apo Jesus.+
4 Bayat a masmasdaawda, pagammuan ta nagtakder iti abayda ti dua a lallaki a sumilsilap ti badoda.
5 Napalalo ti buteng dagiti babbai isu a nagdumogda, ngem kinuna dagiti lallaki: “Apay a birbirokenyo kadagiti natay daydiay sibibiag?+
6 Awan ditoy ta napagungaren. Lagipenyo ti imbagana kadakayo idi adda pay laeng idiay Galilea,
7 a ti Anak ti tao ket masapul a mayawat kadagiti managbasol ken mailansa iti kayo ken mapagungar iti maikatlo nga aldaw.”+
8 Ket nalagipda dagiti imbaga idi ni Jesus,+
9 isu a pimmanawda iti tanem* ken napanda impadamag amin dagitoy iti Sangapulo ket Maysa ken ti amin nga adalan.+
10 Dagiti napan nagipadamag kadagiti apostol ket da Maria Magdalena, Juana, Maria nga ina ni Santiago, ken ti dadduma pay a babbai a kaduada.
11 Ngem impagarup dagiti apostol nga agar-aramidda laeng iti estoria, isu a saanda a pinati dagiti babbai.
12 Ngem nagtaray ni Pedro a napan iti tanem.* Simmirip ngem dagiti laeng lienso a lupot ti nakitana. Isu a pimmanaw ket masmasdaaw no ania ti napasamak.
13 Ngem iti dayta met la nga aldaw, dua kadagiti adalan ti magmagna nga agturong iti purok ti Emmaus nga agarup pito a milia* manipud Jerusalem.
14 Pagsarsaritaanda ti maipapan kadagitoy amin a banag a napasamak.
15 Bayat nga agsarsaritada, immasideg ni Jesus ket nakikuyog kadakuada,
16 ngem dida nailasin.+
17 Insaludsodna kadakuada: “Ania ti pagsarsaritaanyo bayat a magmagnakayo?” Isu a nagsardengda ken malidlidayanda.
18 Insungbat ti maysa kadakuada nga agnagan Cleopas: “Saanka kadi a taga-Jerusalem ta dimo man la ammo dagiti* mapaspasamak ita sadiay?”
19 Insaludsodna: “Ania a paspasamak?” Insungbatda: “Maipapan ken Jesus a Nazareno.+ Pinaneknekanna nga isu ket maysa a propeta iti imatang ti Dios ken tattao, a nakaskasdaaw dagiti imbaga ken inaramidna;+
20 ken no kasano a nasentensiaan iti ipapatay+ ken nailansa iti kayo gapu iti panangsugsog dagiti panguluen a papadi ken agtuturay.
21 Ngem namnamaenmi idi nga isu daydiay mangisalakan iti Israel.+ Ket malaksid kadagita, maikatlo nga aldaw itan nanipud idi napasamak dagitoy a bambanag.
22 Maysa pay, pinagsiddaawdakami ti dadduma a babbai a kakaduami ta nasapada a napan iti tanem,*+
23 ket saandan a nakita ti bagina. Impadamagda met a nakakitada kadagiti anghel, a nangibaga kadakuada a sibibiagen ni Jesus.
24 Napan met iti tanem* ti dadduma a kakaduami,+ ket napaneknekanda nga agpayso ti imbaga dagiti babbai, ngem saanda a nakita ni Jesus.”
25 Gapuna, kinunana kadakuada: “Dakayo a maag ken nakapuy ti pannakaawatna a di mamati a dagus iti amin nga imbaga dagiti propeta!
26 Saan kadi a nasken a sagabaen ti Kristo dagitoy a banag+ tapno maipadayag?”+
27 Ket inlawlawagna kadakuada ti amin nga adda iti Kasuratan maipapan kenkuana, manipud kadagiti insurat ni Moises ken ti amin a Propeta.+
28 Idi asidegdan iti purok a papananda, impadlaw ni Jesus a kasla ad-adayo pay ti papananna.
29 Ngem inggawidda ket kinunada: “Makidaguska pay la kadakami ta sumipngeten ken dandanin rumabii.” Ket simmurot kadakuada.
30 Bayat a mangmangan* a kaduada, innalana ti tinapay, binendisionanna, pinispisina, sa intedna kadakuada.+
31 Iti kasta, naawatan ken nailasinda nga isu ni Jesus; ngem nagpukaw iti imatangda.+
32 Kinunada iti maysa ken maysa: “Isu met la gayam a natukay ti pusota idi makisarsarita kadata iti dalan, bayat nga inlawlawagna a naimbag kadata dagiti Kasuratan!”
33 Iti dayta met la nga oras, nagrubbuatda sada nagsubli idiay Jerusalem, ket nasangpetanda a naguurnong ti Sangapulo ket Maysa ken ti dadduma pay a kakaduada,
34 nga ibagbagada: “Talaga a napagungaren ti Apo ket nagpakita ken Simon!”+
35 Ket inestoriada dagiti napasamak kadakuada iti dalan ken no kasano a nailasinda ni Jesus idi pinispisina ti tinapay.+
36 Madama nga ibagbagada dagita idi nagparang ni Jesus iti tengngada ket kinunana: “Maadda koma kadakayo ti talna.”+
37 Ngem napalalo ti buteng ken kigtotda ta impagarupda a maysa nga espiritu ti makitkitada.
38 Isu nga imbagana: “Apay a mabutengkayo, ken apay nga agduaduakayo?
39 Kitaenyo dagiti ima ken sakak, siak daytoy; sagidendak ket kitaenyo, ta awan ti lasag ken tulang ti maysa nga espiritu idinto ta adda kaniak kas iti makitayo.”
40 Bayat nga ibagbagana dayta, impakitana kadakuada dagiti ima ken sakana.
41 Ngem gapu ta saanda pay laeng a mamati ta napalalo ti ragsak ken siddaawda, kinunana: “Adda kadi makanyo ditoy?”
42 Ket inikkanda iti maysa a tinuno nga ikan;
43 ken innalana dayta sana kinnan iti sanguananda.
44 Kinunana kadakuada: “Dagitoy ti ibagbagak kadakayo idi agkakaduatayo pay laeng,+ a masapul a matungpal ti amin a naisurat maipapan kaniak iti Linteg ni Moises ken kadagiti Propeta ken kadagiti Salmo.”+
45 Tinulonganna ida a mangtarus a naimbag iti kaipapanan dagiti Kasuratan,+
46 ket kinunana kadakuada: “Kastoy ti naisurat: a masapul nga agsagaba ti Kristo ken mapagungar iti maikatlo nga aldaw,+
47 ket maigapu iti naganna, ti panagbabawi para iti pannakapakawan dagiti basol+ ket maikaskasabanto iti amin a nasion+—mangrugi iti Jerusalem.+
48 Dakayto dagiti saksi kadagitoy a banag.+
49 Ket adtoy! itedko kadakayo ti inkari ni Amak. Ngem agtalinaedkayo pay laeng iti siudad agingga a maawatyo ti pannakabalin manipud iti ngato.”+
50 Ngem inturongna ida agingga idiay Betania, ket inngatona dagiti imana sa binendisionanna ida.
51 Bayat a bembendisionanna ida, pimmanaw ket nayuli idiay langit.+
52 Nagruknoyda kenkuana ken nakaragragsakda a nagsubli idiay Jerusalem.+
53 Ket inaldaw nga addada idiay templo a mangidaydayaw iti Dios.+
Footnotes
^ Wenno “pakalaglagipan a tanem.”
^ Wenno “pakalaglagipan a tanem.”
^ Wenno “pakalaglagipan a tanem.”
^ Wenno “pakalaglagipan a tanem.”
^ Wenno mabalin a, “Sika la kadin ti bisita idiay Jerusalem a saan a makaammo kadagiti?”
^ Wenno “pakalaglagipan a tanem.”
^ Wenno “pakalaglagipan a tanem.”
^ Wenno “agsadsadag iti lamisaan.”
