Ebanghelio ni Marcos 10:1-52
-
Panagasawa ken diborsio (1-12)
-
Bendisionan ni Jesus dagiti ubbing (13-16)
-
Saludsod ti maysa a baknang (17-25)
-
Dagiti isakripisio para iti Pagarian (26-31)
-
Naipakpakauna manen ti ipapatay ni Jesus (32-34)
-
Kiddaw da Santiago ken Juan (35-45)
-
Ni Jesus ti subbot para iti adu a tattao (45)
-
-
Napaimbag ti bulsek a ni Bartimeo (46-52)
10 Pimmanaw iti dayta a lugar ket bimmallasiw iti Jordan sa napan iti pagpatinggaan* ti Judea. Inaribungbongan manen dagiti tattao, ket sinuruanna ida kas iti dati nga ar-aramidenna.+
2 Inasitgan dagiti Fariseo tapno subokenda, ket insaludsodda kenkuana no umiso nga idiborsio ti maysa a lalaki ti asawana.+
3 Insungbatna: “Ania kadi ti imbilin ni Moises kadakayo?”
4 Kinunada: “Impalubos ni Moises ti pannakaaramid ti kasuratan ti panangpapanaw sa idiborsiona ti asawana a babai.”+
5 Ngem kinuna ni Jesus: “Insuratna dayta a bilin gapu iti kinasukiryo.+
6 Ngem idi rugrugi ti panamarsua, ‘Inaramidna ida a lalaki ken babai.+
7 Daytoy ti makagapu a panawanto ti lalaki ti ama ken inana,+
8 ket ti dua agbalinto a maymaysa a lasag,’+ isu a saandan a dua, no di ket maymaysadan a lasag.
9 Gapuna, ti pinagtipon ti Dios, saan koma a pagsinaen ti tao.”+
10 Idi addada manen iti balay, nagsaludsod dagiti adalanna maipapan iti dayta.
11 Kinunana kadakuada: “Asinoman a mangidiborsio ken baketna sa mangasawa iti sabali ket makabasol kenkuana* iti pannakikamalala,+
12 ket no ti maysa a babai idiborsiona ti lakayna, sa makiasawa iti sabali, makabasol iti pannakikamalala.”+
13 Adda dagiti tattao a nangyasideg kadagiti ubbing ken Jesus tapno iparabawna koma ti imana kadakuada, ngem inungtan ida dagiti adalan.+
14 Idi makitana daytoy, dina nagustuan ti inaramidda isu nga imbagana: “Bay-anyo nga umasideg kaniak dagiti ubbing, diyo laplapdan ida, ta para kadagiti kas kadakuada ti Pagarian ti Dios.+
15 Pudno kunak kadakayo, no ti asinoman dina awaten ti Pagarian ti Dios a kas iti panangawat ti maysa nga ubing, dinto pulos makastrek iti dayta.”+
16 Sinaklotna dagiti ubbing ken imparabawna ti imana kadakuada, sana binendisionan ida.+
17 Bayat a pumampanaw, adda lalaki a nagtartaray nga immasideg ken nagparintumeng sa nagsaludsod: “Naimbag a Mannursuro, ania ti masapul nga aramidek tapno agbiagak nga agnanayon?”+
18 Kinuna ni Jesus: “Apay nga awagannak iti naimbag? Awan ti naimbag no di laeng ti Dios.+
19 Ammom dagitoy a bilin, ‘Dika pumatay,+ dika makikamalala,+ dika agtakaw,+ dika agbalin nga ulbod a testigo,+ dika mangsaur,+ dayawem da tatang ken nanangmo.’”+
20 Kinuna ti lalaki: “Mannursuro, tungtungpalekon amin dagita manipud pay idi ubingak.”
21 Kinita ni Jesus ti lalaki ket kinunana kas panagayatna kenkuana: “Adda pay maysa a masapul nga aramidem: Ilakom ti bambanag nga adda kenka sa itedmo kadagiti napanglaw, ket maaddaankanto iti kinabaknang idiay langit. Kalpasanna, umayka ket agbalinka a pasurotko.”+
22 Ngem saan a naragsakan ti lalaki iti imbaga ni Jesus isu a naliday a pimmanaw, ta adu ti sanikuana.+
23 Inwaras ni Jesus ti panagkitana sa imbagana kadagiti adalanna: “Nagrigat ketdin a makastrek iti Pagarian ti Dios dagidiay adda kuartana!”+
24 Ngem nasdaaw dagiti adalan iti imbagana, isu nga imbaga ni Jesus: “Annakko, nagrigat ketdin ti sumrek iti Pagarian ti Dios!
25 Nalaklaka pay a lumsot ti kamelio iti abut ti dagum ngem ti baknang a sumrek iti Pagarian ti Dios.”+
26 Ad-adda manen a nasdaawda iti imbagana, isu a kinunada kenkuana:* “Siasino ngaruden ti maisalakan?”+
27 Pinerreng ida ni Jesus sa imbagana: “Imposible daytoy iti tao ngem saan iti Dios, ta amin a banag ket posible iti Dios.”+
28 Kinuna ni Pedro: “Kitaem! Pinanawanmi ti amin a banag ket sinurotdaka.”+
29 Kinuna ni Jesus: “Pudno kunak kadakayo, asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken iti naimbag a damag,+
30 ket mamin-100 iti daytoy a tiempo ti awatenna a balay, kakabsat a lallaki, kakabsat a babbai, inna, annak, ken taltalon, agraman pannakaidadanes,+ ken iti masanguanan a sistema ti bambanag,* biag nga agnanayon.
31 Ngem adu ti umuna a maudinto ken adu ti maudi nga umunanto.”+
32 Sumangsang-atda idi iti dalan nga agpa-Jerusalem. Immun-una ni Jesus kadakuada isu a nasdaawda, ngem nagbuteng dagiti sumursurot kadakuada. Inyadayona bassit ti Sangapulo ket Dua sana imbaga dagiti dandanin mapasamak kenkuana:+
33 “Sumangsang-attayon idiay Jerusalem, ket mayawatto ti Anak ti tao kadagiti panguluen a papadi ken eskriba. Ikeddengdanto a mapapatay sa iyawatda iti tattao kadagiti nasion,
34 ken pagang-angawan, tupraan, sapliten, ken patayendanto, ngem mapagungarto kalpasan ti tallo nga aldaw.”+
35 Immasideg kenkuana da Santiago ken Juan nga annak ni Zebedeo+ ket kinunada: “Mannursuro, kayatmi nga aramidem ti aniaman a kiddawenmi kenka.”+
36 Imbagana kadakuada: “Ania ti kayatyo nga aramidek para kadakayo?”
37 Insungbatda: “Pagtugawennakami koma iti makannawan ken makannigidmo inton addakan iti nadayag a saadmo.”+
38 Ngem kinuna ni Jesus kadakuada: “Saanyo nga ammo ti kidkiddawenyo. Kabaelanyo kadi ti uminum iti kopa a pagin-inumak wenno mabautisaran iti pakabautisarak?”+
39 Insungbatda: “Kabaelanmi.” Gapuna, kinuna ni Jesus: “Uminumkayto iti kopa a pagin-inumak ken mabautisarankayto iti pakabautisarak.+
40 Ngem saan a siak ti mangpili no siasino ti agtugaw iti makannawan wenno makannigidko, ta para dayta kadagidiay nakaisaganaanna.”
41 Idi nangngeg dayta ti 10 pay nga apostol, nasuronda kada Santiago ken Juan.+
42 Ngem inayaban ida ni Jesus sa kinunana: “Ammoyo a dagidiay maibilbilang* nga agturturay kadagiti nasion dominaranda dagiti iturayanda ken dagidiay natatan-ok usarenda ti autoridadda kadakuada.+
43 Saan a kasta ti aramidenyo. Ngem asinoman a mayat nga agbalin a natan-ok, isu ti agserbi kadakayo,+
44 ken asinoman a mayat nga agbalin a kangrunaan kadakayo, isu ti agbalin nga adipen ti amin.
45 Ta uray ti Anak ti tao immay, saan a tapno pagserbian, no di ket tapno agserbi+ ken itedna ti biagna* kas pangsubbot iti adu.”+
46 Ket nakadanonda idiay Jerico. Ngem idi rumrummuardan agraman ti adu a tattao, ti bulsek nga agpalpalimos a ni Bartimeo (nga anak ni Timeo) ket agtugtugaw idi iti igid ti dalan.+
47 Idi nangngegna a ni Jesus a Nazareno ti lumablabas, impukkawna: “Jesus nga Anak ni David,+ kaasiannak!”+
48 Inungtan ti adu a tattao ken imbagada nga agulimek, ngem inyad-addana pay nga impukkaw: “Anak ni David, kaasiannak!”
49 Nagsardeng ni Jesus ket imbagana: “Ayabanyo.” Isu nga inayabanda ti bulsek, ken kinunada kenkuana: “Papigsaem ti pakinakemmo! Tumakderka ta ay-ayabannaka.”
50 Inikkatna ti kagayna, timmakder a dagus, sa nagdardaras a napan ken Jesus.
51 Dinamag ni Jesus: “Ania ti kayatmo nga aramidek kenka?” Insungbat ti bulsek: “Rab·boʹni,* pagsubliem koma ti panagkitak.”
52 Imbaga ni Jesus: “Inkan. Pinaimbagnaka ti pammatim.”+ Dagus a nakakita+ ket simmurot kenkuana.
Footnotes
^ Wenno “beddeng.”
^ Kayatna a sawen, ti immuna nga asawana.
^ Wenno mabalin nga, “iti maysa ken maysa.”
^ Wenno “mabigbigbig.”
^ Wenno “kararuana.”
^ Kaipapananna, “Mannursuro.”
