Ebanghelio ni Marcos 12:1-44
12 Inrugina ti nakisarita kadakuada babaen kadagiti ilustrasion: “Adda tao a nagmula kadagiti ubas iti talonna.+ Inaladanna dayta ken nangaramid iti tangke para iti pagpespesan iti ubas ken nangipatakder iti torre.+ Kalpasanna, impaabangna dayta kadagiti makitaltalon sa napan iti sabali a pagilian.+
2 Idi panagbuburasen, nangibaon iti adipenna a mapan kadagiti makitaltalon tapno alaenna ti bingayna a bunga ti ubas.
3 Ngem tiniliw ken kinabkabilda sada pinapanaw nga ima-ima.
4 Nangibaon manen iti sabali pay nga adipen, ngem pinang-orda ti ulona ken pinabpabainanda.+
5 Nangibaon iti sabali pay ngem pinatayda. Adu pay ti simmaruno nga imbaonna ngem adda dagidiay kinabkabilda ken adda dagidiay pinatayda.
6 Maysa laengen ti nabati, ti dungdungnguenna nga anak.+ Isu ti naudi nga imbaonna ta kinunana, ‘Raemendanto ti anakko.’
7 Ngem imbaga dagiti makitaltalon iti maysa ken maysa: ‘Daytoy ti agtawid.+ Umaykayo ket patayentayo tapno kukuatayton ti tawidna.’
8 Isu a tiniliw ken pinatayda sa inruarda iti kaubasan.+
9 Anianto ti aramiden ti makinkukua iti kaubasan? Umayto ket patayenna dagiti makitaltalon ken itedna ti kaubasanna iti sabsabali.+
10 Diyo kadi pulos nabasa daytoy a kasuratan, ‘Ti bato nga imbelleng dagiti agibangbangon ket nagbalin a kangrunaan a bato a pasuli.*+
11 Naggapu daytoy ken Jehova,* ket nakaskasdaaw dayta kadatayo’?”+
12 Naawatanda nga isuda ti pampanunotenna idi imbagana ti ilustrasion isu a kayatda a tiliwen. Ngem gapu ta mabutengda kadagiti tattao, binaybay-anda ken pinanawanda.+
13 Kalpasanna, imbaonda kenkuana ti dadduma a Fariseo ken sumupsuporta ken Herodes, tapno mapagsaoda ni Jesus iti pangtiliwanda kenkuana.+
14 Idi simmangpetda, kinunada: “Mannursuro, ammomi a napudnoka, saanka a mangidumduma, ta saan a ti kasasaad ti panagbiag dagiti tattao ti kitkitaem, no di ket isursurom ti kinapudno maipapan iti pagayatan ti Dios. Umiso* kadi ti agbayad iti buis* ken Cesar wenno saan?
15 Masapul kadi nga agbayadkami, wenno saan?” Gapu ta nadlawna ti panaginsisingpetda, kinunana: “Apay a subsubokendak? Ipakitaandak iti denario.”*
16 Inyawatanda ket insaludsodna: “Makinladawan ken makinnagan iti daytoy?” Insungbatda: “Ni Cesar.”
17 Imbaga ngarud ni Jesus: “Itedyo ken Cesar dagiti kukua ni Cesar,+ ngem itedyo iti Dios dagiti kukua ti Dios.”+ Ket nagsiddaawda kenkuana.
18 Napan kenkuana dagiti Saduceo a saan a mamati iti panagungar+ ket insaludsodda:+
19 “Mannursuro, insurat kadatayo ni Moises a no matay ti maysa a lalaki ken saan a naaddaan iti anak, ti kabsatna a lalaki ti masapul a mangasawa iti nabalo nga ipagna tapno maaddaan iti anak ti natay a lalaki.+
20 Adda pito nga agkakabsat a lallaki. Nangasawa ti inauna, ngem natay nga awan putotna.
21 Isu nga inasawa ti maikadua, ngem natay met nga awan ti putotna. Kasta met laeng ti napasamak iti maikatlo.
22 Natayda amin a pito nga agkakabsat nga awan putotda. Kamaudiananna, natay met ti babai.
23 Inton panagungar, makin-asawa iti babai? Ta nagbalin nga asawana ti pito nga agkakabsat.”
24 Kinuna ni Jesus: “Saan kadi a daytoy ti rason a nagkamalikayo, ta diyo maawatan ti Kasuratan wenno ti pannakabalin ti Dios?+
25 Ta inton agungarda, saanto a mangasawa dagiti lallaki wenno makiasawa dagiti babbai, no di ket kasladanto kadagiti anghel idiay langit.+
26 Ngem no maipapan iti panagungar, saanyo kadi a nabasa iti libro ni Moises, maipapan iti siitan a bassit a kayo, nga imbaga ti Dios kenkuana: ‘Siak ti Dios ni Abraham ken Dios ni Isaac ken Dios ni Jacob’?+
27 Isu ket Dios, saan a dagiti natay, no di ket dagiti sibibiag. Nagdakkel dayta a kamaliyo.”+
28 Adda eskriba nga immay ket nangngegna ti panagsusupiatda, ken ti nasayaat a panangsungbat ni Jesus isu nga insaludsodna: “Ania ti umuna* kadagiti amin a bilin?”+
29 Insungbat ni Jesus: “Ti umuna ket, ‘Denggem, O Israel, ni Jehova* a Diostayo ket maymaysa a Jehova,*
30 ket masapul nga ayatem ni Jehova* a Diosmo iti amin a pusom ken amin a kararuam* ken amin a panunotmo ken amin a pigsam.’+
31 Ti maikadua ket, ‘Masapul nga ayatem ti kaarrubam a kas iti bagim.’+ Awanen ti sabali a bilin a napatpateg ngem kadagitoy.”
32 Kinuna ti eskriba: “Mannursuro, nagsayaat ti imbagam, maitunos iti kinapudno, ‘Maymaysa ti Dios, ken awanen ti sabali malaksid kenkuana’;+
33 ken ti panagayat iti Dios iti amin a puso, amin a pannakaawat, ken amin a pigsa, ken ti panagayat ti maysa iti kaarrubana a kas iti bagina, ket adayo a napatpateg ngem iti amin a kita ti daton.”*+
34 Nadlaw ni Jesus a husto ti insungbat ti eskriba isu a kinunana: “Saanka nga adayo iti Pagarian ti Dios.” Ngem awanen ti nakaitured a nagsaludsod pay kenkuana.+
35 Ngem bayat a mangisursuro ni Jesus idiay templo, kinunana: “Apay nga ibagbaga dagiti eskriba a ti Kristo ket anak ni David?+
36 Babaen iti nasantuan nga espiritu,+ kinuna ni David, ‘Imbaga ni Jehova* iti Apok: “Agtugawka iti makannawanko agingga nga ikabilko dagiti kabusormo iti baba dagiti sakam.”’+
37 No Apo ti awag kenkuana ni David, kasano ngarud a nagbalin ti Kristo nga anak ni David?”+
Maragragsakan a dumdumngeg kenkuana ti adu a tattao.
38 Bayat a mangisursuro, kinunana: “Agannadkayo kadagiti eskriba a pagaayatda ti magmagna a nakabado iti nagayad ken makablaawan kadagiti pagtagilakuan+
39 ken ti makinsango* a tugaw kadagiti sinagoga ken dagiti tugaw a nairanta kadagiti natan-ok a bisita kadagiti piesta.+
40 Al-alaenda ti amin a sanikua* dagiti balo a babbai, ken ipakpakitada nga agkarkararagda iti atiddog.* Nakarkaronto* ti dusada.”
41 Nagtugaw iti asideg dagiti pagitinnagan* iti kontribusion+ ket pinaliiwna dagiti tattao bayat nga agipispisokda iti kuarta. Adu a babaknang ti agipispisok iti adu a sinsilio.+
42 Immay ti maysa a napanglaw a balo a babai ket nangitinnag iti dua a babassit a sinsilio a nakabasbassit ti pategna.*+
43 Isu nga inayabanna dagiti adalanna sana kinuna: “Pudno kunak kadakayo, ad-adu ti impisok daytoy napanglaw a balo ngem iti amin a nagipisok iti kuarta kadagiti pagitinnagan iti kontribusion.+
44 Ta tedtedda laeng ti impisokda. Ngem ti balo, nupay napanglaw, impisokna ti amin nga adda kenkuana, ti amin a pagbiagna.”+
Footnotes
^ Lit., “nga ulo iti nagsulian.”
^ Wenno “Nainkalintegan.”
^ Kayatna a sawen, buis ti kada tao.
^ Wenno “kapatgan.”
^ Wenno “daton a mapuoran ken daton nga animal.”
^ Wenno “kasayaatan.”
^ Lit., “Al-alun-onenda ti balbalay.”
^ Wenno “aginsasantoda.”
^ Wenno “Nadagdagsento.”
^ Wenno “pagikargaan.”
