Ebanghelio ni Marcos 15:1-47
15 Apaman a pimmarbangon, nagtutulag dagiti panguluen a papadi ken panglakayen ken eskriba ken ti intero a Sanhedrin, ket ginalutanda dagiti ima ni Jesus sa impanda ken Pilato.+
2 Gapuna, insaludsod ni Pilato: “Sika kadi ti Ari dagiti Judio?”+ Insungbatna: “Sika a mismo ti nangibaga iti dayta.”+
3 Ngem adu ti ipabpabasol kenkuana dagiti panguluen a papadi.
4 Insaludsod manen ni Pilato: “Awan kadi ti maibagam?+ Kitaem, nagadu ti ipabpabasolda kenka.”+
5 Ngem saan latta a simmungbat ni Jesus isu a nasdaaw ni Pilato.+
6 Tunggal piesta, nakaugalianna ti mangwayawaya iti maysa a balud a kiddawen dagiti tattao.+
7 Iti dayta a tiempo, adda lalaki nga agnagan Barabas a naibalud a kadua dagiti nakapapatay bayat ti panagrebeldeda iti gobierno.
8 Napan dagiti tattao ken Pilato ket kiniddawda a patganna manen ti dawatda kas iti dati nga ar-aramidenna.
9 Insaludsod ni Pilato: “Kayatyo kadi a wayawayaak ti Ari dagiti Judio?”+
10 Ta ammo ni Pilato nga apal ti makagapu a dagiti panguluen a papadi inyawatda ni Jesus kenkuana.+
11 Ngem sinugsogan dagiti panguluen a papadi dagiti tattao a ni Barabas laengen ti wayawayaanna.+
12 Inulit nga imbaga ni Pilato: “Ania ngarud ti aramidek iti aw-awaganyo nga Ari dagiti Judio?”+
13 Impukkawda manen: “Ibitaymo iti kayo!”+
14 Ngem kinuna kadakuada ni Pilato: “Apay? Ania ti dakes nga inaramidna?” Ngem inyad-addada nga impukkaw: “Ibitaymo iti kayo!”+
15 Gapu ta kayat ni Pilato a pagustuan dagiti tattao, winayawayaanna ni Barabas. Ket kalpasan a pinasaplitna ni Jesus,+ inyawatna kadagiti soldado tapno maibitay iti kayo.+
16 Impan dagiti soldado iti paraangan ti pagtaengan ti gobernador, sada inayaban ti amin a soldado.+
17 Ket kinagayanda iti purpura a lupot ken nangaramidda iti korona a sisiit ket inkabilda iti ulona;
18 sada inkablaaw: “Agbiagka,* Ari dagiti Judio!”+
19 Pinakpak-olanda met ti ulona iti runo ken tinuptupraanda, sada nagparintumeng ken nagindudumog* kenkuana.
20 Idi nalpasdan a nagang-angawan, inikkatda ti purpura a kagayna ken insuotda kenkuana ti makinruar a badona, sa inruarda tapno mailansa iti kayo.+
21 Nasabatda ni Simon a taga-Cirene, ti ama da Alejandro ken Rufo. Naggapu ni Simon iti away ket pinilitda a mangawit iti kayo a pagtutuokan* ni Jesus.+
22 Ket impanda iti lugar a maaw-awagan Golʹgo·tha, kayatna a sawen, no maipatarus, “Lugar ti Bangabanga.”+
23 Sadiay a pinadasda nga ikkan iti arak a nalaokan iti mirra,+ ngem dina inawat.
24 Ket inlansada iti kayo ken nagbibingayanda dagiti makinruar a badona babaen ti binnunot tapno maammuan no asino ti mangala kadagita.+
25 Iti agarup alas nuebe ti bigat,* inlansada ni Jesus iti kayo.
26 Daytoy ti naisurat a pammabasol kenkuana: “Ti Ari Dagiti Judio.”+
27 Inlansada met iti kayo ti dua a mannanakaw iti abayna, maysa iti kannawanna ken maysa iti kannigidna.+
28 * ——
29 Uy-uyawen dagiti lumablabas ken agwingwingiwingda+ nga ibagbagada: “O ania! Sika a mangrebba iti templo sa bangonem iti tallo nga aldaw,+
30 isalakanmo ta bagim ket umulogka iti kayo a pagtutuokan.”*
31 Nagang-angawan met dagiti panguluen a papadi agraman dagiti eskriba ket kinunada: “Insalakanna ti dadduma ngem dina maisalakan ti bagina!+
32 Umulog koma ti Kristo nga Ari ti Israel manipud iti kayo a pagtutuokan* tapno makitami ket mamatikami.”+ Linalais met uray dagidiay nailansa iti abayna.+
33 Idi agarup alas dose ti aldaw,* simmipnget ti intero a lugar agingga iti agarup alas tres ti malem.*+
34 Ket iti agarup alas tres ti malem,* impukkaw ni Jesus: “Eʹli, Eʹli, laʹma sa·bach·thaʹni?” a ti kayatna a sawen, no maipatarus ket: “Diosko, Diosko, apay a binaybay-annak?”+
35 Nangngeg dayta ti dadduma nga agtaktakder iti asideg ket kinunada: “Denggenyo! Ay-ayabanna ni Elias.”
36 Idi kuan, adda nagtaray a napan nangala iti espongha. Insawsawna dayta iti naalsem nga arak ken inkabilna iti maysa a runo sa intedna ken Jesus tapno inumenna.+ Kinunana: “Bay-anyo! Kitaentayo man no umay ni Elias a mangyulog kenkuana.”
37 Ngem nagikkis ni Jesus ket nauyosen ti biagna.*+
38 Ket napisang ti kortina ti santuario+ manipud ngato nga agpababa.+
39 Ti opisial ti armada nga agtaktakder iti sanguanan nakitana dagiti pasamak idi mauyos ti biag ni Jesus, isu a naibagana: “Talaga a daytoy a tao ti Anak ti Dios.”+
40 Agbuybuya met iti saan unay nga adayo dagiti babbai, a pakairamanan ni Maria Magdalena, kasta met ni Maria nga ina da Santiago a Bassit ken Joses, ken ni Salome,+
41 a kimmuykuyog ken nagserserbi kenkuana+ idi adda idiay Galilea, ken ti adu pay a babbai a kaduana a simmang-at iti Jerusalem.
42 Idi mumalemen, gapu ta tiempo idi ti Panagsagana, kayatna a sawen, ti aldaw sakbay ti Sabbath,
43 immay ni Jose a taga-Arimatea, a mararaem a miembro ti Konseho, ken ur-urayenna ti Pagarian ti Dios. Inturturedna ti napan ken Pilato ket kiniddawna ti bangkay ni Jesus.+
44 Ngem agduadua ni Pilato no talaga a natayen ni Jesus, isu nga inayabanna ti maysa nga opisial ti armada ket sinaludsodna no natayen ni Jesus.
45 Idi napaneknekanna iti opisial ti armada, intednan ken Jose ti bangkay.
46 Kalpasan a gimmatang ni Jose iti dekalidad a lienso a lupot ken naibabana ti bangkay, binalkutna iti lupot sana inkabil iti tanem*+ iti uneg ti dakkel a bato. Kalpasanna, nangitulid iti dakkel a bato a pinangserrana iti tanem.+
47 Ngem kitkitaen idi da Maria Magdalena ken ni Maria nga ina ni Joses ti nakaitaneman ni Jesus.+
Footnotes
^ Wenno “Madaydayawka.”
^ Wenno “naginruruknoy.”
^ Lit., “maikatlo nga oras.”
^ Lit., “maikanem nga oras.”
^ Lit., “maikasiam nga oras.”
^ Lit., “maikasiam nga oras.”
^ Wenno “nagsaten ti angesna.”
^ Wenno “pakalaglagipan a tanem.”
