Ebanghelio ni Mateo 17:1-27
17 Innem nga aldaw kalpasanna, inkuyog ni Jesus da Pedro, Santiago, ken Juan a kabsatna ket napanda iti nangato a bantay nga is-isuda.+
2 Ket nagbalbaliw ti langana iti sanguananda. Rimmaniag ti rupana a kas iti init ken rimmangrang* ti makinruar a badona a kas iti lawag.+
3 Adtoy! Nagparang met kadakuada da Elias ken Moises, ket nakisarsaritada kenkuana.
4 Kinuna ni Pedro ken ni Jesus: “Apo, maragsakankami unay ta addakami ditoy. No kayatyo, ibangonankayo ditoy iti tallo a tolda, maysa para kenka, maysa para ken Moises, ken maysa para ken Elias.”
5 Bayat nga agsasao, adda naraniag nga ulep a nanglinong kadakuada ket adda timek a nagsao manipud iti ulep: “Daytoy ti Anakko a dungdungnguek, a pakaragsakak.+ Dumngegkayo kenkuana.”+
6 Idi nangngeg daytoy dagiti adalan, nagpakleb ken nagbutengda iti kasta unay.
7 Immasideg ni Jesus ket sinagidna ida ken kinunana: “Tumakderkayo. Dikay agbuteng.”
8 Idi timmangadda, awan ti sabali a nakitada no di laeng ni Jesus.
9 Idi sumalsalogdan iti bantay, imbilin ni Jesus: “Saanyo nga ibagbaga iti asinoman ti nakitayo a sirmata agingga a mapagungar ti Anak ti tao.”+
10 Ngem insaludsod dagiti adalanna: “Apay ngarud nga ibagbaga dagiti eskriba a masapul nga umay nga umuna ni Elias?”+
11 Insungbatna: “Kinapudnona, umay ni Elias ken isublinanto ti amin a banag.+
12 Ngem ibagak kadakayo, immayen ni Elias ngem saanda a nailasin no di ket inaramidda kenkuana ti amin a kaykayatda.+ Kastanto met laeng ti panangparigatda iti Anak ti tao.”+
13 Natarusan dagiti adalan a ni Juan a Mammautisar ti tuktukoyenna.
14 Idi napanda iti ayan ti adu a tattao,+ adda immasideg a lalaki sa nagparintumeng ken kinunana:
15 “Apo, maasianka iti anakko a lalaki, ta agkissiw ken masakit. Masansan a matnag iti apuy ken iti danum.+
16 Impanko kadagiti adalam, ngem saanda a napaimbag.”
17 Insungbat ni Jesus: “Dakayo nga awanan pammati ken dakes a henerasion,+ kasano pay kabayag a masapul a makikaduaak kadakayo? Kasano pay kabayag nga an-anusankayo? Iyegyo kaniak ti ubing.”
18 Imbilin ni Jesus a rummuar ti demonio, ket dagus nga immimbag ti ubing iti dayta nga oras.+
19 Kalpasanna, immasideg ken Jesus dagiti adalanna ket dinamagda: “Apay a saanmi a naparuar ti demonio?”
20 Insungbatna: “Gapu ta bassit ti pammatiyo. Pudno kunak kadakayo, no adda pammatiyo a kas kabassit ti bukel ti mustasa, mabalinyo nga ibaga iti daytoy a bantay, ‘Umaliska, mapanka sadiay,’ ket umalis dayta. Awanto ti saanyo a kabaelan nga aramiden.”+
21 * ——
22 Idi naguummong dagiti adalan idiay Galilea, kinuna ni Jesus kadakuada: “Matraidorto ti Anak ti tao iti ima dagiti bumusbusor kenkuana,+
23 ket patayendanto, ngem mapagungar iti maikatlo nga aldaw.”+ Kasta unay ti ladingit dagiti adalanna.
24 Idi nakadanonda idiay Capernaum, immasideg ken Pedro dagiti lallaki nga agsingsingir iti buis a dua a drakma* ket kinunada: “Agbaybayad met kadi iti buis a dua a drakma ti mannursuroyo?”+
25 Insungbatna: “Wen.” Ngem idi simrek iti balay, kinasarita ni Jesus nga is-isuna ket kinunana: “Panagkunam, Simon, paggapgapuan ti nagduduma a buis a maaw-awat dagiti ari ditoy daga? Kadagiti annakda wenno kadagiti sabsabali?”
26 Insungbat ni Pedro: “Kadagiti sabsabali.” Imbaga ni Jesus: “Saan ngarud nga agbayad dagiti annak iti buis.
27 Ngem tapno saanda a maitibkol,+ mapanka agbanniit idiay baybay ken ungapem ti ngiwat ti ikan nga umuna a mabanniitam ket makakitakanto iti pirak a sinsilio.* Alaem dayta sa bayadam ti buista.”
Footnotes
^ Wenno “pimmuraw.”
