Oseas 1:1-11
1 Ti mensahe ni Jehova ken Oseas* nga anak ni Beeri idi kaaldawan da Uzias,+ Jotam,+ Ahaz,+ ken Ezekias+ nga ar-ari ti Juda,+ ken idi kaaldawan ni Jeroboam+ nga anak ni Joas+ nga ari ti Israel.
2 Idi irugi ni Jehova a kasarita ni Oseas, imbaga ni Jehova kenkuana: “Mangasawaka iti babai nga agbalangkantis* ket maaddaankayto iti annak gapu iti panagbalangkantisna,* ta timmallikud ken Jehova dagiti tattao iti daga gapu iti panagbalangkantis.”*+
3 Isu nga inkasarna ni Gomer a balasang ni Diblaim, ket nagsikog ken naganak iti lalaki.
4 Kinuna ni Jehova ken Oseas: “Panaganam iti Jezreel,* ta asidegen a singirek ti sangakabbalayan ni Jehu+ gapu kadagiti panangpapatay a naaramid iti Jezreel, ket pagpatinggaekto ti pagarian ti Israel.+
5 Iti dayta nga aldaw, tukkolekto ti pana ti Israel idiay Tanap* ti Jezreel.”
6 Nagsikog manen ket naganak iti babai. Kinuna ti Dios ken Oseas: “Panaganam iti Lo-ruhama,* ta diakton kaasian+ dagiti tattao ti Israel, ta sigurado a papanawekto ida.+
7 Ngem kaasiakto dagiti tattao ti Juda,+ ket isalakankonto ida, siak ni Jehova a Diosda;+ diakto agusar iti pana wenno espada wenno gubat wenno kabkabalio wenno kumakabalio a mangisalakan kadakuada.”+
8 Idi impusotna* ni Lo-ruhama, nagsikog manen ket naganak iti lalaki.
9 Kinuna ti Dios: “Panaganam iti Lo-ammi,* ta saanto a dakayo ti tattaok ken saanto a siak ti Diosyo.
10 “Ngem umadunto ti bilang dagiti tattao* iti Israel a kas kadagiti darat iti baybay a saan a marukod wenno mabilang.+ Ken iti lugar a nakaibagaan kadakuada iti ‘Saan a dakayo ti tattaok,’+ maibaganton kadakuada, ‘Dakayo ti annak ti sibibiag a Dios.’+
11 Agkaykaysanto dagiti tattao iti Juda ken iti Israel.+ Mangpilidanto iti maysa a panguloda ken rummuarda a pumanaw iti pagilian, ket napategto dayta nga aldaw iti Jezreel.+
Footnotes
^ Napaababa a porma ti Osaias, a ti kayatna a sawen ket “Insalakan ni Jah; Nangisalakan ni Jah.”
^ Wenno “agaramid iti immoralidad.”
^ Wenno “panagaramid iti immoralidad.”
^ Wenno “panagaramid iti immoralidad.”
^ Kaipapananna, “Agimulanto ti Dios iti Bin-i.”
^ Wenno “Kapatagan.”
^ Kaipapananna, “Saan a Nakaasian.”
^ Wenno “impusingna.”
^ Kaipapananna, “Saanko a Tattao.”
^ Lit., “annak a lallaki.”
