Oseas 10:1-15
10 “Ti Israel ket nabaybay-an* nga ubas nga agbungbunga latta.+
Bayat nga umad-adu ti bungana, umad-adu met dagiti altarna;+Bayat nga umad-adu ti nasayaat nga apit iti dagana, pumimpintas met dagiti sagrado nga adigina.+
2 Managinsisingpet* ti pusoda;Maammuanto a nakabasolda.
Addanto mangburak kadagiti altarda ken mangdadael kadagiti adigida.
3 Kunadanto, ‘Awan ti aritayo+ ta ditay nagbuteng ken Jehova.
Ken ania koma ti maitulong kadatayo ti ari?’
4 Agkari, agsapata,+ ken makitulagda ngem dida tungpalen;Isu a nasaknap ti kinaawan hustisia a kas iti makasabidong a ruot iti mamulmulaan a talon.+
5 Madanaganto dagiti umili ti Samaria iti mapasamak iti rebultoda nga urbon a baka idiay Bet-aven.+
Sangitanto dayta dagiti tattaonaKen dagiti papadi ti ulbod a dios a maragragsakan idi iti dayta ken iti kinadayagna,Ta maipanawto dayta kadakuada.
6 Maipanto idiay Asiria a kas regalo iti naindaklan nga ari.+
Maibabainto ti Efraim,Ket mabainto ti Israel gapu iti sinurotna a balakad.+
7 Sigurado a madadaelto* ti Samaria ken ti arina,+Kas iti natukkol a saringit a tumtumpaw iti danum.
8 Madadaelto dagiti nangato a disso ti Bet-aven+ a makagapu iti panagbasol ti Israel.+
Agtubonto ti siitan a mulmula ken kalkalunay kadagiti altarda.+
Ibaganto dagiti tattao kadagiti bantay, ‘Gaburandakami!’
Ken kadagiti turod, ‘Tupakandakami!’+
9 O Israel, nagbasolka manipud idi kaaldawan ti Gibea.+
Intultuloyda sadiay ti di umiso nga aramidda.
Saan nga inkisap* ti gubat dagiti dakes a tattao idiay Gibea.
10 Disiplinaekto met ida inton pagayatak.
Ket agtitiponto dagiti ili a bumusor kadakuadaInton maigalut kadakuada ti dua a basolda.*
11 Ti Efraim ket maysa a kabaian a baka a nasanay ken natulnog nga agirik,Isu a sinalaknibak ti napintas a tengngedna.
Addanto ipasakayko* iti Efraim.+
Agaradonto ti Juda; agsuyodto ti Jacob para kenkuana.
12 Agmulakayo iti kinalinteg tapno agapitkayo iti napudno nga ayat.
Araduenyo ti mamulmulaan a daga+Bayat nga adda pay tiempo a mangbirok ken Jehova,+Agingga nga umay ken isuronakayo iti kinalinteg.+
13 Kinadakes ti immulayo,Kinakillo ti inapityo,+Ket kinnanyo ti bunga ti panangallilawyo;Ta nagtalekkayo iti mismo a dalanyo,Gapu iti kaadu dagiti soldadoyo.
14 Agriawto dagiti kabusor a dumarup kadagiti tattaom,Ket madadaelto ti amin a napaderan a siudadmo,+Kas iti panangdadael ti Salman iti balay ni Arbel,Iti aldaw ti gubat, mawarawaranto ti paspaset ti bagi dagiti inna agraman annakda.
15 Kastoyto ti mapasamak kenka, O Bethel,+ gapu iti nakaro a kinadakesmo.
Iti panagbannawag, sigurado a mapapatayto* ti ari ti Israel.”+
Footnotes
^ Wenno mabalin a, “rumukrukbos.”
^ Lit., “Nagalis; Nalamuyot.”
^ Lit., “mapagulimekto.”
^ Wenno “interamente a dinadael.”
^ Kayatna a sawen, inton ti dusada ket maipabaklay kadakuada a kas iti sangol.
^ Wenno “igalutko.”
^ Lit., “mapagulimekto.”
