Oseas 7:1-16
7 “No paimbagek ti Israel,Maammuan met ti kamali ti Efraim,+Ken ti kinadakes ti Samaria.+
Ta nairuamda a mangallilaw;+Agserrek dagiti mannanakaw ken agtambangda iti ruar.+
2 Dida pampanunoten a lagipekto ti amin a kinadakesda.+
Saandan a makalisi kadagiti dakes nga aramidda;Makitkitak amin dagita.
3 Parparagsakenda ti ari gapu iti kinadakesda,Ken parparagsakenda dagiti prinsipe gapu iti panangallilawda.
4 Mannakikamalalada amin,Kas iti bumarbara a pugon nga inaronan ti panaderoA dinan rubroban bayat a masmasaenna ti arina ken ur-urayenna nga umalsa.
5 Idi aldaw ti aritayo, nagsakit dagiti prinsipe—Bimmara ti pungtotda gapu iti arak.+
Nakikadua kadagiti managuyaw.
6 Ta umasidegda a ti pusoda ket sumsumged a kas iti pugon.*
Agpatpatnag a matmaturog ti panadero;Kabigatanna, gumilgil-ayaben ti apuy ti pugon.
7 Nabarada amin a kas iti pugon,Ken lamutenda dagiti mangiturturay* kadakuada.
Napapatayen ti amin nga arida;+Ngem awan man la kadakuada ti umawag kaniak.+
8 Makial-aliansa ti Efraim kadagiti nasion.+
Ti Efraim ket kas iti nagbukel a tinapay a saan a naibaliktad.
9 Inibus dagiti estranghero ti bilegna,+ ngem dina ammo dayta.
Pimmurawen ti amin a buokna, ngem dina madlaw dayta.
10 Ti kinatangsit ti Israel ti ebidensia maibusor kenkuana,+Ngem dida nagsubli ken Jehova a Diosda,+Saanda latta a sinapul.
11 Ti Efraim ket kas iti nalaka a maallilaw a kalapati, saan a masirib.*+
Immawagda iti Egipto;+ napanda iti Asiria.+
12 Sadinoman a papananda, iwayatkonto kadakuada ti iketko.
Ipababakto ida a kas kadagiti billit iti tangatang.
Disiplinaekto ida maitunos iti pakdaar a naited iti ummongda.+
13 Kaasida pay, ta pinanawandak!
Madadaelda ta nagbasolda kaniak!
Sisasaganaak idi a mangsubbot kadakuada, ngem saan nga agpayso dagiti imbagada maipapan kaniak.+
14 Saanda a naimpusuan a nagpatulong kaniak,+Nupay nagsangsangitda kadagiti pagiddaanda.
Sinugsugatda ti bagbagida maigapu iti bukbukel ken baro nga arakda;Nagrebeldeda kaniak.
15 Nupay dinisiplinak ida ken pinapigsak dagiti takiagda,Binusordak ken nagplanoda iti dakes.
16 Nagbalbaliwda ngem saan nga iti nangatngato;*Saanda a maiturong a kas iti killo a pana.+
Matayto iti espada dagiti prinsipeda gapu iti natangsit a panagsasaoda.
Gapu iti dayta, mauy-uyawdanto idiay Egipto.”+
Footnotes
^ Wenno mabalin a, “Ta dagiti pusoda ket kas iti pugon bayat nga umasidegda agraman dagiti nalimed a planoda.”
^ Lit., “uk-ukom.”
^ Lit., “awanan iti puso.”
^ Kayatna a sawen, saan nga iti nangatngato a kita ti panagdaydayaw.
