Proverbio 11:1-31
11 Kagura ni Jehova ti nakusit a pagtimbang,Ngem maragsakan iti umiso a timbangan.*+
2 No dumteng ti kinatangsit, sumaruno ti pannakaibabain,+Ngem ti sirib adda kadagidiay naemma.+
3 Ti integridad dagiti nalinteg ti mangigiya kadakuada,+Ngem ti kinasikap dagiti manangallilaw ti mangdadaelto kadakuada.+
4 Awanto ti serserbi ti kinabaknang* iti aldaw ti pungtot,+Ngem ti kinalinteg ti mangisalakanto manipud ken patay.+
5 Ti kinalinteg daydiay awan pakababalawanna ti mangpalinteg iti dalanna,Ngem matnagto ti dakes gapu iti kinadakesna.+
6 Ti kinalinteg dagiti nalinteg ti mangisalakanto kadakuada,+Ngem masiluanto dagiti manangallilaw babaen ti bukodda a tarigagay.+
7 No matay ti dakes a tao, mapukaw ti namnamana;Ken mapukaw met ti panagtalekna iti bilegna.+
8 Maisalakan ti nalinteg a tao iti rigat,Ket ti dakes a tao ti sumukat iti kasasaadna.+
9 Babaen ti ngiwat ti apostata,* madadael ti kaarrubana,Ngem maisalakan ti nalinteg babaen ti pannakaammo.+
10 Ti kinaimbag ti nalinteg ti mangparagsak iti siudad,Ken adda panagpukkaw gapu iti rag-o no maawan ti dakes.+
11 Gapu iti bendision dagiti nalinteg, maitan-ok ti siudad,+Ngem ti ngiwat ti dakes ti mangdadael iti dayta.+
12 Ti asinoman a saan a masirib* guraenna* ti kaarrubana,Ngem agulimek laeng ti tao nga umiso ti pannakatarusna.+
13 Ti manangpadakes iwarasna ti kompidensial a saritaan,+Ngem ti mapagtalkan a tao* pagtalinaedenna dayta a kompidensial.*
14 Madadael dagiti umili no awan ti nasayaat* a panangiwanwan,Ngem adda balligi* no adu ti mamalbalakad.*+
15 Sigurado a dakes ti pagbanagan ti manggarantia iti utang* ti estranghero.+Ngem natalgedto ti saan a makialamano* tapno makitulag.
16 Ti nasayaat* a babai umawat iti dayag,+Ngem agagaw iti kinabaknang dagiti awanan asi.
17 Ti nasingpet a lalaki* gunggonaanna ti bagina,*+Ngem ti naranggas a tao irubona* ti bagina.+
18 Ti dakes a tao makagun-od iti awan mamaayna a tangdan,+Ngem ti agmulmula iti kinalinteg umawat iti pudno a gunggona.+
19 Ti sititibker nga agtaktakder iti kinalinteg ket nakalinia iti biag,+Ngem ti mangkamkamat iti dakes ket nakalinia iti ipapatay.
20 Kagura ni Jehova dagiti nakillo ti pusoda,+Ngem pakaragsakanna dagiti awan pakababalawan ti dalanda.+
21 Masiguradoyo daytoy:* Madusanto ti dakes a tao,+Ngem makalasatto ti annak dagiti nalinteg.
22 Mayarig iti balitok a singsing iti subsob ti baboyTi napintas a babai a saan a mangus-usar iti panunotna.
23 Naimbag ti pagtungpalan ti tarigagay ti nalinteg,+Ngem unget ti pagtungpalan ti namnama ti dakes a tao.
24 Adda mangmangted a sipaparabur* ket umawat iti ad-adu;+Adda met mangyim-imut iti rumbeng nga itedna, ngem pumanglaw.+
25 Rumang-ayto* ti naparabur a tao,*+Ken mabang-aranto ti asinoman a mangbang-ar* iti sabsabali.+
26 Ilunodto dagiti umili ti mangyimut iti bukbukel,Ngem bendisionandanto ti aglako iti bukbukel.
27 Daydiay napinget nga agaramid iti naimbag makasarak iti pabor,+Ngem daydiay agbirbirok iti dakes—sigurado a masarakannanto dayta.+
28 Matnagto daydiay agtaltalek iti kinabaknangna,+Ngem daydiay nalinteg rumangpayanto a kas bulbulong.+
29 Agtawidto iti angin ti asinoman a mangriribuk* iti sangakabbalayanna,+Ket ti maag adipento ti masirib.
30 Ti bunga ti nalinteg ket kayo ti biag,+Ken masirib daydiay makatignay iti sabsabali nga agaramid iti naimbag.+
31 No magunggonaan ti nalinteg ditoy daga,Sigurado met a madusa ti dakes ken ti managbasol!+
Footnotes
^ Wenno “kompleto a padagsen a bato.”
^ Wenno “napateg a bambanag.”
^ Wenno “tao nga awan diosna.”
^ Lit., “nga awanan iti puso.”
^ Wenno “uyawenna.”
^ Lit., “ti matalek iti espiritu.”
^ Lit., “abbonganna ti maysa a banag.”
^ Wenno “nainsiriban.”
^ Wenno “pannakaisalakan.”
^ Wenno “mammagbaga.”
^ Kayatna a sawen, mamatalged.
^ Wenno “mangted iti pammatalged.”
^ Wenno “makaay-ayo.”
^ Wenno “lalaki nga addaan iti napudno nga ayat.”
^ Wenno “agar-aramid iti naimbag iti kararuana.”
^ Wenno “ibabainna.”
^ Lit., “Ima iti ima.”
^ Lit., “nga agiwaras.”
^ Lit., “Lumukmegto.”
^ Wenno “kararua.”
^ Lit., “nga adu ti isibugna.”
^ Wenno “mangibabain.”
