Proverbio 28:1-28
28 Agtaray dagiti dakes uray awan ti kumamkamat,Ngem dagiti nalinteg napigsa ti pakinakemda a kas iti leon.*+
2 No adda biddut* iti daga, masukansukat ti prinsipe,+Ngem agpaut ti maysa a prinsipe iti tulong ti tao nga addaan pannakatarus ken pannakaammo.+
3 Ti napanglaw a mangsaur kadagiti nanumo+Ket kas iti tudo a mangyanud iti amin a taraon.
4 Dagiti mangsukir iti linteg idaydayawda ti managdakdakes,Ngem makapungtot kadakuada dagiti mangtungpal iti linteg.+
5 Saan a maawatan ti dakes a tattao ti hustisia,Ngem dagiti mangsapsapul ken Jehova maawatanda ti amin.+
6 Nasaysayaat ti napanglaw nga addaan integridadNgem ti nabaknang a dakes ti aramidna.+
7 Ti mannakaawat nga anak tungpalenna ti linteg,Ngem ti makikadua kadagiti rawet ibabainna ni amana.+
8 Daydiay agpabpabaknang babaen ti interes+ ken dakkel a ganansiaAgur-urnong para iti daydiay mangngaasi kadagiti napanglaw.+
9 Ti saan a mangsurot iti linteg—Makarimon uray ti kararagna.+
10 Ti mangiturong iti nalinteg iti dakes a dalan matnagto iti bukodna nga abut,+Ngem dagiti awan pakababalawanna tawidendanto ti naimbag.+
11 Ipagarup ti nabaknang a tao nga isu ket masirib,+Ngem ti napanglaw a nauneg ti pannakatarusna maammuanna ti pudno maipapan kenkuana.+
12 No agballigi ti nalinteg a tao, adda dakkel a panagragsak,Ngem no agturay dagiti dakes, aglemmeng dagiti umili.+
13 Saanto nga agballigi ti mangabbong kadagiti basolna,+Ngem maipakitaanto iti asi ti mangipudno ken mangtallikud kadagita.+
14 Naragsak ti tao a kanayon nga agbantay,*Ngem madidigranto ti mangpatangken iti pusona.+
15 Ti dakes a tao a mangituray iti awan pigsana a tattao+Ket kas iti agngerngernger a leon ken dumardarup nga oso.
16 Ti lider nga awan pannakatarusna abusuenna ti pannakabalinna,+Ngem ti manggura iti sinasaur a panagganansia paatiddogennanto ti biagna.+
17 Ti tao a nakapatay agtultuloyto nga aglemmeng agingga iti tanem.*+
Awan koma ti tumulong kenkuana.
18 Maisalakanto daydiay magmagna nga awan pakababalawanna,+Ngem matumbanto a dagus daydiay killo ti dalanna.+
19 Adunto ti taraon daydiay mangtalon iti dagana,Ngem pumanglawto daydiay agar-aramid iti awan serbina a bambanag.+
20 Adunto ti bendision ti matalek a tao,+Ngem agbasolto daydiay agganat a bumaknang.+
21 Saan a nasayaat ti mangidumduma;+Ngem makaaramid iti di umiso ti maysa a tao gapu iti bassit a taraon.
22 Magagaran a bumaknang ti naapal* a tao,Ngem saanna nga ammo a pumanglawto.
23 Ad-addanto a mapaboran+ ti asinoman a mangtubngar iti maysa a tao+Ngem ti mangusar iti dilana a mangpasablog.
24 Asinoman a mangtakaw iti sanikua da ama ken inana sa ibagana, “Saan a dakes dayta,”+
Ket kadua ti mannanakaw.+
25 Ti naagum a tao* rubrobanna ti panagaapa,Ngem rumang-ayto* ti asinoman nga agtalek ken Jehova.+
26 Maag ti agtalek iti pusona,+Ngem natalgedto ti magmagna a sisisirib.+
27 Saanto nga agkurang iti aniaman daydiay mangmangted iti napanglaw,+Ngem adunto a lunod ti awaten daydiay mangikidem iti matana kadakuada.
28 No agturay dagiti dakes, aglemmeng dagiti umili,Ngem no mapukawda, umadu dagiti nalinteg.+
Footnotes
^ Wenno “bumaro a leon.”
^ Wenno “panagrebelde.”
^ Wenno “agbuteng.”
^ Wenno “abut.”
^ Wenno “naagum.”
^ Wenno mabalin a, “natangsit a kararua.”
^ Lit., “lumukmegto.”
