Proverbio 7:1-27
7 Anakko, tungpalem ti sasaok,Ket ipategmo dagiti bilinko.+
2 Tungpalem dagiti bilinko tapno agbiagka;+Saluadam ti instruksionko* kas iti alintatao ti matam.
3 Igalutmo dagita kadagiti ramaymo;Isuratmo dagita iti pusom.+
4 Ibagam iti sirib, “Sika ti kabsatko a babai,”
Ken ibagam iti pannakaawat, “Kabagianka,”
5 Tapno masalaknibanka iti dakes* a babai,+Iti immoral* a babai ken iti nalamuyot* a sasaona.+
6 Timman-awak iti tawa ti balayko,Iti rehas ti tawak,
7 Bayat a palpaliiwek dagiti awan ammona,*Nailasinko ti saan a masirib* kadagiti agtutubo a lallaki.+
8 Limmabas iti asideg ti nagsulian ti kalsada nga ayan ti babai,Ket nagturong iti ayan ti balay ti babai
9 Iti sumipnget,+Idi rumabiin ken nasipngeten.
10 Nakitak a simmabet kenkuana ti maysa a babai,Kasla balangkantis ti panagbadbadona,*+ ken nasikap ti pusona.
11 Naariwawa ken natangken ti ulona.+
Saan nga agtaltalinaed* iti balayna.
12 Adda ita iti ruar, sa madamdama, addan kadagiti plasa,Agpadpadaan iti asideg ti tunggal nagsulian.+
13 Ginammatanna ti lalaki ken binisongna;Nagtured a nangibaga:
14 “Mapanak mangyeg iti daton a pakikappia.+
Tungpalek dagiti karik ita nga aldaw.
15 Isu a rimmuarak a sumabet kenka,Tapno birokenka, ket nasarakanka!
16 Inap-apak ti katrek iti napintas nga abbong,Dekolor a lienso manipud Egipto.+
17 Winarsiak ti katrek iti mirra, aloe, ken kanela.+
18 Umayka, agpennekta iti ayat agingga iti bigat;Tagiragsakenta ti nabara nga ayat,
19 Ta awan idiay balay ti asawak;Napan iti adayo a lugar.
20 Nangitugot iti sangasupot a kuarta,Ket agawidto laeng inton agkabus ti bulan.”
21 Inyaw-awanna ti lalaki babaen ti nakaro a panangguyugoy.+
Ginargarina iti nalamuyot a sasao.
22 Pagammuan ta simmuroten ti lalaki, kas iti baka nga agturong iti pagpartian,Kas iti maag a madusa iti tul-ong,*+
23 Agingga a mapana ti dalemna;Kas iti billit nga agdardaras a mapan iti silo, a dina ammo a dayta ti pakatayanna.+
24 Ita, annakko, dumngegkayo kaniak;Ipangagyo ti sasao nga ibagak.
25 Diyo ipalubos nga agturong ti pusoyo kadagiti dalanna.
Dikay mapan kadagiti danana,+
26 Ta adun ti natay gapu kenkuana,+Ket nakaad-adu ti napapatayna.+
27 Agturong ti balayna iti Tanem;*Agpababa kadagiti makin-uneg a siled ni patay.
Footnotes
^ Wenno “lintegko.”
^ Wenno “manggargari.”
^ Wenno “awanan kapadasan.”
^ Lit., “awanan iti puso.”
^ Wenno “Nakasuot iti bado ti balangkantis.”
^ Lit., “Saan nga agtaltalinaed ti sakana.”
^ Wenno “posas.”