Proverbio 9:1-18
9 Binangon ti pudno a sirib ti balayna;Kinitikitanna* ti pito nga adigina.
2 Insaganana a naimbag ti karne;*Tinemplana ti arakna;Inurnosna met ti lamisaanna.
3 Imbaonna dagiti adipenna a babbaiTapno ipukkawda kadagiti tuktok ti siudad:+
4 “Umay koma ditoy ti asinoman nga awanan kapadasan.”
Kinunana iti saan a masirib:*
5 “Umayka, kanenta ti tinapaykoKen inumenta ti arak a tinemplak.
6 Baybay-am ti kinaawan kapadasan* tapno agbiagka;+Magnaka iti dalan ti pannakaawat.”+
7 Maibabain ti mangilinteg iti managuyaw,+Ken masaktan ti asinoman a mangtubngar iti dakes a tao.
8 Dimo tubngaren ti nauyaw, ta guraennakanto.+
Tubngarem ti masirib a tao, ket ayatennakanto.+
9 Ikkam iti pannakaammo ti masirib a tao, ket nasirsiribto pay.+
Suruam ti nalinteg a tao, ket manayonanto ti ammona.
10 Ti panagbuteng ken Jehova ti pangrugian ti sirib,+Ken ti pannakaammo maipapan iti Daydiay Kasasantuan+ ket pannakaawat.
11 Ta umadunto ti aldawmo babaen kaniak,+Ket adunto a tawen ti mainayon iti biagmo.
12 No agbalinka a masirib, pagimbagam ti panagbalinmo a masirib,Ngem no nauyawka, apitemto ti bungana.
13 Naariwawa ti babai a maag.+
Ignorante ken awan a pulos ti ammona.
14 Agtugaw iti ruangan ti balayna,Iti maysa a tugaw kadagiti nangato a paset ti siudad,+
15 Nga ipukpukkawna kadagiti lumabas,Kadagidiay agdirdiretso a magna:
16 “Umay koma ditoy ti asinoman nga awanan kapadasan.”
Kunana kadagidiay saan a masirib:*+
17 “Nasam-it ti tinakaw a danum,Ket naimas ti taraon a makan iti nalimed.”+
18 Ngem dina ammo nga adda sadiay dagiti natay,A dagiti bisitana ket adda iti kaunegan a paset ti Tanem.*+
Footnotes
^ Wenno “Tinikapna.”
^ Lit., “Pinartina ti partienna.”
^ Lit., “awanan iti puso.”
^ Wenno “dagiti awanan kapadasan.”
^ Lit., “awanan iti puso.”
