Ruth 2:1-23
2 Adda lalaki a kabagian daydi asawa ni Noemi a ni Elimelec. Boaz+ ti naganna ken nakabakbaknang.
2 Kinuna ni Ruth a Moabita ken Noemi: “Pangngaasim, palubosannak a mapan iti taltalon tapno agadas+ kadagiti dawa a mabati dagiti agan-ani.” Insungbat ni Noemi: “Inka, anakko.”
3 Napan ngarud nagadas iti taltalon a sarsarunuenna dagiti agan-ani. Naiparna nga iti talon ni Boaz+ a kabagian ni Elimelec+ ti napananna.
4 Di nagbayag, simmangpet ni Boaz a naggapu iti siudad ti Betlehem ket imbagana kadagiti agan-ani: “Adda koma kadakayo ni Jehova.” Insungbatda: “Bendisionannaka koma ni Jehova.”
5 Kalpasanna, dinamag ni Boaz iti lalaki a mangidadaulo kadagiti agan-ani: “Makin-anak iti daytoy a balasang?”
6 Simmungbat ti lalaki: “Isu ket maysa a Moabita+ a kadua ni Noemi a naggapu iti daga ti Moab.+
7 Impakaasina kaniak, ‘Mabalin kadi nga agadasak+ ken agummongak kadagiti dawa* a nabati dagiti agan-ani?’ Itay pay la bigat nga agad-adas ket ita la a naglinong tapno aginana biit.”
8 Kinuna ni Boaz ken ni Ruth: “Denggennak, balasangko. Ditoyka lattan nga agadas, ket dika mapmapanen iti sabali a talon. Dimo ad-adaywan dagiti trabahadorko a babbai.+
9 Siputam no sadino ti paganianda, ket sumurotka kadakuada. Binilinko dagiti trabahadorko a lallaki a didaka an-anuen.* No mawawka, mapanka latta uminum kadagiti karamba a sinakduan dagiti lallaki.”
10 Iti kasta, nagparintumeng sa nagruknoy ket kinunana kenkuana: “Apay a nakaim-imbagkayo kaniak, ken apay a maseknankayo unay kaniak, idinto ta saandak a kailian?”+
11 Simmungbat ni Boaz: “Nadamagko amin nga inaramidmo iti katugangam kalpasan a natay ni lakaymo ken ti panangpanawmo iti nagannakmo ken iti ili a nakayanakam tapno makipagnaedka kadagiti tattao a dimo am-ammo.+
12 Gunggonaannaka koma ni Jehova gapu iti inaramidmo,+ ket ikkannaka koma iti naan-anay a tangdan* ni Jehova a Dios ti Israel, a dagiti payakna ti nagkamangam.”+
13 Ket kinuna ni Ruth: “Nakaim-imbagkayo unay kaniak, apo. Dikay koma maum-uma. Makaliwliwa ken makapabang-ar ti pannakisaritayo* iti adipenyo, nupay saanak a maysa kadagiti adipenyo.”
14 Idi pannanganen, kinuna ni Boaz ken ni Ruth: “Umayka mangan iti tinapay, ket isawsawmo iti suka.” Gapuna, nagtugaw ni Ruth iti abay dagiti agan-ani. Inyawatan ni Boaz iti kinirog* a bukbukel, ket nangan ken napnek sa adda pay nateddana.
15 Idi mapan manen agadas,+ imbilin ni Boaz kadagiti trabahadorna a lallaki: “Bay-anyo nga agadas kadagiti nagapas a dawa,* ken diyo singsingaen.+
16 Manguyoskayo met kadagiti dawa manipud kadagiti binettek ket ibatiyo tapno adda adasenna. Diyo parparitan.”
17 Nagadas ni Ruth agingga iti sumipnget.+ Idi naibatbatna* ti naurnongna a sebada, agdagsen dayta iti agarup maysa nga efa.*
18 Innalana dayta sa nagawid iti siudad ket impakitana iti katuganganna ti naadasna. Inruar pay ni Ruth ti nateddana a taraon+ ket intedna kenkuana.
19 Kinuna ti katuganganna: “Sadino ti nagadasam ita? Makintalon ti napanam? Mabendisionan koma daydiay nangipakita kenka iti kinaimbag.”+ Imbagana iti katuganganna no asino ti nakipagtrabahuanna: “Boaz ti nagan ti lalaki a makinkukua iti talon a nagtrabahuak.”
20 Kinuna ni Noemi: “Bendisionan koma isuna ni Jehova, a kanayon a napudno ti ayatna kadagiti sibibiag ken kadagiti natay.”+ Intuloyna: “Kabagiantayo,+ ken maysa kadagiti manangsaka kadatayo.”*+
21 Kinuna ni Ruth a Moabita: “Imbagana pay kaniak, ‘Dimo ad-adaywan dagiti trabahadorko agingga a malpas ti ani.’”+
22 Imbaga ni Noemi ken ni Ruth a manugangna: “Nasaysayaat, anakko, a sumurotka kadagiti trabahadorna a babbai ta amangan no adda mangriribuk kenka iti sabali a talon.”
23 Iti kasta, simmursurot ni Ruth kadagiti babbai a trabahador ni Boaz tapno agadas agingga a nalpas ti panagani iti sebada+ ken trigo. Intultuloyna ti nakipagnaed iti katuganganna.+
Footnotes
^ Wenno mabalin a, “kadagiti binettek.”
^ Wenno “riribuken.”
^ Wenno “naan-anay a gunggona.”
^ Lit., “pannakisaritayo iti puso.”
^ Wenno mabalin nga, “iniruban.”
^ Wenno mabalin a, “kadagiti binettek.”
^ Wenno “nairikna, naibautna.”
^ Wenno “maysa kadagiti kabagiantayo nga addaan kalintegan a mangsaka (mangsubbot).”
