Ruth 3:1-18
3 Kinuna ni Noemi a katuganganna: “Anakko, saan kadi a rebbeng nga isapulanka iti pagtaengam,*+ tapno nasayaat ti pagbanagam?
2 Saan kadi a kabagianta ni Boaz?+ Isu ti amo dagiti babbai a simmurotam. Agitataep iti sebada idiay pagirikan ita a rabii.
3 Isu nga agdiguska ken agsapsapoka iti nabanglo a lana; ket isuotmo ti kapintasan a badom* sa mapanka iti pagirikan. Dika agpadpadlaw kenkuana agingga a malpas a mangan ken uminum.
4 Siputam no sadino ti pagiddaanna; asitgam ket lukaisam dagiti sakana sa agiddaka iti sakaananna. Ibagananto no ania ti rumbeng nga aramidem.”
5 “Aramidekto ti amin nga imbagayo,” kinuna ni Ruth.
6 Napan iti pagirikan ket inaramidna ti amin nga imbilin ti katuganganna.
7 Kabayatanna, nangan ken imminum ni Boaz, ket naragsakan, sa nagidda iti abay ti nabunton a sebada. Idi kuan, nagin-inayad nga immasideg ni Ruth ket linukaisanna dagiti saka ni Boaz. Kalpasanna, nagidda ni Ruth iti sakaanan ni Boaz.
8 Iti tengnga ti rabii, nagpigerger ni Boaz. Bimmangon ket nakitana nga adda babai a nakaidda iti sakaananna.
9 “Asinoka?” dinamag ni Boaz. “Siak ni Ruth nga adipenmo. Iyarpawmo ti badom* iti adipenmo, ta maysaka a manangsaka,” insungbatna.+
10 Ket kinuna ni Boaz: “Bendisionannaka koma ni Jehova, balasangko. Ad-adda nga impakitam ita ti napudno nga ayatmo ngem iti impakitam idi damo,+ ta saanka a nagbirok iti ub-ubing, napanglaw man wenno nabaknang.
11 Dika agdanag, balasangko. Aramidekto ti amin nga ibagam,+ ta ammo ti amin nga umili iti siudad* a nakaim-imbagka a babai.
12 Agpayso a maysaak a manangsaka,+ ngem adda manangsaka nga as-asideg a kabagianyo.+
13 Dika pumampanaw ditoy ita a rabii. No sakaennaka inton bigat, nasayaat! Bay-am a sakaennaka.+ Ngem no dina kayat, siakto ti mangsaka kenka. Isapatak iti nagan ti sibibiag a Dios a ni Jehova. Maturogkan agingga iti agsapa.”
14 Naturog ngarud ni Ruth agingga iti agsapa ket bimmangon sakbay nga aglawag tapno awan ti makakita kenkuana. Kinuna ni Boaz: “Awan koma ti makaammo nga adda babai nga immay iti pagirikan.”
15 Kinunana pay ken Ruth: “Ikkatem ta kagaymo ket iyaplagmo.” Inyaplagna ti kagayna, ket nangibukbok ni Boaz iti innem a sukat* ti sebada sa impasusuonna kenkuana. Kalpasanna, napan ni Boaz iti siudad.
16 Nagawid ni Ruth ket dinamag ti katuganganna: “Komusta ti napanam,* anakko?” Inyestoriana ken Noemi ti amin nga inaramid ni Boaz.
17 Imbagana pay: “Intedna kaniak daytoy innem a sukat ti sebada ken kinunana, ‘Saanka nga agawid nga ima-ima iti katugangam.’”
18 Kinuna ni Noemi: “Agurayka laeng, anakko, agingga a maammuam ti resultana, ta aramiden ni Boaz ti amin a pamuspusan tapno maasikasona daytoy a banag ita nga aldaw.”
Footnotes
^ Lit., “paginanaam.”
^ Wenno “makinruar a badom.”
^ Wenno “pandiling ti badom.”
^ Lit., “ammo ti amin a ruangan.”
^ Lit., “Asinoka?”
