Ruth 4:1-22
4 Napan ni Boaz iti ruangan ti siudad+ ket nagtugaw sadiay. Idi kuan, limmabas ti manangsaka a dinakamatna.+ Kinuna ni Boaz: “Gayyem,* umayka ditoy, agtugawka.” Ket immasideg ken nagtugaw.
2 Kalpasanna, nangayab ni Boaz iti 10 a panglakayen+ iti siudad ket kinunana: “Agtugawkayo ditoy.” Iti kasta, nagtugawda.
3 Imbaga ni Boaz iti manangsaka:+ “Nagsublin ni Noemi manipud iti away ti Moab+ ket kayatnan nga ilako ti talon daydi kabsattayo nga Elimelec.+
4 Isu a napanunotko a masapul nga ibagak kenka, ‘Gatangem dayta iti imatang dagiti umili ken dagiti panglakayen.+ No kayatmo a sakaen, sakaem. Ngem no saan, ibagam kaniak tapno maammuak, ta dakdakkel ti kalintegam a mangsaka ngem siak.’” Insungbatna: “Kayatko a sakaen.”+
5 Kinuna ni Boaz: “No gatangem ti talon ken ni Noemi, masapul met a gatangem dayta iti balo a ni Ruth a Moabita tapno ti tawid ket agtalinaed a kukua ti kaputotan daydi natay a lalaki.”+
6 Simmungbat ti manangsaka: “Diak kabaelan a sakaen, ta amangan no malugiak. Sika laengen ti mangsaka, itedko kenka ti kalintegak a mangsaka ta diak kabaelan a sakaen.”
7 Kastoy idi ti kaugalian iti nagkauna nga Israel maipapan iti kalintegan a mangsaka ken panagsinnukat tapno mapatalgedan ti tunggal kita ti tulagan: Masapul nga uksoten ti maysa a tao ti sandaliasna+ sa itedna iti katinnulagna, ket daytoy ti agserbi kas pammatalged* iti tulagan iti Israel.
8 Isu nga idi imbaga ti manangsaka ken Boaz: “Sika laengen ti gumatang,” inuksotna ti sandaliasna.
9 Kalpasanna, kinuna ni Boaz kadagiti panglakayen ken iti amin nga adda sadiay: “Ita nga aldaw, dakayo ti testigo+ a gatangek ken Noemi ti amin a sanikua da Elimelec, Kilion, ken Malon.
10 Alaek met kas asawa ni Ruth a Moabita, ti asawa daydi Malon, tapno ti daga a tawidna ket agtalinaed a kukua ti kaputotanna.+ Iti kasta, ti naganna ket saanto a malipatan dagiti kabagian ken kailianna. Dakayo ti testigo ita nga aldaw.”+
11 Simmungbat ti amin nga adda iti ruangan ti siudad ken dagiti panglakayen: “Testigokami! Sapay koma ta bendisionan ni Jehova ti agbalinto nga asawam tapno kapadanto da Raquel ken Lea a nagtaudan ti kaputotan ti Israel.+ Rumang-ayka koma iti Efrata+ ken mangaramidka iti nasayaat a nagan* iti Betlehem.+
12 Sapay koma ta ti kaputotan nga ited ni Jehova kenka babaen iti daytoy a babai+ ket agbalin a naindaklan a kas iti kaputotan ni Perez+ nga anak da Juda ken Tamar.”
13 Innala ngarud ni Boaz ni Ruth kas asawana ket nagdennada. Binendisionan ida ni Jehova ket naginaw ni Ruth ken nangipasngay iti maysa a lalaki.
14 Kinuna dagiti babbai ken Noemi: “Maidaydayaw koma ni Jehova ta inikkannaka ita nga aldaw iti manangsaka. Ti nagan ti ubing ket agbalin koma a nalatak iti Israel!
15 Insubli ti ubing* ti biagmo* ken aywanannakanto bayat ti kinabaketmo, ta inyanak ti manugangmo a mangipatpateg kenka+ ken nasaysayaat ngem iti pito nga annak a lallaki.”
16 Innala ni Noemi ti ubing ken inubbana, ket inaywananna.*
17 Kalpasanna, dagiti kaarruba a babbai ti nangpanagan iti ubing. Kinunada: “Nayanak ken Noemi ti maysa a lalaki,” ket pinanagananda iti Obed.+ Isu ti ama ni Jesse+ nga ama ni David.
18 Daytoy ti kaputotan* ni Perez:+ Ni Perez ti ama ni Hezron;+
19 ni Hezron ti ama ni Ram; ni Ram ti ama ni Aminadab;+
20 ni Aminadab+ ti ama ni Naason; ni Naason ti ama ni Salmon;
21 ni Salmon ti ama ni Boaz; ni Boaz ti ama ni Obed;
22 ni Obed ti ama ni Jesse;+ ket ni Jesse ti ama ni David.+
Footnotes
^ Naigagara a saan a nadakamat ti naganna.
^ Wenno “pammaneknek.”
^ Lit., “mangiwaragawagka iti nagan.”
^ Kayatna a sawen, ti apoko ni Noemi.
^ Wenno “kararuam.”
^ Wenno “tinagibina.”
^ Lit., “Dagitoy ti henerasion.”
