Salmo 147:1-20
147 Idaydayawyo ni Jah,*
Nasayaat ti agkanta iti panangidaydayaw* iti Diostayo;Talaga a makaparagsak ken maitutop ti panangidaydayaw kenkuana!+
2 Bangbangonen ni Jehova ti Jerusalem;+Ummongenna dagiti naiwarawara a tattao iti Israel.+
3 Paimbagenna dagiti nasaktan ti pusoda;Bedbedanna dagiti sugatda.
4 Bilangenna dagiti bituen;Awaganna amin ida iti naganda.+
5 Ti Apotayo ket naindaklan ken dakkel ti pannakabalinna;+Awan limitasion ti pannakaawatna.+
6 Ipangato ni Jehova dagiti napakumbaba,+Ngem ipababana dagiti managdakdakes agingga iti daga.
7 Agkantakayo iti panagyaman ken Jehova;Agkantakayo iti panangidaydayaw iti Diostayo, a madanggayan iti arpa,
8 Daydiay mangab-abbong iti langit kadagiti ulep,Daydiay mangmangted iti tudo para iti daga,+Daydiay mangpatpatubo iti ruot+ kadagiti bantay.
9 Ik-ikkanna dagiti animal iti kanenda,+Ken dagiti agkikiak a sibong ti wak.+
10 Isu ket saan a maay-ayo iti kinabileg ti kabalio;+Saan met nga agsiddaaw kadagiti napigsa a gurong ti tao.+
11 Maragsakan ni Jehova kadagidiay agbuteng kenkuana,+Kadagidiay mangnamnama iti napudno nga ayatna.+
12 O Jerusalem, itan-okmo ni Jehova.
O Sion, idaydayawmo ti Diosmo.
13 Palagdaenna ti trangka dagiti ruangan ti siudadmo;Bendisionanna dagiti annakmo.
14 Mangyeg iti talna iti teritoriam;+Bussogennaka iti kasayaatan a* trigo.+
15 Ipakaammona ti bilinna iti daga;Nagbiit a makadanon ti saona.
16 Mangyaplag iti niebe a kas iti tela a delana;+Iwarasna ti lamiis a kas iti dapo.+
17 Pagtinnagenna dagiti urarona* kas iti maregmeg ti tinapay.+
Asino ti makaitured iti kinalamiisna?+
18 No ibilinna, matunawda.
Pagpuyupoyenna ti anginna,+ ket agayus ti danum.
19 Imbagana ti saona ken Jacob,Dagiti regulasion ken pangngeddengna iti Israel.+
20 Saanna nga inaramid dayta iti sabali a nasion;+Awan ti ammoda kadagiti pangngeddengna.
Idaydayawyo ni Jah!*+
Footnotes
^ Wenno “Hallelujah!” Ti “Jah” ket napaababa a porma ti nagan a Jehova.
^ Wenno “agputar iti musika.”
^ Lit., “taba ti.”
^ Wenno “yelona.”
^ Wenno “Hallelujah!” Ti “Jah” ket napaababa a porma ti nagan a Jehova.
