Salmo 148:1-14
148 Idaydayawyo ni Jah!*
Idaydayawyo ni Jehova, dakayo nga adda iti langit;+Idaydayawyo, dakayo nga adda iti kangatuan.
2 Idaydayawyo, dakayo amin nga anghelna.+
Idaydayawyo, dakayo amin nga armadana.+
3 Idaydayawyo, dakayo nga init ken bulan.
Idaydayawyo, dakayo amin a rumimatrimat a bituen.+
4 Idaydayawyo, dakayo a kangatuan a langit,*Ken dakayo a dandanum nga adda iti ngatuen ti langit.
5 Idaydayawda koma ti nagan ni Jehova,Ta imbilinna, ket naparsuada.+
6 Pagtalinaedenna ida iti agnanayon nga awan inggana;+Nangted iti bilin a saan nga agpatingga.+
7 Idaydayawyo ni Jehova, dakayo nga adda iti daga,Dakayo a nagdadakkel a parsua iti baybay ken amin nga adalem a dandanum,
8 Dakayo a kimat ken uraro, niebe ken napuskol nga ulep,Sika a nakapigpigsa nga angin a mangitungtungpal iti saona,+
9 Dakayo a bambantay ken dakayo amin a turod,+Dakayo a kaykayo nga agbunga ken dakayo amin a sedro,+
10 Dakayo nga atap nga animal+ ken dakayo amin a naamo nga animal,Dakayo nga agkarkarayam ken dakayo a billit,
11 Dakayo nga ar-ari iti daga ken dakayo amin a nasion,Dakayo a prinsipe ken dakayo amin a hues iti daga,+
12 Dakayo nga agtutubo a lallaki ken babbai,*Dakayo a lallakay ken ubbing.
13 Idaydayawda koma ti nagan ni Jehova,Ta ti naganna laeng ti kangatuan.+
Ti dayagna ket nangatngato ngem iti daga ken langit.+
14 Nayonanna ti pigsa* dagiti tattaona,Tapno maidaydayaw ti amin a napudno kenkuana,Dagiti annak ti Israel, dagiti tattao a nadekket kenkuana.
Idaydayawyo ni Jah!*
Footnotes
^ Wenno “Hallelujah!” Ti “Jah” ket napaababa a porma ti nagan a Jehova.
^ Lit., “langlangit iti langlangit.”
^ Lit., “birhen.”
^ Lit., “sara.”
^ Wenno “Hallelujah!” Ti “Jah” ket napaababa a porma ti nagan a Jehova.
