Salmo 31:1-24
Iti direktor. Kanta ni David.
31 O Jehova, nagkamangak kenka,+
Pulos a saanak koma a maibabain.+
Isalakannak gapu iti kinalintegmo.+
2 Iyasidegmo ta lapayagmo* kaniak.
Darasem ti umay mangispal kaniak.+
Agbalinka koma a bantay a pagkamangak,Maysa a natalged a lugar a pakaisalakanak.+
3 Ta sika ti dakkel a bato a paglemmengak ken natalged a pagkamangak;+Ken gapu iti naganmo,+ isurom ti dalanko ken tarabayennak.+
4 Iruarnakto iti iket a sililimed nga impakatda kaniak,+Ta sika ti pagkamangak.+
5 Italekko kenka ti biagko.*+
Sinubbotnak, O Jehova, ti Dios ti kinapudno.*+
6 Kagurak dagidiay agdaydayaw kadagiti awan serserbina ken ubbaw nga idolo,Ngem agtalekak ken Jehova.
7 Pagragsakak unay ti napudno nga ayatmo,Ta nakitam ti panagrigrigatko;+Ammom ti nakaro a panagladingitko.
8 Saannak nga inyawat iti kabusor,Ngem pinagtakdernak iti natalged a disso.*
9 Kaasiannak, O Jehova, ta marigrigatanak.
Gapu iti kasasangitko, kimmapsut dagiti matak+ ken ti intero a bagik.*+
10 Gapu iti ladingit, immababa ti biagko+Ken dagiti tawenko gapu iti sennaay.+
Kumapkapsutak gapu iti basolko;Kumapkapuy dagiti tulangko.+
11 Uy-uyawendak dagiti amin a kabusorko,+Nangruna dagiti kaarrubak.
Kabutbutengdak dagiti makaam-ammo kaniak;No makitadak iti ruar, adaywandak.+
12 Awanakon iti pusoda* ken nalipatandakon, a kas man la natayakon;Kaslaak la nabuong a banga.
13 Adu ti nangngegko a dakes a maipadpadamag;Nakabutbuteng dagiti mapaspasamak iti aglawlawko.+
No agkaykaysada a mangbusor kaniak,Panggepda a pukawen ti biagko.*+
14 Ngem agtalekak kenka, O Jehova.+
Kinunak: “Sika ti Diosko.”+
15 Adda dita imam dagiti al-aldawko.*
Ispalennak iti ima dagiti mangidaddadanes kaniak ken dagiti kabusorko.+
16 Ipakitam koma ti kinaimbagmo iti daytoy adipenmo.+
Isalakannak babaen ti napudno nga ayatmo.
17 O Jehova, saanak koma a maibabain no umawagak kenka.+
Dagidiay koma managdakdakes ti maibabain;+Mapagulimekda koma idiay Tanem.*+
18 Agumel koma dagiti naulbod a bibig+Ken dagiti napangas, natangsit, ken manangumsi a ngiwat a mangkonkontra iti nalinteg.
19 Aglaplapusanan ti kinaimbagmo!+
Insaganam dayta kadagiti agbuteng kenka,+Ken impakitam iti amin a tattao, maigapu kadagidiay agkamkamang kenka.+
20 Iti nalimed a lugar iti imatangmo, salaknibamto ida+Kadagiti dakes a panggep dagiti tattao;Ilemmengmonto ida iti toldamManipud kadagiti mannakiriri.*+
21 Madaydayaw koma ni Jehova,Ta nakaskasdaaw ti panangipakitana iti napudno nga ayatna kaniak+ iti nalakub a siudad.+
22 Natarantaak ket kinunak:
“Matayak iti imatangmo.”+
Ngem idi immasugak, impangagmo ti panagpatulongko.+
23 Ayatenyo ni Jehova, dakayo amin a napudno kenkuana!+
Salakniban ni Jehova dagiti matalek,+Ngem nakaro ti panangdusana iti asinoman a natangsit.+
24 Papigsaenyo ti pakinakemyo ken bumilegkayo,+Dakayo amin a mangin-inanama ken Jehova.+
Footnotes
^ Wenno “Agparintumeng ken agimdengka.”
^ Lit., “espirituk.”
^ Wenno “ti matalek a Dios.”
^ Wenno “nalawa a lugar.”
^ Wenno “ti kararuak ken ti tianko.”
^ Wenno “panunotda.”
^ Wenno “kararuak.”
^ Lit., “tiempok.”
^ Lit., “Manipud iti panagaapa dagiti dila.”
