Salmo 68:1-35
Iti direktor. Salmo ni David. Kanta.
68 Agtignay koma ti Dios, maiwarawara koma dagiti kabusorna,Ket agtalaw koma iti sanguananna dagidiay gumurgura kenkuana.+
2 Papanawem koma ida a kas iti pannakayangin ti asuk;Kas iti pannakalunag ti allid gapu iti apuy,Kasta koma ti pannakapukaw dagiti managdakdakes iti imatang ti Dios.+
3 Ngem agragsak koma dagiti nalinteg;+Agrag-oda koma iti napalalo iti sanguanan ti Dios;Agriawda koma a siraragsak.
4 Kantaanyo ti Dios, agkantakayo iti panangidaydayaw* iti naganna.+
Kantaanyo Daydiay nakasakay a lumaslasat kadagiti desierto a tanap.*
Jah* ti naganna!+ Agragsakkayo iti sanguananna!
5 Ti Dios nga adda iti nasantuan a pagnaedanna+Ti ama dagiti awanan ama ken mangsalsalaknib* kadagiti balo a babbai.+
6 Ikkan ti Dios iti balay dagiti agmaymaysa ken awan balayna;+Wayawayaanna dagiti balud ken pasayaatenna ti biagda.+
Ngem agnaedto dagiti nasukir* iti natikag a daga.+
7 O Dios, idi indauluam* dagiti tattaom,+Idi nagmartsaka a limmasat iti desierto, (Selah)
8 Nagginggined ditoy daga;+Nagbuyat* ti tudo manipud langit gapu iti Dios;Nagunggon daytoy Sinai gapu iti Dios, ti Dios ti Israel.+
9 O Dios, pinagtudom iti napigsa;Pinabilegmo manen dagiti nabannog a tattaom.*
10 Nagnaedda kadagiti tolda iti kampom;+Babaen ti kinaimbagmo, O Dios, intedmo ti kasapulan dagiti napanglaw.
11 Kinuna ni Jehova;Dagiti babbai a mangipakpakaammo iti naimbag a damag ket dakkel nga armada.+
12 Agtatalaw ti ar-ari dagiti armada,+ agtatalawda!
Ti babai a mabati iti pagtaengan ket makibingay iti naala kadagiti kabusor.+
13 Uray agid-iddakayo iti abay dagiti paginuduan* iti kampo,Maaddaankayto iti kalapati a pirak dagiti payakna,Ken puro* a balitok dagiti dutdotna.
14 Idi pinagsisina ti Mannakabalin-amin ti ar-ari sadiay,+Nagtinnag ti niebe idiay Zalmon.*
15 Ti bantay ti Basan+ ket bantay ti Dios;*Nangangato dagiti bantay iti kabambantayan ti Basan.
16 Dakayo a nangangato a bantay, apay nga ap-apalanyoTi bantay a pinili* ti Dios a pagnaedanna?+
Sigurado nga idiay ti agnanayon a pagnaedan ni Jehova.+
17 Pinullo a ribu dagiti karuahe a pakigubat ti Dios, di mabilang a pinullo a ribu.+
Naggapu ni Jehova idiay Sinai ket napan iti nasantuan a disso.+
18 Immulika iti nangato a disso;+Nangikuyogka kadagiti naipanaw;*Nangalaka kadagiti lallaki a kas sagut,+Wen, nangalaka, uray kadagiti nasukir,+ tapno makipagnaedka kadakuada, O Jah a Dios.
19 Maidaydayaw koma ni Jehova, nga inaldaw a mangbagbagkat kadagiti awittayo,+Ti pudno a Dios a mangisalakan kadatayo. (Selah)
20 Ti pudno a Dios ket Dios a mangisalakan kadatayo;+Ket manipud ken patay, ispalennatayo ni Jehova a Kangatuan* nga Apo.+
21 Wen, burakento ti Dios ti ulo dagiti kabusorna,Ti bangabanga ti asinoman nga agtultuloy nga agbasbasol.+
22 Kinuna ni Jehova: “Alaekto manen ida manipud idiay Basan,+Aonekto manen ida manipud iti adalem a baybay,
23 Tapno mabugguan ti sakam iti dara dagiti kabusor+Ken tapno adda met darada a madildilan dagiti asom.”
24 Nakitada dagiti parada ti panagballigim, O Dios,Dagiti parada ti panagballigi ti Diosko, ti Arik, nga agturong iti nasantuan a disso.+
25 Dagiti kumakanta ti immuna a nagmartsa, sinaruno dagiti babbalasang nga agtoktokar kadagiti pandereta;+Ket dagiti agtoktokar iti dekuerdas ti adda iti likudanda.+
26 Kadagiti nagtataripnong a tattao,* idaydayawyo ti Dios;Idaydayawyo ni Jehova, dakayo a naggapu iti Ubbog ti Israel.+
27 Adda sadiay ti inaudi a ni Benjamin+ a mangparparmek* kadakuada,Agraman dagiti prinsipe ti Juda ken dagiti nakatagtagari a tattaoda,Dagiti prinsipe ti Zabulon, dagiti prinsipe ti Neftali.
28 Imbilin ti Diosmo nga agbalinka a napigsa.
Ipakitam ti bilegmo, O Dios, sika a nagtignay para kadakami.+
29 Mangyegto kenka dagiti ari kadagiti sagut+A para iti templom idiay Jerusalem.+
30 Tubngarem dagiti atap nga animal iti karunuan,Dagiti pangen ti baka+ ken dagiti urbonda,Agingga nga agparintumeng dagiti tattao tapno mangyeg* kadagiti pedaso a pirak.
Ngem iwarawaramto dagiti tattao a maay-ayatan iti gubat.
31 Dagiti alikamen a bronse ket mairuarto* idiay Egipto;+Alistuanto ti Cus ti mangted kadagiti sagut iti Dios.
32 O dakayo a pagpagarian iti daga, kantaanyo ti Dios,+Agkantakayo iti panangidaydayaw* ken Jehova, (Selah)
33 Iti Daydiay sisasakay iti langit nga addan sipud pay idi un-unana.+
Denggenyo! Ipigpigsana ti timekna, ti nabileg a timekna.
34 Bigbigenyo a nakabilbileg ti Dios.+
Adda iti Israel ti kinadayagna,Ken adda iti tangatang* ti pigsana.
35 Maikari ti Dios iti buteng ken panagraem iti naindaklan a santuariona.+
Isu ti Dios ti Israel,A mangmangted iti pigsa ken pannakabalin dagiti tattao.+
Idaydayawyo ti Dios.
Footnotes
^ Wenno “agputarkayo iti musika.”
^ Wenno mabalin nga, “iti rabaw dagiti ulep.”
^ Ti “Jah” ket napaababa a porma ti nagan a Jehova.
^ Lit., “ukom.”
^ Wenno “rebelioso.”
^ Lit., “napanka iti sanguanan.”
^ Lit., “Nagtedted.”
^ Lit., “tawidmo.”
^ Wenno mabalin a, “pagaponan ti karnero.”
^ Wenno “dumuyaw a berde.”
^ Wenno “Kasla nagniebe idiay Zalmon.”
^ Wenno “nangayed a bantay.”
^ Wenno “kayat.”
^ Wenno “kautibo.”
^ Wenno “Soberano.”
^ Lit., “Kadagiti asamblea.”
^ Wenno “mangiturturay.”
^ Wenno mabalin a, “kapilitan a mangidisso.”
^ Wenno mabalin a, “Rummuarto dagiti embahador.”
^ Wenno “Agputarkayo iti musika.”
^ Lit., “kadagiti ulep.”
