Salmo 71:1-24
71 O Jehova, nagkamangak kenka.
Saanak koma a pulos a maibabain.+
2 Isalakannak ken alawennak gapu iti kinalintegmo.
Iyasidegmo ta lapayagmo* ket isalakannak.+
3 Agbalinka a natalged a dakkel a bato kaniakA kanayon a pagserkak.
Ibilinmo a maisalakanak,Ta sika ti dakkel a bato a paglemmengak ken natalged a pagkamangak.+
4 O Diosko, arayatennak iti ima ti managdakdakes,+Manipud iti panangkemmeg kaniak ti mangirurrurumen.
5 Ta sika ti namnamak, O Kangatuan* nga Apo Jehova;Sikan ti pagtaltalkak* sipud pay idi agtutuboak.+
6 Agpampannurayak kenka sipud pay idi nayanakak;Sika ti nangiruar kaniak iti aanakan ni inak.+
Kankanayon nga idaydayawka.
7 Adu ti masmasdaaw idi nakitada ti napasamak kaniak,Ngem sika ti natibker a pagkamangak.
8 Agmalmalem nga ipakaammo ti ngiwatko+Ti pannakaidaydayaw ken kinadayagmo.
9 Saannak nga ibelleng ita ta lakayakon;+Saannak a baybay-an ita ta nakapsutakon.+
10 Agsasarita dagiti kabusorko maikontra kaniak,Ket agkukumplot dagidiay mayat a mangkettel iti biagko,*+
11 Nga ibagbagada: “Binaybay-anen ti Dios.
Kamatenyo ket tiliwenyo, ta awan ti mangisalakan kenkuana.”+
12 O Dios, dinak panawan.
O Diosko, darasem ti umay tumulong kaniak.+
13 Maibabain ken mapukaw komaDagidiay mangbusbusor kaniak.*+
Maibabain ken maipababa komaDagidiay agpangpanggep a mangdidigra kaniak.+
14 Ngem diak mauma nga aguray kenka;Ad-addanto pay nga idaydayawka.
15 Isarsaritakto ti kinalintegmo,+Agmalmalem nga ipakaammok dagiti panangisalakanmo,Uray no diak maawatan* gapu iti kinaaduda.+
16 Mapanakto ket ibagak dagiti naindaklan nga aramidmo,O Kangatuan nga Apo Jehova;Ipakaammokto ti kinalintegmo, wen, ti mismo a kinalintegmo.
17 O Dios, isursuronakon sipud pay kinaagtutubok,+Ket agingga ita, isarsaritak dagiti nakaskasdaaw nga aramidmo.+
18 Uray no lakayakon ken ubananakon, O Dios, dinak koma baybay-an.+
Palubosannak a mangipakaammo iti sumaruno a henerasion maipapan iti pannakabalinmo*Ken iti sumaganad a henerasion maipapan iti kinabilegmo.+
19 O Dios, naindaklan unay ti kinalintegmo;+Nakaskasdaaw dagiti inaramidmo;O Dios, asino ti kas kenka?+
20 Uray no impalubosmo a mapasarak ti adu a rigat ken kalamidad,+Papigsaennak koma manen;Aonennak manipud iti uneg* ti daga.+
21 Nayonam koma ti dignidadkoSalakniban ken liwliwaennak koma.
22 Ket idaydayawkanto babaen ti dekuerdas a pagtokarGapu iti kinamatalekmo, O Diosko.+
Agtokarakto iti arpa bayat nga agkantaak iti panangidaydayaw* kenka,O Nasantuan a Dios ti Israel.
23 Agriawakto gapu iti ragsak bayat nga agkantaak iti panangidaydayaw kenka,+Gapu ta insalakanmo ti biagko.*+
24 Agmalmalem nga ipakpakaammok* ti kinalintegmo,+Ta maibabain ken maumsinto dagidiay mayat a mangdadael kaniak.+
Footnotes
^ Wenno “Agparintumeng ken agimdengka.”
^ Wenno “Soberano.”
^ Wenno “Sikan ti kompiansak.”
^ Wenno “mangbirbirok iti kararuak.”
^ Wenno “iti kararuak.”
^ Wenno “mabilang.”
^ Lit., “takiagmo.”
^ Wenno “adalem a dandanum.”
^ Wenno “agputarak iti musika.”
^ Wenno “sinubbotmo ti kararuak.”
^ Wenno “a pampanunotek.”