Salmo 97:1-12
97 Ni Jehova ket nagbalinen nga Ari!+
Agrag-o koma ti daga.+
Agragsak koma ti adu nga isla.+
2 Dagiti ulep ken ti napuskol a kinasipnget ti adda iti aglawlawna;+Kinalinteg ken kinahustisia ti pundasion ti tronona.+
3 Adda apuy iti sanguananna+A manguram kadagiti kabusorna iti aglikmutna.+
4 Dagiti kimatna ti manglawag iti daga;Makita dayta ti daga ket agpigerger.+
5 Dagiti bantay ket malunag a kas iti allid gapu ken Jehova,+Gapu iti Apo ti intero a daga.
6 Iwaragawag ti langit ti kinalintegna,Ket makita ti amin a tattao ti dayagna.+
7 Mapabainan koma ti amin nga agdaydayaw iti aniaman a kinitikitan nga imahen,+Dagidiay mangipangpangas kadagiti awan serserbina a didiosenda.+
Agruknoykayo* kenkuana, dakayo amin a didiosen.+
8 Mangngeg dayta ti Sion ket agragsak;+Agrag-o dagiti ili* iti JudaGapu kadagiti pangngeddengmo, O Jehova.+
9 Ta sika, O Jehova, ti Kangatuan iti intero a daga;Adayo a natantan-okka ngem iti amin a sabali a dios.+
10 O dakayo a mangay-ayat ken Jehova, guraenyo ti dakes.+
Salsalaknibanna ti biag* dagiti napudno kenkuana;+Isalakanna ida iti ima* dagiti managdakdakes.+
11 Rimmaniag ti lawag kadagiti nalinteg+Ken agragragsak dagiti nalinteg ti pusoda.
12 Dakayo a nalinteg, agrag-okayo ken Jehova,Ken agyamankayo iti nasantuan a naganna.*
Footnotes
^ Wenno “Agdaydayawkayo.”
^ Lit., “annak a babbai.”
^ Wenno “kararua.”
^ Wenno “pannakabalin.”
^ Lit., “pakalaglagipanna.”
