Sofonias 3:1-20
3 Kaasi pay daydiay rebelde, narugit, manangirurumen a siudad!+
2 Saan a nagtulnog iti timek;+ saan nga immawat iti disiplina.+
Saan a nagtalek ken Jehova;+ saan nga immasideg iti Diosna.+
3 Dagiti prinsipena ket kas kadagiti ngumerngernger a leon.+
Dagiti ukomna ket kas kadagiti lobo iti rabii;Saanda a mangibati iti uray maysa a tulang a mangutngotan agingga iti bigat.
4 Naloko dagiti propetana, manangallilawda.+
Rinugitan dagiti papadina ti banag a nasantuan;+Sinukirda ti linteg.+
5 Nalinteg ni Jehova iti tengngada;+ saan nga agaramid iti di umiso.
Binigat nga ipakaammona ti pangngeddengna,+Saan nga aglangan a kas iti aldaw.
Ngem ti nakillo saanna nga ammo ti agbain.+
6 “Dinadaelko dagiti nasion; napanawan dagiti torreda iti nagsulian.
Dinadaelko dagiti kalsadada, tapno awan ti asinoman a lumasat.
Nabaybay-an a narba dagiti siudadda, nga awanan iti tao nga agnaed.+
7 Kinunak, ‘Sigurado nga agbutengkanto kaniak ket awatemto ti disiplina,’*+
Tapno saan a madadael ti pagnaedanna+—Isingirkonto kenkuana amin dagitoy.*
Ngem ad-adda pay a magagaranda nga agaramid iti dakes.+
8 ‘Gapuna, itultuloymo ti mangnamnama* kaniak,’+ kuna ni Jehova,‘Agingga iti aldaw a tumakderak a mangsamsam,*Ta ti pangngeddengko ket ummongek dagiti nasion ken pagarian,Tapno ibukbokko kadakuada ti ungetko, ti amin a sumsumged a pungtotko;+Ta maibusto ti intero a daga gapu iti apuy ti regtak.+
9 Iti kasta, suktakto ti lengguahe dagiti tattao iti nasin-aw a lengguahe,Tapno umawagda amin iti nagan ni Jehova,Ket agserbida kaniak iti abagan-abaga.’*+
10 Manipud iti rehion dagiti karayan ti Etiopia,Iyegandakto iti sagut dagidiay agpakpakaasi kaniak, ti anak a babai ti naiwarawara nga ilik.+
11 Iti dayta nga aldaw, saankanto a maibabainGapu iti amin nga inaramidmo kas panagrebeldem kaniak,+Ta ikkatekto iti tengngam ti natangsit ken napangas a tattao;Ket pulos a saankanton nga agtangsit iti nasantuan a bantayko.+
12 Ipaluboskonto nga agtalinaed iti tengngam ti napakumbaba ken nanumo a tattao,+Ket agkamangdanto iti nagan ni Jehova.
13 Saanton nga agaramid iti kinakillo+ dagidiay nabatbati iti Israel;+Saandanton nga agsao iti kinaulbod, wenno mangallilaw ti dilada;Mangandanto* ken agiddada, ket awanto ti pagbutnganda.”+
14 Agriawka gapu iti rag-o, O anak a babai ti Sion!
Agriawka gapu iti balligi, O Israel!+
Agrag-o ken agragsakka iti amin a pusom, O anak a babai ti Jerusalem!+
15 Inikkat ni Jehova dagiti panangukom maibusor kenka.+
Pinapanawna ti kabusormo.+
Adda iti tengngam ti Ari ti Israel, ni Jehova.+
Saankanton nga agbuteng iti kalamidad.+
16 Iti dayta nga aldaw, maibaganto iti Jerusalem:
“Dika agbuteng, O Sion.+
Saan koma a kumapuy ti pakinakemmo.*
17 Adda iti tengngam ni Jehova a Diosmo.+
Mangisalakanto kas ti Mannakabalin.
Agragsakto kenka nga addaan dakkel a rag-o.+
Agulimekto* iti ayatna.
Agragsakto kenka nga agririaw gapu iti rag-o.
18 Ummongekto dagiti agladladingit gapu ta awanda kadagiti piestam;+Awanda ta naibabainda iti sabali a daga gapu kenkuana.+
19 Iti dayta a tiempo, agtignayakto maibusor iti amin a nangparigat kenka;+Ket isalakankonto daydiay agpilaypilay,+Ken ummongekto dagiti naiwarawara.+
Pagbalinekto ida a maidaydayaw ken nalatak*Iti amin a daga a nakaibabainanda.
20 Iti dayta a tiempo, iserrekkayto,Inton ummongenkayo.
Ta pagbalinenkayto a nalatak* ken maidaydayaw+ iti tengnga ti amin nga ili ti daga,Inton ummongek nga isubli iti imatangyo dagiti naipanaw,” kuna ni Jehova.+
Footnotes
^ Wenno “Dusaekto maigapu kadagitoy.”
^ Wenno “panangilinteg.”
^ Wenno “aguray a siaanus.”
^ Wenno mabalin a, “tumakderak kas testigo.”
^ Wenno “agdayawda kaniak a sangsangkamaysa.”
^ Wenno “Agarabdanto.”
^ Lit., “nga agsalupaypay ti imam.”
^ Wenno “Naulimekto; Komportablento; Kontentonto.”
^ Lit., “ken iyaramidak ida iti nagan.”
^ Lit., “iyaramidankayto iti nagan.”
