Surat ken Tito 1:1-16
1 Siak ni Pablo, adipen ti Dios ken apostol ni Jesu-Kristo maitunos iti pammati dagiti pinili ti Dios ken iti umiso a pannakaammo iti kinapudno a maitunos iti debosion iti Dios
2 ken maibatay iti namnama a biag nga agnanayon+ a nabayagen nga inkari ti Dios, a saan a mabalin nga agulbod;+
3 ngem iti naikeddeng a tiempona, impakaammona ti saona babaen ti panangasaba a naitalek kaniak+ maitunos iti bilin ti Dios, a Manangisalakan kadatayo;
4 nagsuratak kenka Tito, maysa a pudpudno nga anak maitunos iti pammati nga adda kadatayo amin:
Adda koma kenka ti nagpaiduma a kinaimbag ken talna manipud iti Dios nga Ama ken ni Kristo Jesus a Manangisalakan kadatayo.
5 Imbatika idiay Creta tapno asikasuem ti bambanag a masapul a mailinteg* ken mangdutokka kadagiti panglakayen iti tunggal siudad, kas imbilinko kenka:
6 no adda lalaki nga awan pakababalawanna, asawa ti maymaysa a babai, addaan iti manamati nga annak a saan a naakusaran iti naalas a panagbiag* wenno kinarebelioso.+
7 Ta kas mayordomo ti Dios, ti manangaywan ket masapul nga awan pakababalawanna, saanna nga ipilit ti kaykayatna,+ saan a nalaka nga agpungtot,+ saan a mammartek, saan a naranggas,* saan a naagum iti material a gunggona,
8 no di ket managpadagus,+ managayat iti kinaimbag, nasimbeng ti panunotna,*+ nalinteg, napudno,+ managteppel,+
9 sursurotenna a naimbag ti mapagtalkan a sao* iti pamay-an ti panangisurona,+ tapno kabaelanna ti mangparegta* babaen ti nasayaat* a pannursuro+ ken matubngarna+ dagidiay kumontra.
10 Ta adu ti rebelioso a lallaki, agsasao iti awan serserbina, ken manangallilaw, nangnangruna dagidiay mangsursurot iti panagkugit.+
11 Masapul a maapput ti ngiwat dagitoy a lallaki, ta daddadaelenda dagiti sangakabbalayan babaen ti panangisuroda iti bambanag a saan a rumbeng gapu ta naagumda iti material a gunggona.
12 Adda maysa a propeta a kailianda a nagkuna: “Kanayon nga agulbod dagiti Cretano, kaslada kadagiti naranggas nga atap nga animal, narawet a sadut.”
13 Pudno dayta nga imbagana. Gapuna, itultuloymo a tubngaren ida iti nakaro tapno tumibker ti pammatida,
14 ket saanda a denggen dagiti sarsarita dagiti Judio ken bilbilin dagiti tattao nga immadayo iti kinapudno.
15 Nadalus ti amin a banag kadagiti nadalus a tattao;+ ngem awan ti nadalus kadagiti tattao a narugitan ken awanan pammati, ta narugitan ti isip ken konsiensiada.+
16 Ibagbagada iti publiko nga am-ammoda ti Dios, ngem laklaksidenda babaen kadagiti aramidda,+ gapu ta nagdakes, nasukir, ken saanda a maikari a mangaramid iti aniaman a naimbag.
Footnotes
^ Wenno “bambanag a kurang.”
^ Wenno “iti kinagulo.”
^ Wenno “nga agkabil.”
^ Wenno “nasayaat ti panagdesisionna.”
^ Wenno “mapagpiaran a mensahe.”
^ Wenno “mangtignay.”
^ Wenno “makapasalun-at; makagunggona.”
