Uk-ukom 1:1-36
1 Kalpasan ti ipapatay ni Josue,+ insaludsod dagiti Israelita* ken ni Jehova:+ “Siasino kadakami ti umuna a makilaban kadagiti Canaanita?”
2 Insungbat ni Jehova: “Ti Juda.+ Itedkonto* kadakuada ti daga.”
3 Kalpasanna, kinuna ti Juda iti Simeon a kabsatna: “Kuyogendakami a mapan iti naited a teritoriami+ ket gubatentayo dagiti Canaanita, sa kaduaendakayto met a mapan iti naited a teritoriayo.” Iti kasta, kimmuyog kadakuada ti Simeon.
4 Idi nakilaban ti Juda kadagiti Canaanita ken Perizeo, pinagballigi ida ni Jehova,+ ket inabakda ti 10,000 a lallaki idiay Bezek.
5 Bayat ti pannakilabanda kadagiti Canaanita+ ken Perizeo,+ nasarakanda met idiay Bezek ni Adoni-bezek ket nakilabanda kenkuana.
6 Nagtalaw ni Adoni-bezek ket kinamatda. Idi natiliwda, pinutedda dagiti tangan ti ima ken sakana.
7 Kinuna ni Adoni-bezek: “Adda 70 nga ari a pinutedko dagiti tangan ti ima ken sakada nga agpidpidut iti maregreg a taraon iti sirok ti lamisaanko. Inaramid kaniak ti Dios ti inaramidko kadakuada.” Kalpasanna, impanda idiay Jerusalem+ ket natay sadiay.
8 Ginubat pay dagiti lallaki iti Juda ti Jerusalem+ ket pinarmekda ti siudad babaen ti espada sa pinuoranda.
9 Insaruno a ginubat dagiti lallaki iti Juda dagiti Canaanita nga agnanaed iti kabambantayan, iti Negeb, ken iti Sefela.+
10 Ginubat pay ti Juda dagiti Canaanita nga agnanaed idiay Hebron (maawagan idi iti Kiriat-arba), ket pinapatayda da Sesai, Ahiman, ken Talmai.+
11 Insarunoda a ginubat dagiti agnanaed idiay Debir.+ (Maawagan idi iti Kiriat-sefer.)+
12 Kinuna ni Caleb:+ “Iyasawak ni Aksa nga anakko iti asinoman a mangraut ken mangsakup iti Kiriat-sefer.”+
13 Naparmek dayta ni Otniel+ nga anak ni Kenaz+ nga ading ni Caleb, isu nga intedna ni Aksa nga anakna kas asawa ni Otniel.
14 Idi mapanen ni Aksa iti balay ni Otniel nga asawana, kinombinsirna a dumawat iti talon ken amana a Caleb. Dimsaag ni Aksa iti asno a nagsakayanna,* ket dinamag ni Caleb: “Ania ti kayatmo?”
15 Insungbat ni Aksa: “Pangngaasim ta bendisionannak. Inikkannak iti daga iti abagatan;* itedmo pay koma ti Gulot-maim.”* Isu nga inted ni Caleb ti Makinngato a Gulot ken ti Makimbaba a Gulot.
16 Dagiti kaputotan ti Keneo+ a katugangan ni Moises+ a naggapu iti siudad dagiti palma+ ken dagiti tattao ti Juda napanda iti let-ang ti Juda, iti abagatan ti Arad,+ ket nakipagnaedda kadagiti tattao sadiay.+
17 Ngem intultuloy ti Juda ti nakigubat a kadua ti Simeon a kabsatna, ket ginubatda dagiti Canaanita nga agnanaed idiay Zefat sa dinadaelda dayta.+ Pinanagananda dayta a siudad iti Horma.*+
18 Insaruno a ginubat ti Juda ti Gaza,+ Askelon,+ Ekron,+ ken dagiti lugar a sakupda.
19 Tinulongan ni Jehova ti Juda, ket nasakupda ti kabambantayan, ngem saanda a napapanaw dagiti agnanaed iti tanap,* ta addaanda kadagiti karuahe a pakigubat a nakabitan iti kasla kumpay a landok dagiti pilidda.*+
20 Intedda ken Caleb ti Hebron, kas inkari ni Moises,+ ket pinapanawna sadiay ti tallo nga annak ni Anak.+
21 Ngem saan a pinapanaw dagiti Benjaminita dagiti Jebuseo nga agnanaed idiay Jerusalem, isu a nagtultuloy a nakipagnaed dagiti Jebuseo kadagiti Benjaminita idiay Jerusalem agingga ita nga aldaw.+
22 Napan met ginubat dagiti kaputotan ni Jose+ ti siudad ti Bethel, ket tinulongan ida ni Jehova.+
23 Nangibaonda kadagiti mangespia iti Bethel (maawagan idi iti Luz).+
24 Nakakita dagiti espia iti lalaki a naggapu iti siudad, ket kinunada: “Isurom kadakami ti dalan a sumrek iti siudad, ket nasayaatto ti panangtratomi kenka.”*
25 Insurona ti dalan a sumrek iti siudad, ket pinapatayda dagiti tattao sadiay babaen ti espada, ngem saanda a sinaktan ti lalaki ken ti intero a pamiliana.+
26 Napan ti lalaki iti daga dagiti Heteo ket nangbangon iti siudad a pinanagananna iti Luz, a dayta ti naganna agingga ita nga aldaw.
27 Saan a natagikua ti Manases ti Bet-sean, Taanak,+ Dor, Ibleam, Megiddo, ken dagiti ili iti aglawlawda.+ Nagpilit nga agnaed dagiti Canaanita iti daytoy a daga.
28 Idi pimmigsa dagiti Israelita, pinuersada a pinagtrabaho dagiti Canaanita,+ ngem saanda a pinapanaw ida.+
29 Saan met a pinapanaw ti Efraim dagiti Canaanita nga agnanaed idiay Gezer. Intultuloy dagiti Canaanita ti nakipagnaed kadagiti Efraimita idiay Gezer.+
30 Saan a pinapanaw ti Zabulon dagiti agnanaed idiay Kitron ken Nahalol.+ Intultuloy dagiti Canaanita ti nakipagnaed kadakuada ket pinilit ida dagiti Zabulonita nga agtrabaho.+
31 Saan a pinapanaw ti Aser dagiti agnanaed idiay Acco, Sidon,+ Alab, Akzib,+ Helba, Afik,+ ken Rehob.+
32 Intultuloy dagiti Aserita ti nakipagnaed kadagiti Canaanita nga aggigian sadiay, ta saanda ida a pinapanaw.
33 Saan a pinapanaw ti Neftali dagiti agnanaed idiay Bet-semes ken Bet-anat,+ no di ket intultuloyda ti nakipagnaed kadagiti Canaanita nga aggigian sadiay.+ Pinuersada nga agtrabaho dagiti agnanaed idiay Bet-semes ken Bet-anat.
34 Nagnaed dagiti Danita iti kabambantayan, ta saan ida a pinalubosan dagiti Amoreo a bumaba iti tanap.*+
35 Nagtultuloy a nagnaed dagiti Amoreo idiay Bantay Heres, Aijalon,+ ken Saalbim.+ Ngem idi bimmileg* dagiti kaputotan ni Jose, pinuersada nga agtrabaho dagiti Amoreo.
36 Ti teritoria idi dagiti Amoreo ket manipud iti sang-atan ti Akrabim+ ken manipud Sela nga agpangato.
Footnotes
^ Lit., “annak ni Israel.”
^ Wenno “Intedkon.”
^ Wenno mabalin a, “Nagpalakpak ni Aksa bayat a nakasakay iti asno.”
^ Wenno “Negeb.”
^ Kaipapananna, “Dagiti Sinanmalukong a Lugar a Naglaon iti Danum.”
^ Kaipapananna, “Naikeddeng a Madadael.”
^ Wenno “kapatagan.”
^ Lit., “karuahe a landok.”
^ Lit., “ipakitaandakanto iti napudno nga ayat.”
^ Wenno “kapatagan.”
^ Lit., “pimmigsa ti ima.”
